ދެ އަހަރު ދުވަހަށްވުރެ ގިނަ ދުވަހަށްފަހު ކުރީގެ ޓުއަރިޒަމް މިނިސްޓަރު އަލީ ވަޙީދު އަންގާރަ ދުވަހު ރާއްޖެ ވަޑައިގަންނަވާ ޚަބަރު ވެގެންދިޔައީ އެ ދުވަހުގެ އެންމެ ހޫނު އެއް ޚަބަރަށެވެ. ސިޔާސީ މައިދާނުގައި "އަޑު ގަދަ" ބޭފުޅެއްގެ ގޮތުގައި ފާހަގަވެފައިވާ އަލީ ވަޙީދު ރާއްޖެ ވަޑައިގެންނެވުމަށްފަހު އެންމެ ފުރަތަމަ ނޫސްވެރިންނާ ވާހަކަ ދައްކަވަމުން ވެސް ވިދާޅުވީ، އެނބުރި ޤައުމަށް ވަޑައިގެންނެވީ ފުޓުބޯޅައިގެ މީހެއްގެ ގޮތުގައި ކަމަށެވެ. ހަމައެއާއެކު ކުރިއަށް އޮތް ދުވަސްތަކުގައި ފުޓުބޯޅައިގެ ބޮޑު ޕްރޮޖެކްޓެއް އިއުލާން ކުރައްވާނެ ކަމަށް ވެސް ވަނީ ވިދާޅުވެފަ އެވެ.
ދިވެހި ފުޓުބޯޅައިގެ ޙާލަތު ގޯސްވެފައިވާ މި ދަނޑިވަޅަކީ، ފުޓުބޯޅައިގެ ނަން ކިޔާ ބައެއް ފަރާތްތަކުން "ސޭވް އެފްއޭއެމް"ގެ ނަމުގައި ޚާއްސަ ކެމްޕެއިނެއް ވެސް ފަށައިގެން އުޅޭ ވަގުތެކެވެ. އެހެންކަމުން މިއީ، އެފްއޭއެމް ބަދަލު ކުރުމަށް، ނުވަތަ ސަލާމަތް ކުރުމަށް ކުރާ މަސައްކަތުގައި އަލީ ވަޙީދު ބައިވެރިވާނެ ވަގުތަަކަށް ވެސް ވެދާނެ އެވެ. ޔަޤީނުން ވެސް އަލުން ކުލަބު ފުޓުބޯޅައިގެ ތެރެއަށް ނިކުންނާނެ ކަމަށް އަލީ ވަޙީދު ވަނީ އިއުލާންކުރައްވާފަ އެވެ. ފުޓުބޯޅައިގައި"ބަލަކް" ގެ ނަމުން މަޝްހޫރުވެފައިވާ އަލީ ވަޙީދު އަކީ ކުލަބު ފުޓުބޯޅަ ހިންގުމުގައި ތަޖުރިބާ ބޮޑު ބޭފުޅެކެވެ. އެގޮތުން އޭނާ ވަނީ 2012 ވަނަ އަހަރު ނިއު ރޭޑިއަންޓް ސްޕޯޓްސް ކުލަބުގެ ޗެއާމަންކަމާ ހަވާލުވެފަ އެވެ. ޖެހިގެން އައި ހަތަރު އަހަރުގެ ތެރޭގައި ނިއު އިން ހޯދި ކާމިޔާބީތަކުގައި އަލީ ވަޙީދު ވަނީ ބޮޑު ޤުރުބާނީ އެއް ވެސް ވެފައެވެ.
އަނެއްކޮޅުން އަލީ ވަޙީދު އަކީ ކޯޗިންގެ ދާއިރާގައި ވެސް ތަޖުރިބާ ހުރި ބޭފުޅެކެވެ. އިނގިރޭސިވިލާތުގައި ހުންނެވި ދުވަސްވަރު އޭނާ ވަނީ، އިނގިރޭސިވިލާތުގެ ލަންޑަނުގެ ޑިސްޓްރިކްޓް ލީގުގެ ސެންޗަނަރީ ކަޕްގެ ޗެމްޕިއަންކަން ހޯއްދަވާފަ އެވެ. މީގެ އިތުރުން އިނގިރޭސި އެފްއޭ އިން ހޮވި ސައުތު ލަންޑަންގެ އެންމެ މޮޅު ކޯޗަަކަށް ހޮވުނީ ވެސް އޭނާ އެވެ. އެހެންކަމުން ދިވެހި ފުޓުބޯޅައިގެ ކޯޗިންގެ ތެރެއަށް ނިކުންނަވައި، އެފްއޭއެމް ހަމަ މަގަށް އެޅުވުމުގެ މަސައްކަތް ވެސް އަލީ ވަޙީދު ކުރެއްވުމަކީ ގާތް ކަމެެކެވެ.
މިވަގުތަށް ބަލާއިރު، އެފްއޭއެމް ހަމަ މަގަށް އެޅުވުމުގެ މަސައްކަތަށް އަލީ ވަޙީދު ނިކުންނެވުމަކީ ވެސް ހެޔޮ ފާލެކެވެ. ސަބަބަކީ ކުޅިވަރުގައި މިހާތަނަށް އަލީ ވަޙީދު ކުރައްވާފައިވާ ކޮންމެ މަސައްކަތަކީ ވެސް ވަރަށް ކަމާވެގެން، ޚާއްސަ ސަމާލުކަމެއް ދެއްވައިގެން ކުރައްވާފައިވާ މަސައްކަތަކަށް ވުމުންނެވެ. އެކަން ކުޅިވަރުގައި އުޅުއްވާ ބައެއް ބޭފުޅުން، އަދި ފުޓުބޯޅައިގެ ބައެއް ބޭފުޅުން ވެސް ވަނީ ފާހަގަކުރައްވާފަ އެވެ. ދިވެހި ފުޓުބޯޅައިގައި މިހާރު ވެސް މަސައްކަތް ކުރައްވަމުން އަންނަ ބޭފުޅަކު ވިދާޅުވީ، އެފްއޭއެމްގެ އިސްލާހު ކުރުމުގެ މަސައްކަތަށް އަލީ ވަޙީދު ނިކުންނަވާނެ ކަމަށް ވަރަށް ބޮޑަށް އުންމީދު ކުރައްވާ ކަމަށެވެ. އޭނާ ދެކިވަޑައިގަންނަވާ ގޮތުގައި އަލީ ވަޙީދު އާއެކު އެ މަސައްކަތް އެންމެ ބޭނުންވާ ސްޕީޑުގައި ކުރިއަށް ގެންދިޔުމަށް ވެސް ފަސޭހަ ވާނެ އެވެ.
އަނެއްކޮޅުން ޓުއަރިޒަމް މިނިސްޓަރު ކަމުގައި ހުންނެވިއިރު ވެސް އަލީ ވަޙީދު ވަނީ ކުޅިވަރުގެ މަސައްކަތް ކުރައްވާފަ އެވެ. ވަގުތީ ގޮތުން ކުޅިވަރު ވުޒާރާ ހިންގުމަށް ލިބުނު ފުރުސަތުގައި އަލީ ވަޙީދު ވަނީ ދުނިޔޭގެ ބޮޑެތި ލީގުތަކުގައި ދިވެހިރާއްޖެ އިސްތިހާރު ކުރުމުގެ މަސައްކަތް ވެސް ކުރައްވާފަ އެވެ. އެހެންކަމުން ހުރިހާ ގޮތަކުން ބެލިކަމުގައިވީ ނަމަވެސް، އަލީ ވަޙީދު އަކީ ދިވެހި ފުޓުބޯޅައަށް ފަރިތަ މޫނެކެވެ. ދިވެހި ފުޓުބޯޅަ ދަންނަ، ތަޖުރިބާ ބޮޑު ބޭފުޅެކެވެ.
މިސާލަކަށް އޭނާ (އަލީ ވަޙީދު) ބުނެފި އެފްއޭއެމްގެ ރައީސްކަމެއް ބޭނުމެއް ނޫނޭ. އެކަން މިވަގުތަށް މުހިންމެއް ވެސް ނޫން. އޭނާ އަކީ ދިވެހި ފުޓުބޯޅައިގައި ކާމިޔާބު މަސައްކަތްތަކެއް ކޮށްފައިވާ މީހެއް. ނިއުގެ ޗެއާމަނަކަށް ހުރި ދުވަސްވަރު އެކަން ފެނުނު. އަނެއްކާ ޤައުމީ ޓީމުގެ މެނޭޖަރުކަން ވެސް ކުރި. އަޅުގަނޑަށް ޤަބޫލު ކުރެވެނީ މިވަގުތު އޭނާ ނިކުންނާނީ ފުޓުބޯޅައިގެ ކަންކަން އިސްލާހު ކުރުމަށް، އެއަށްފަހު ފުޓުބޯޅަ މީހުންގެ އިތުބާރާއެކު އެފްއޭއެމްގެ ރައީސްކަމަށް ނިކުމެދާނެ. މި ބުނީ މިސާލަކަށް އެހެން ވެދާނެއޭ.ފުޓުބޯޅައިގައި އުޅުއްވާ ބޭފުޅަކު.
އަނެއްކަމަކީ މިހާރު މި އޮތް ޙާލަތުގައި އެފްއޭއެމްގެ ރައީސްކަމަށް ނިކުންނަވަން އަލީ ވަޙީދު ނިންމަވައިފި ނަމަ، ކުލަބުތަކުން އޭނާ އަށް ތާއީދު ކުރުން ވެސް ގާތެވެ. ސަބަބަކީ އެފްއޭއެމްގެ މިހާރުގެ މެނޭޖުމަންޓާމެދު ފުޓުބޯޅައިގައި އުޅޭ އެންމެން ވެސް ނުރުހުންވެފައި ވާތީ އެވެ. މިހާތަނަށް އެންމެން ދައްކަމުން އައި ވާހަކަ އަކީ އެފްއޭއެމްގެ ރައީސްކަމަށް ބައްސާމް އަދީލް ޖަލީލުއާ ވާދަކޮށްލަން ނިކުންނާނެ މީހަކު ނެތް ވާހަކަ އެވެ. ނަމަވެސް، މިހާލަތުގައި އެކަމަށް އަލީ ވަޙީދު އިސްނެގުމަކީ ވެސް ހެފޮ ފާލަކަށް ވެދާނެ އެވެ.
ކޮންމެ ގޮތެއްވީ ނަމަވެސް، ފުޓުބޯޅައިގައި އަލީ ވަޙީދުގެ ބޮޑު ޕްރޮޖެކްޓު އިއުލާން ކުރާނެ ދުވަހެއް ވެސް ވަނީ ކަނޑައަޅާފަ އެވެ. އެއީ އަލީ ވަޙީދުގެ އުފަން ދުވަސް ކަމުގައިވާ މިހިނގާ ޖުލައި މަގުގެ 20 ވަނަ ދުވަހެވެ. އެ ދުވަހަށް ހުރިހާ ނޫސްވެރިންނަށް ވެސް އަލީ ވަޙީދު ވަނީ ދައުވަތު ދެއްވާފަ އެވެ. ބައެއް ފަރާތްތަކުން ދެކޭ ގޮތުގައި ދިވެހި ފުޓުބޯޅަ އަޑިއަޅާލައިވާ މިވަގުތުގައި ފުޓުބޯޅައިގެ ކަންކަމަށް އަލީ ވަޙީދު ނިކުންނެވުމަކީ ރަނގަޅު ވިސްނުމެކެވެ.
މިވަގުތު އަލީ ވަޙީދުގެ ވިސްނުން ހުރީ ސިޔާސީ ކަންކަމުން ފެޔަށް ޖެހި ވަޑައިގެން، ފުޓުބޯޅައިގެ ކަންކަމުގައި އުޅުއްވުންކަން ސާފެވެ. އެހެންކަމުން ކުރިއަށް އޮތް ދުވަސްތަކުގައި ފުޓުބޯޅަ އިސްލާހު ކުރުމަށް ކުރަމުން އަންނަ މަސައްކަތް އިތުރަށް ވަރުގަދަ ވާނެ ކަމަށް ބެލެވެ އެވެ.
