އިންސާނާ ސާފުތާހިރުވުމަށް ސާފު ރީތި ފޭރާންލުމަކީ މުހިންމު ކަމެއް ކަމަށާއި، އެފޭރާމުން ބޮޑާކަމުގެ ޝިކާރައަކަށް ވެގެން ނުވާނެ ކަމަށް ހުކުރު ޚުތުބާގައި ބުނެފިއެވެ.

''އިސްލާމްދީނަކީ ސާފުތާހިރުކަމުގެ ދީން'' މިމައުޟޫއަށް އެކިކަންކޮޅުތަކަށް އިއްވި ޚުތުބާގައި ބުނީ އިސްލާމްދީނަކީ އާލަމްތަކަށް ރަހުމަތެއް ގޮތުގައި ﷲ ބާވައިލައްވާފައިވާ މާތް ދީން ކަމަށާއި، އެ ދީނުގައި ވަރަށް މަތިވެރި އަސާސްތަކެއް ކަނޑައަޅުއްވާފައިވާ ކަމަށެވެ. އޭގެ ތެރޭގައި، އިންސާނާގެ މުޅި ދިރިއުޅުމުގެ ހުރިހާ ކަމަކަށް ބޭނުންވާނެ ހަމަތަކާއި އުސޫލުތައް ލައްވާފައިވާއިރު، މީގެ ތެރެއިން އެންމެ ފާހަގަކޮށްލެވޭ މަތިވެރި އެއްސިފައަކީ ސާފުތާހިރުކަން ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ މާތްﷲއަށްޓަކައި މުސްލިމުން އަދާކުރަންޖެހޭ އަޅުކަން ސައްހަވަނީ ދެ ހަދަސުން ތާހިރުވެ، ސާފުތާހިރުކަންމަތީ ހުރެ އެޅުކަން އަދާ ކުރުމުން ކަމަށާއި، ސާފުތާހިރު ފޭރާމެއްގައި އެ އަޅުކަން އަދާކުރުމުން ކަމަށެވެ. ޚުތުބާގައި ބުނީ ނަމާދު ކުރުމާއި، ތަވާފު ކުރުމަށް ނަޖިހުން ތާހިރުވުމާއި، ހިނައިގަތުން ފަދަ ކަންކަމަކީ އިސްލާމް ދީނުގައި ޝަރުއު ކުރެވިގެންވާ ކަންކަމެއް ކަމަށެވެ. އަދި ސާފުތާހިރުކަމަކީ އީމާންކަމުގެ އެއްބައި ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ އިންސާނާ ސާފުތާހިރު ވުމަށްޓަކައި ސާފު ރީތި ފޭރާންލުމަކީ މުހިންމު ކަމެއް ކަމަށެވެ. ނަމަވެސް އެފޭރާމުގެ ސަބަބުން އޭނާ ކަންދެއްކުމާއި، ބޮޑާކަމުގެ ޝިކާރައަކަށް ވެގެންނެއް ނުވާނެ ކަމަށް ޚުތުބާގައި ބުނެފައިވެއެވެ. އަޅުކަމަކީ އިންސާނާއަށް ރޫހާނީ ސާފުތާހިރުކަމެއް ގެނެސްދޭ ކަމެއްކަން ފާހަގަކޮށް ޚުތުބާގައި ބުނީ ތިމާގެ ހަށިގަނޑާއި ފޭރާމާއި ދިރިއުޅޭ ވެށީގެ ސާފުތާހިރުކަމަކީ އަޅުކަން ގަބޫލުވުމާއި މާތްﷲ ގެ ރުއްސެވުމާއި އެކިއެކި ބަލިމަޑުކަމުން ރައްކާތެރިވުމުގެ ވަސީލަތެއް ކަމަށެވެ.

ޚުތުބާގައި ބުނީ ފަރުދީ ސާފުތާހިރު ކަމަކީ ވެސް އިސްލާމްދީނުގައި ވަރަށް ބޮޑަށް ބާރުއަޅާފައިވާ ކަމެއް ކަމަށެވެ. އެގޮތުން ނިޔަފަތި ކެނޑުމާއި، ކިހިލި ފަށްދަށުން އިސްތަށި އުފުރުމާއި، މަތިމަސް ކުރު ކުރުން ފަދަ ކަންކަމަކީ ފަރުދީ ސާފުތާހިރުކަމުގެ ތެރޭގައިވާ ކަންކަމެއް ކަމަށް ޚުތުބާގައި ބުނެފައިވެއެވެ.

މީގެ އިތުރުން ޚުތުބާގައި ބުނީ ކުޑަކަމުދާ ހިނދު ގަޔަށް، ބުރައިގެންނުދާ ގޮތަށް ކުޑަކަމު ދިއުމާއި، ކުޑަކަމު ދިއުމަށްފަހު ތާހިރުވުމަށް ދީނުގައި އަމުރު ކޮށްފައިވާ ކަމަށެވެ. އަދި ކުޑަކަމު ދިއުމަށްފަހު ރަނގަޅަށް ތާހިރުނުވާ މީހުންނަށް ކަށްވަޅުގެ އަޒާބު ލިބޭނެކަން ކީރިތި ރަސޫލާ ހަދީސް ކުރައްވާފައިވާ ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ ހުރިހާ ހާލަތެއްގައި ވެސް ސާފުތާހިރުކަމަށް ސަމާލުކަން ދިނުމަކީ އިސްލާމީ ސަގާފަތުގެ ތެރެއިންވާ ކަމެއް ކަމަށެވެ. އަދި މަގުމައްޗަށާއި، ހިޔާލިބޭ ގަސްގަހުގެ ދަށަށާއި، މީހުން ހިނގާ ބިނގާވެ އުޅޭ ތަންތަނަށް ކުޑަކަމު ދިއުމާއި، ގަޟާހާޖަތް ކުރުމާއި، ކުޅު ޖެހުން ފަދަ ކަންކަމަކީ އިސްލާމް ދީނުގައި ނަހީ ކުރައްވާފައިވާ ކަންތައްތައް ކަމަށެވެ. ފެން ނުލިބޭ ހާލަތަށް އިޝާރާތްކޮށް ޚުތުބާގައި ބުނީ ފެން ނުލިބިގެން ނުވަތަ އެހެން ސަބަބަކާއި ހުރެ ވިޔަސް ހިނައިގަތުމަށާއި، ވުޟޫ ކުރުމަށް ފެން ބޭނުންކުރުމަށް ނުކުޅެދިގެންވާ މީހުން ވެސް ނަމާދު ކުރުމާއި، ތަވާފުކުރުމަށް ތާހިރުވުމަށް ދީނުގައި އަންގަވާފައިވާ ކަމަށެވެ. އެއީ ތަޔައްމުމު ކުރުން ކަމަށާއި، މިކަމުން އިސްލާމް ދީނުގައި ސާފުތާހިރު ކަމަށް ދެއްވާފައިވާ މުހިންމުކަން ދޭހަވާ ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ އިސްލާމްދީނުގައި ސާފުތާހިރުކަމުގެ ދާއިރާ ވަރަށް ފުޅާ ކަމަށާއި، މަގުމަތި ސާފުތާހިރުކޮށް ބެލެހެއްޓުމަކީ ވެސް އަޅުކަމެއް ކަމަށެވެ. އަދި ވަރަށް ބޮޑު ޒީނަތެއް ކަމަށާއި، މަގުމަތީގެ ސާފުތާހިރުކަމަކީ އެތައް ބަލިތަކަކުން މުޖުތަމައު ރައްކާތެރި ކޮށްދޭ ކަމެއް ކަމަށް ޚުތުބާގައި ބުނެފައިވެއެވެ. މަގުމަތިން ކުނިބުނި ނަގައި ސާފުކުރުމަކީ އިމާންކަމުގެ ތެރެއިންވާ ކަމެއްކަމަށް ޚުތުބާގައި ބުނެފައިވެއެވެ.