އަނަސް މަރާލުމުގައި ދައުވާ ލިބޭ މީހުން ބަންދުކުރަން ސުޕްރީމް ކޯޓުން ހުކުމްކޮށްފި
22 ޖޫން 2025 | އާދީއްތަ 14:08އަނަސްއަށް ހަމަލާ ދީފައިވަނީ އަހުމަދު ޒަޔާނާއި އަފްރާހާއި އުސްމާން ކަމަށް ދައުލަތުން ތުހުމަތުކުރޭ
އަނަސްގެ މަރާ ގުޅިގެން ދައުވާކޮށްފައިވާ މީހުން
ރ.މީދު ފެންފިޔާޒުގެ މުޙައްމަދު އަނަސްގެ މަރުގެ މައްސަލާގައި ދައުވާކޮށްފައިވާ ހަތް މީހުން ބަންދުކުރަން ހައިކޯޓުން ދެވަނަ ފަހަރަށް ނިންމުމާއި ގުޅިގެން ސުޕްރީމް ކޯޓަށް ހުށަހެޅި މައްސަލާގައި، ދައުވާ ލިބޭ މީހުން ރިމާޑް ޖަލެއްގައި ބަންދުކުރުމަށް ސުޕްރީމް ކޯޓުން ހުކުމްކޮށްފިއެވެ.
މީގެ އަށް އަހަރު ކުރިން މާލޭގައި ހުންނަ ލިޓަސް ސާވިސް ސެންޓާރުގެ ތެރޭގައި މުހައްމަދު އަނަސް މަރާލި މައްސަލާގައި އެތަށް ޝަރީއަތަކަށްފަހު އަނަސް މަރާލުމުގައި ތުހުމަތުކުރެވުނު މީހުންގެ މައްޗަށް ކުށް ސާބިތު ނުވާކަމަށް ކްރިމިނަލް ކޯޓުން ހުކުމް ކުރީ މިދިޔަ އަހަރުއެވެ. އަދި ކްރިމިނަލް ކޯޓުން އެގޮތަށް މައްސަލަ ނިންމާފައިވަނީ ސީސީޓީވީ ފުޓޭޖު ފަދަ މުހިންމު ހެކިތަކެއްގައި ފުށުއެރުންތަކެއް ހުރުމުން، ގާނޫނުގައި ބުނާ ޝައްކެއް ނެތް މިންވަރަށް ކުށް ކުރި ކަމަށް ސާބިތު ނުވާ ކަމަށް ނިންމަމުންނެވެ.
އެ މައްސަލައިގައި ދައުލަތުން ދައުވާކޮށްފައިވަނީ ލ. ގަން ނަންނާރިގެ، ޖުނައިހު އަބްދުﷲ އާއި ސ. ފޭދޫ ވެސްޓަންވިލާ، ހަސަން މަހްފޫޒާއި ދަފްތަރު ނަންބަރު 1746، ސިމާހު މޫސާއާއި ޅ. ކުރެންދޫ އަސަރުމާގެ، އަހުމަދު ޒަޔާނާއި މ. ދިމިޝްގު، އުސްމާން ޝަރީފާއި މ. ލޮނުމިދިލިގެ އަފްރާހު އަބްދުއްރައްޒާގާއި ތ. ކިނބިދޫ ގުލްފާމްގެ، މުހައްމަދު ސާޒްގެ މައްޗަށެވެ.
އަނަސްއަށް ހަމަލާ ދީފައިވަނީ އަހުމަދު ޒަޔާނާއި އަފްރާހާއި އުސްމާން ކަމަށް ދައުލަތުން ތުހުމަތުކުރެއެވެ. އެ ތިން މީހުންގެ މައްޗަށް ކުރީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ދައުވާއެވެ.
މި ހަތް މީހުން ޝަރީއަތް ނިމެންދެން ބަންދު ކުރުމަށް މީގެ ކުރިން އެދުނުކަމުގައިވިޔަސް 11 މާރިޗް 2025 ގައި ބޭއްވި އަޑު އެހުމުގައި ހައިކޯޓުން ނިންމާފައިވަނީ އެ މީހުން ބަންދު ކުރަންޖެހޭ ހާލަތެއް ނެތް ކަމަށެވެ.
މި މައްސަލައިގައި ތޫނު އެއްޗެއް ބޭނުން ކޮށްގެން ގަސްތުގައި މީހަކު މެރުމުގައި ބައިވެރިވުމުގެ ދައުވާ އުފުލާފައިވާ 4 މީހުންނާއި، އަނަސްއަށް ހަމަލާ ދިނުމުގައި އަމަލީ ގޮތުން ބައިވެރިވި ކަމުގެ ދައުވާ ލިބޭ 3 މީހުންގެ މައްޗަށް ކުށް ސާބިތުނުވާކަމަށް ކްރިމިނަލް ކޯޓުން ހުކުމް ކޮށްފައިވަނީ 25 މެއި 2024 ވީ އާދިއްތަ ދުވަހުގެރޭގައެވެ.
އަނަސް މަރާލާފައިވަނީ، 2017 ވަނަ އަހަރުގެ ޖުލައި މަހުގެ 31 ވަނަ ދުވަހުގެރެއެވެ. އަނަސް މަރާލާފައިވަނީ އޭނާ ފަހާ ދުވަމުން ގޮސް، ލިޓަސް ސަރވިސް ސެންޓަރު ތެރެއަށް އޭނާ ވަނުމުން، ފަހަތުން ގޮސް ހަމަލާދީގެންނެވެ.
ތޫނު ހަތިޔާރު ބޭނުންކޮށްގެން އަނަސްގެ ހަށިގަނޑުގެ އެކި ތަންތަނަށް ހަމަލާދީފައިވާއިރު، ހޮސްޕިޓަލަށް ގެންދިޔައިރުވެސް އޭނާ އޮތީ މަރުވެފައެވެ.
