21 އަހަރުން ދަށުގެ ޔޫރޯ މުބާރާތުގައި ބައިކޮޅަށް އެއްވެސް ލަނޑެއް ވަނަނުދީ، ކުޅުނު ހުރިހާ މެޗަކުން މޮޅުވެ، އިންގްލެންޑުން ޗެމްޕިއަންކަން ހޯދައިފިއެވެ.

40 އަހަރަށްފަހު ފުރަތަމަ ފަހަރަށް އިންގްލެންޑުން ޗެމްޕިއަންކަން ހޯދީ ފައިނަލުގައި 1-0ން ސްޕެއިން ބަލިކުރުމަށްފަހުއެވެ. ފުރަތަމަ ހާފުގެ ފަހުކޮޅުގައި ކޯލް ޕާމަރ ފޮނުވާލި ހިލޭ ޖެހުމެއް ގޯލަށް ވަނީ، އެޓީމުގެ ކާޓިސް ޖޯންސް ގައިގައި ޖެހުމުން، މިސްރާބު ބަދަލުވުމާއެކުއެވެ.

މެޗުގެ 99 ވަނަ މިނެޓުގައި ސްޕެއިނަށް ވަނީ ޕެނަލްޓީއެއް ލިބިފައެވެ. ނަމަވެސް ސްޕެއިންގެ އެބެލް ރުއިޒް ޖެހި ޕެނަލްޓީ، އިންގްލެންޑުގެ ކީޕަރު ޖޭމްސް ޓްރޮފޯޑް ވަނީ މަތަކޮށްފައެވެ. ރަނގަޅު ފޯމެއްގައިހުރި ޓްރެފޯޑް ވަނީ މެންޗެސްޓަރ ސިޓީން ބާންލީއަށް 19 މިލިއަން ޕައުންޑަށް ބަދަލުވުމަށް އެއްބަސްވެފައެވެ.

މި މުބާރާތުގައި 13 ލަނޑު ޖަހާފައިވާ ސްޕެއިންއަށް ރުއިޒް ވަނީ ދެވަނަ ހާފު ފެށުނުތަނާ ލަނޑެއް ޖަހައިދީފައެވެ. ނަމަވެސް ވީއޭއާރު ބެލުމަށްފަހު އެ ލަނޑު ވަނީ ބާތިލުކޮށްފައެވެ. މެޗުގެ އެންމެ ފަހު މިނެޓުގައި ސްޕެއިންގެ ބްލެންކޯއާއި އިންގްލެންޑުގެ ގިބްސް ވައިޓަށް ވަނީ ރަތް ކާޑު ދައްކާފައެވެ.

މިއަހަރުގެ މުބާރާތާއެކު އިންގްލެންޑުން ވަނީ ޖުމްލަ ތިން ފަހަރު މި މުބާރާތް ކާމިޔާބުކޮށްފައެވެ. މީގެކުރިން އެ ޓީމުން ވަނީ 1982އާއި 1984 ވަނަ އަހަރުގެ މުބާރާތް ކާމިޔާބުކޮށްފައެވެ.

އިންގްލެންޑަކީ މި މުބާރާތުގެ ތާރީޚުގައި، ބައިކޮޅަށް ލަނޑެއްް ވަނަނުދީ ވިދިވިދިގެން ހަ މެޗު ނިންމާލި ހަމައެކަނި ޓީމެވެ.