މުސާރަ ނުދޭތީ އެފްއޭއެމްގެ މުވައްޒަފުން އޮފީހަށް ނުނިކުމޭ، އިދާރާގެ ބަހެއް ނެތް!
މުވައްޒަފުންނަށް މުސާރަ ނުދޭތާ ހަތަރު މަސް ދުވަހަށްވުރެ ވަނީ ގިނަވެފައި
އެފްއޭއެމްގެ ރައީސް ބައްސާމް އަދި ޖެނަރަލް ސެކްރެޓަރީ ޙުސެއިން ޖަވާޒް (ޖަވާ)
ގިނަ ދުވަސްތަކެއް ވަންދެން މުސާރަ މުސާރަ ނުދީވާތީ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ މުވައްޒަފުން އޮފީހަށް ނިކުތުން ހުއްޓާލައިފި އެވެ.
ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި އެފްއޭއެމްގެ މުވައްޒަފުން އާދިއްތަ ދުވަހު އޮފީހަށް ނުކުމެފައެއް ނުވެ އެވެ. އީދު ބަންދަަށްފަހު ޖެހިގެން އައި ހަފްތާ އަކީ ވެސް އެފްއޭއެމްގެ މުވައްޒަފުންނަށް ބަންދު ހަފްތާއެއްގެ ގޮތުގައި އެ އިދާރާ އިން އޮތީ ހަމަޖައްސާފަ އެވެ. އެނގިފައިވާ ގޮތުގައި އެ ހަފްތާ އަކީ ބަންދު ހަފްތާއެއްގެ ގޮތުގައި ހަމަޖައްސާފައި ވަނީ ވެސް މުސާރަ ނުދެވުމުގެ ސަބަބުންނެވެ. ނަމަވެސް، އެ ހަފްތާއަށްފަހު ވެސް އެ އިދާރާގެ މުވައްޒަފުން އޮފީހަށް ނިކުމެފައެއް ނުވެ އެވެ.
ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި އެ އިދާރާގެ މުވައްޒަފުންނަށް މުސާރަ ނުދޭތާ ހަތަރު މަސް ދުވަހަށްވުރެ ގިނަ ދުވަސް ވެއްޖެ އެވެ. އެކަމާ ގުޅިގެން އެފްއޭއެމްގެ ބަހެއް ހޯދުމަށް ކުރި މަސައްކަތް ވަނީ ނާކާމިޔާބުވެފަ އެވެ. އެގޮތުން އެފްއޭއެމްގެ ރަސްމީ މީޑިއާ ވަޓްސްއެޕް ގްރޫޕްގައި ސުވާލު ކުރުމުން ވެސް ޖަވާބެއް ދެއްވާފައެއް ނުވެ އެވެ. އަދި އެ އިދާރާގެ ޖެނަރަލް ސެކްރެޓަރީ ޙުސެއިން ޖަވާޒް (ޖަވާ) އަށް ވަކިން މެސެޖު ކުރުމުން، މެސެޖު ބެއްލެވުމަށް ފަހު ޖަވާބު ދެއްވައިފައެއް ނުވެ އެވެ.
އެފްއޭއެމްގެ މާލީ މައްސަލަ ބޮޑުވެ، ހިންގުން ދޯ ދިޔާވެ، އެކަމުގެ އަސަރު ދިވެހި ފުޓުބޯޅަ އަށް ކޮށްފައިވާތީ އެފްއޭއެމް ރިފޯމް ކުރުމުގެ މަސައްކަތް ދިވެހި ފުޓުބޯޅައިގެ ތަޖުރިބާކާރުން ވަނީ ފަށާފަ އެވެ. އެކަމުގެ ފެށުމެއްގެ ގޮތުން ބޭއްވި ފުރަތަމަ ބައްދަލުވުން ވަނީ ހޮނިހިރު ދުވަހުގެ ރޭ ބާއްވާފަ އެވެ.
