މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ޕޯޓު ކޮމިއުނިޓީ ފަންޑަށް ޕްރޮޕޯސަލް ހުށަހެޅުމަށް ހުޅުވާލި ފުރުސަތުގައި މުއްދަތު ހަމަވިއިރު 49 އެޕްލިކޭޝަން ލިބިފައިވާކަމަށް އެ ކުންފުނިން ހާމަކޮށްފިއެވެ.

މުޖުތަމައަށް ފައިދާ ހުރި އެކި ޕްރޮޖެކްޓުތައް ހިންގަން މާލީ އެހީ ފޯރުކޮށްދިނުމުގެ ގޮތުން އެމްޕީއެލުން ހާއްސަ ފަންޑެއް ތައާރަފުކުރީ މެއި މަހުގެ ތެރޭގައެވެ. މެއި 31ގެ ނިޔަލަށް މި ފަންޑަށް ޕްރޮޕޯސަލް ހުށަހެޅުމުގެ މުއްދަތު ހަމަވެފައިވާއިރު، އެ މުއްދަތުގެ ތެރޭގައި ބޮޑު ތަރުހީބެއް ލިބުނު ކަމަށް އެމްޕީއެލުން ބުންޏެވެ. އެގޮތުން، 49 އެޕްލިކޭޝަން ލިބުނުއިރު އޭގެ ތެރެއިން އިވެލުއޭޝަން މަރުހަލާއަށް 31 އެޕްލިކޭޝަން ޝަރުތު ހަމަވާކަމަށް އެ ކުންފުނިން ބުންޏެވެ.

އެމްޕީއެލުން ބުނީ ފަންޑަށް އެދި އެންމެ ގިނަ އެޕްލިކޭޝަންތައް ހުށަހަޅާފައިވަނީ ޖަމިއްޔާތަކުން ކަމަށެވެ. އެގޮތުން 27 ޖަމިއްޔާއަކުން ފަންޑަށް އެދިފައިވާއިރު، 13 ސްކޫލަކުންނާއި ފަސް ކައުންސިލަކުން އަދި އަމިއްލަ 4 ފަރާތަކުން އެޕްލިކޭޝަން ހުށަހަޅާފައި ވާކަމަށް އެ ކުންފުނިން ބުންޏެވެ.

ޕޯޓު ކޮމިއުނިޓީ ފަންޑުގެ ދަށުން ފައިސާ ދޫކުރާނީ އެޕްލިކޭޝަންތައް ރިވިއު ކުރުމަށްފަހު ހޮވައިލެވޭ މަޝްރޫއުތަކަށެވެ. މިހާރު ކުރިއަށްދަނީ އިވެލުއޭޝަން ދެ މަރުހަލާގެ ތެރެއިން ފުރަތަމަ މަރުހަލާގެ މަސައްކަތްތައް ކަމަށް އެމްޕީއެލުން ބުނެއެވެ.

މި ފަންޑުގެ ދަށުން މުޖުތަމައަށް ފައިދާހުރި އެކި ޕްރޮޖެކްޓުތައް ހިންގުމަށް އެހީތެރިކަން ފޯރުކޮށްދޭއިރު އދ.ގެ ދެމެހެއްޓެނިވި ތަރައްގީގެ ލަނޑުދަނޑިތަކުގައި ހިމެނޭ ކަންކަން ހާސިލްކުރަން ހުށަހަޅާ މަޝްރޫއުތަކަށް އިސްކަންދެއެވެ. އެފަދަ ޕްރޮޖެކްޓުތަކަށް 40 އިންސައްތަ ޕޮއިންޓް ލިބޭނެކަމަށް ވަނީ ބުނެފައެވެ. އަދި އުފެއްދުންތެރި ޕްރޮޖެކްޓްތަކަށް 20 އިންސައްތަ، ޕްރޮޖެކްޓް ޕްލޭން އަދި އިމްޕްލިމެންޓް ކުރާ ގޮތަށް 30 އިންސައްތަ، ހުށަހަޅާ ޕްރޮޕޯސަލްގެ ޕްރޮފައިލްއަށް 10 އިންސައްތަ މާކްސް ދޭނެއެވެ.

މި ފަންޑުގެ ދަށުން އަހަރަކު 10 މަޝްރޫއަށް އެހީދޭން އެމްޕީއެލުން ވަނީ ނިންމާފައެވެ. އެގޮތުން، ކުދި 8 ޕްރޮޖެކްޓް ހޮވައި ކޮންމެ ޕްރޮޖެކްޓަކަށް 50،000 ރުފިޔާ، އަދި ބޮޑު ދެ ޕްރޮޖެކްޓް ހޮވައި ކޮންމެ ޕްރޮޖެކްޓަކަށް 100،000 ރުފިޔާ ދޭނެއެވެ.