ބަލި ޙާލަތު ހުރި ގޮތުން މަހެއް ވަންދެން ޝަރީއަތަށް ހާޒިރުވާން އުޒުރުވެރިވާކަމަށް ކްރިކް ވަނީ ކޯޓަށް އަންގާފައި
މިއީ މި މައްސަލައިގެ އަޑުއެހުން މިފަހުން ކެންސަލްވި 5 ވަނަ ފަހަރު
ރ ފުއްގިރި ހިޔާނާތުގެ މައްސަލައިގައި ދައުވާ އުފުލާފައިވާ އަހުމަދު ކްރިކް ރިޒާ
ރ ފުއްގިރި ކުއްޔަށް ދޫކުރުމުގެ މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށް, ރިޝްވަތު ނެގި މައްސަލައިގައި ކުރީގެ ރައީސް އަބްދުﷲ ޔާމީނާއި، ކްރިކް ރިޒާގެ އިތުރުން 2 ކުންފުންޏެއްގެ މައްޗަށް އުފުލާފައިވާ ދައުވާގެ އަޑުއެހުން އަނެއްކާވެސް ކެންސަލްވެއްޖެއެވެ.
މި އަޑުއެހުން ތާވަލު ކޮށްފައި އޮތީ އާދިއްތަ ދުވަހުގެ ހެނދުނު 09:00 އަށެވެ. ނަމަވެސް އަޑުއެހުން ކެންސަލްކުރީ ކްރިކް ރިޒާ ބަލިވެ އުޅޭކަމަށް ބުނެ މެޑިކަލް ހުށައަޅާފައިވާތީކަމަށް ކްރިމިނަލް ކޯޓުން މައުލޫމާތު ދެއެވެ.
މިއީ މި މައްސަލައިގެ އަޑުއެހުން މިފަހުން ކެންސަލްވި 5 ވަނަ ފަހަރެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި ކްރިކް ރިޒާ ވަނީ ބަލި ޙާލަތު ހުރި ގޮތުން އަޑުއެހުމަށް ހާޒިރުވާން އުޒުރުވެރިވާކަމަށް ބުނެ ކޯޓަށް 1 މަހުގެ މެޑިކަލް ލިޔުންތައް ހުށަހަޅާފައެވެ.
މި މައްސަލައިގައި މިހާރު ކުރިއަށްދަނީ ދައުލަތުގެ ހެކިންގެ ހެކިބަސް ނެގުމެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.
