ކޫއްޑޫ އާއި ތިނަދޫ ފިޝަރީޒް ކޮންޕްލެކްސްގެ މަސައްކަތްތަކެއް އެމްޓީސީސީއާ ހަވާލުކޮށްފި

ގއ. ކޫއްޑޫގައި ހުންނަ ފިޝަރީޒް ކޮމްޕްލެކްސް އާއި ގދ. ތިނަދޫގައި އަލަށް ހަދާ ފިޝަރީޒް ކޮމްޕްލެކްސްގެ ސިވިލް މަސައްކަތްތައް ކުރުމަށް މިފްކޯއިން، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްފިއެވެ.

އަންގާރަ ދުވަހު މިފްކޯގައި ބޭއްވި ރަސްމިއްޔާތެއްގައި އެ ކުންފުނީގެ ފަރާތުން މި އެއްބަސްވުމުގައި ސޮއި ކުރެއްވީ ސީއީއޯ އިސްމާއިލް ފައުޒީއެވެ. އަދި އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ ސީއީއޯ އާދަމް އާޒިމެވެ.

މިފްކޯއިން މައުލޫމާތު ދޭ ގޮތުގައި މި އެއްބަސްވުމުގެ ދަށުން ކޫއްޑޫގައި އަލަށް ގާއިމުކުރާ ބްރައިން ފްރީޒިން ބިލްޑިންގެ ފައުންޑޭޝަނާއި ބްރައިން ޓޭންކުގެ ކޮންކްރީޓް މަސައްކަތާއި، 50 ރީފާ ކޮންޓެއިނަރުގެ ކޮންޓެއިނާ ޔާޑެެއް ހެދުމުގެ މަސައްކަތުގެ އިތުރުން މިފްކޯގެ މަދާވެސަލްތައް ކޫއްޑޫއަށް ގާތްކުރުމަށް ބޭނުންވާ އަންލޯޑިން ޕްލެޓްފޯމުގެ މަސައްކަތް ކުރާނެއެވެ. އަދި ތިނަދޫގައި އަލަށް ގާއިމުކުރާ ފިޝަރީޒް ކޮމްޕްލެކްސްގެ ފައުންޑޭޝަނާއި ބްރައިން ޓޭންކްގެ ކޮންކްރީޓް މަސައްކަތުގެ އިތުރުން އެ ފެސިލިޓީގައި ގާއިމުކުރާ އެހެނިހެން އިމާރާތްތަކުގެ މަސައްކަތާއި ބަނދަރުން ބައެއް ކޮންކްރީޓް ޕޭވްކުރުމުގެ މަސައްކަތް ވެސް އެމްޓީސީސީން ކުރާނެ ކަމަށް އެ ކުންފުނިން ބުންޏެވެ.

މިފްކޯގެ ސީއީއޯ އިސްމާއިލް ފައުޒީ ވިދާޅުވީ ކޫއްޑޫގައި އަލަށް އިތުރުކުރާ ބްރައިންފްރީޒިންއަށް ބޭނުންވާ ހުރިހާ މެޝިނަރީއާއި ތިނަދޫ ފިޝަރީޒް ކޮމްޕެލްކްސްއަށް ބޭނުންވާ މެޝިނަރީޒްތައް މިހާރު ނިމިފައިވާ ކަމަށެވެ. އަދި އެތަކެތި ކުރިއަށް އޮތް 25 ވަރަކަށް ދުވަހުގެ ތެރޭގައި މާލެއަށް ގެނެވޭނެ ކަމަށް އޭނާ ވިދާޅުވިއެވެ. މި މަސައްކަތާއެކު މަސްވެރިންނަށް މިހާރު ދިމާވެފައިވާ ހުރިހާ ގޮންޖެހުންތަކަށް ހައްލު ހޯދައިދެވޭނެ ކަމަށް ވެސް އޭނާ ވިދާޅުވިއެވެ.

މިފްކޯއިން މި މަސައްކަތްތައް އެމްޓީސީސީއާ ހަވާލުކޮށްފައިވަނީ 45 މިލިއަން ރުފިޔާއަށެވެ. މި މަސައްކަތް ތާވަލާއެއްގޮތަށް ނިންމައި ހަވާލުކުރުމަށް މަސައްކަތް ކުރާނެ ކަމަށް އެމްޓީސީސީގެ ސީއީއޯ އާދަމް އާޒިމް ވަނީ ވިދާޅުވެފައެވެ.

މިފްކޯއިން އަންނަނީ މަސްވެރިންނަށް ދިމާވެފައިވާ މައްސަލަތައް ހައްލުކުރުމަށް އެ ކުންފުނީގެ ކެޕޭސިޓީ އިތުރު ކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން، މަސް ކިރުވާ އަދަދު އިތުރު ކުރުމާއި ބްރައިންފްރީޒިން ކެޕޭސިޓީ އިތުރު ކުރުމަށް އެ ކުންފުނިން އަންނަނީ މަސައްކަތް ކުރަމުންނެވެ.