އަންނަ މަހު ފަށާ ޔޫރަޕުގެ އައު ފުޓްބޯޅަ ސީޒަނަށް ބާސެލޯނާގެ ކުޅުންތެރިންގެ ޖާޒީ ނަންބަރުތަކަށް ބަދަލުތަކެއް ގެންނަން ނިންމައިފި އެވެ.

މިކަން ކުރަނީ ޓީމުގައި ތިބި މުހިންމު ބައެއް ކުޅުންތެރިން އެހެން ކުލަބުތަކަށް ބަދަލުވުމުންނާއި އައު ސީޒަނަށް އެކުލަވާލާ ޓީމުގެ ކުޅުންތެރިން ނަންބަރު ބަދަލު ކުރަން ބޭނުންވާތީ އެވެ.

ކެޕްޓަން ސާޖިއޯ ބުސްކެޓްސް ބޭނުންކުރި ފަސް ނަންބަރާއި ޖޯޑީ އަލްބާގެ 18 ނަންބަރު ޖާޒީ އާއި ޖެރާޑް ޕީކޭ ބޭނުންކުރި ތިން ނަންބަރު ޖާޒީ އަކީ އެންމެ ޑިމާންޑް ބޮޑު ނަންބަރުތަކެވެ.

އައު ސީޒަނަށް ގަވީ ބޭނުންކުރާނީ ހަ ނަންބަރެވެ. ލެވޮންޑޯސްކީ އާއި ޕެޑްރީ އާއި ރޮނަލްޑް އަރައުހޯ އާއި އޮސްމާނޭ ޑެމްބެލޭ އާއި ފްރޭންކީ ޑިޔޮންގް އަދި ގޯލްކީޕަރު މާކް އަންދްރޭ ޓާސްޓެގަން އާއި އަންސޫ ފަޓީގެ ޖާޒީ ނަންބަރު ބަދަލު ނުކުރާނެ އެވެ.

ނަމަވެސް ޒުވާން ވާތުބެކް އަލްހަންދްރޯ ބަލްޑޭ ބޭނުންވަނީ ޖޯޑީ އަލްބާގެ 18 ނަންބަރެވެ. ބަލްޑޭ މިހާރު ކުޅެނީ 16 އަށެވެ. ޓީމަށް އަލަށް ގެނައި އިކާއީ ގުންޑޮގަން އޭނާގެ ކެރިއަރުގައި ގިނައިން ބޭނުންކުރީ އަށް ނަންބަރެވެ. ނަމަވެސް އެއީ ޕެޑްރީގެ ނަންބަރުކަމުން އެ ނަންބަރެއް ނުލިބޭނެ އެވެ. ގުންޑޮގަން އަށް ދޭނެ ކަމަށް ލަފާކުރަނީ 14 ނަންބަރެވެ. އެއީ ބޮރޫޝިޔާ ޑޯޓްމުންޑްގައި އޭނާ ކުޅުނު ނަންބަރެކެވެ. މި ނަންބަރު ބޭނުންނުވާނަމަ ގުންޑޮގަން އަށް ކުރީގެ ދެ ކެޕްޓަނުން ކަމަށްވާ ބުސްކެޓްސް އާއި ކާލޮސް ޕުޔޯލް ބޭނުންކުރި ފަސް ނަންބަރު ވެސް ދޭން ބާސެލޯނާ އޮތީ ތައްޔާރަށެވެ.

އަލަށް ގެނައި އިނިގޯ މާޓިނޭޒް އޭނާގެ ކެރިއަރުގައި ބޭނުންކުރީ ހަޔަކާއި ހަތަރަކެވެ. ނަމަވެސް މި ދެ ނަންބަރަކީ ސީނިއާ ދެ ކުޅުންތެރިއަކު ބޭނުންކުރާ ނަންބަރުތައް ކަމުން އޭނާ އަށް ތިނެއް ދިނުން އެކަށީގެންވެ އެވެ. ނަމަވެސް ޖެރާޑް ޕީކޭ ބޭނުންކުރި ތިން ނަންބަރު ހޯދުމަށް ކްރިސްޓިއަންސަން ވެސް ބޭނުންވެ އެވެ. މިހެންވެއްޖެނަމަ މާޓިނޭޒަށް އޭނާ ސޮސިއެޑާޑްގެ ޔޫތު ޓީމުގައި ކުޅުނު 12 ނަންބަރު ދީފާނެ އެވެ.

އަލަށް ގެންނަ ބްރެޒިލްގެ ޒުވާން ވިޓޯ ރޮކޭ އަށް ނުވަ ނަންބަރު ނުލިބޭނެ އެވެ. އެއީ ލެވޮންޑޯސްކީގެ ނަންބަރެވެ. މިހެންވެ ރޮކޭ އަށް ދޭނެ ނަންބަރެއް ލަފާކުރަން ވެސް ދަތިކަމަށް ސްޕޭނުގެ މީޑިއާތަކުން ބުނެ އެވެ. ކަނާތު ބެކް ހޫލްސް ކޫންޑޭ ބޭނުންވަނީ 23 ނަންބަރު ދޫކޮށް ތިނެއް ނުވަތަ ފަހަކަށް ބަދަލުވާށެވެ. އެރިކް ގާސިއާ ވެސް ބޭނުންވަނީ 24ގެ ބަދަލުގައި ތިނެއް ނުވަތަ 14 އެވެ.