ދިވެހިރާއްޖެއާއި އަޒަރުބައިޖާންގެ ޚާރިޖީ ވުޒާރާ ގެ ފެންވަރުގައި ގުޅުން ބަދަހިކުރުމާބެހޭ ފަހުމުނާމާއެއްގައި ސޮއިކޮށްފިއެވެ.
ހުކުރު ދުވަހު މި އެއްބަސްވުމުގައި ސޮއިކޮށްފައިވަނީ އަޒަރުބައިޖާންގެ ބާކޫގައި މިހާރު ކުރިއަށްދާ ނޮން-އެލައިންޑް މޫވްމަންޓް، (ނާމް)ގެ މިނިސްޓީރިއަލް ބައްދަލުވުމުގެ ހަވާސާގެތެރެއިން ބޭއްވި ރަސްމިއްޔާތެއްގައެވެ. މި އެއްބަސްވުމުގައި ރާއްޖޭގެ ފަރާތުން ސޮއި ކުރެއްވީ މިނިސްޓަރ އޮފް ސްޓޭޓް ފޮރ ފޮރިން އެފެއާޒް އަޙްމަދު ޚަލީލެވެ. އަދި އަޒަރުބައިޖާން ސަރުކާރުގެ ފަރާތުން ސޮއިކުރެއްވީ އެ ޤައުމުގެ މިނިސްޓަރ އޮފް ފޮރިން އެފެއާޒްގެ ޑެޕިއުޓީ މިނިސްޓަރ އެލްނޫރު މަމަޑޯވްއެވެ.
ފޮރިން މިނިސްޓްރީން ބުނީ، މި އެއްބަސްވުމަކީ ދެ ޤައުމުގެ ދެމެދު އޮންނަ ގުޅުން މިހާރަށްވުރެ އިތުރަށް ބަދަހިކޮށް، އިތުރަށް ފުޅާކޮށް، ދެ ޤައުމުގެ މަސްލަހަތު ހިމެނޭ ކަންކަމުގައި އެއްބާރުލުންދީ ގަވާއިދުން މަޝްވަރާ ކުރުމަށް މަގުފަހިކޮށްދިނުމަށް ވެވުނު އެއްބަސްވުމެއް ކަމަށެވެ.
މީގެ އިތުރުން ޚާރިޖީ ދާއިރާއިން ޑިޕްލޮމެޓުން ތަމްރީނު ކުރުމުގައިވެސް މި ފަހުމުނާމާގެ ދަށުން ދެ ޤައުމުގެ ގުޅުން ބަދަހިކުރާނެކަމަށް ފޮރިން މިނިސްޓްރީން ބުނެފައިވެއެވެ.
