ޗެލްސީގެ ކެޕްޓަން ސެޒާ އަޒްޕިލިކުއޭޓާ އެ ކުލަބުގައި ކާމިޔާބު 11 އަހަރު ހޭދަކުރުމަށްފަހު، އެތުލެޓިކޯ މެޑްރިޑާއެކު އެއް އަހަރު ދުވަހުގެ އެއްބަސްވުމެއްގައި ސޮއިކޮށްފިއެވެ.

އުމުރުން 33 އަހަރުގެ ސްޕެއިންގެ ޑިފެންޑަރު ޗެލްސީ އާއެކު ލިބެން ހުރި ހުރިހާ ޝަރަފެއް ހޯދިއިރު އޭގެ ތެރޭގައި ޕްރިމިއާ ލީގުގެ ދެ ތަށި އަދި ޗެމްޕިއަންސް ލީގު ހިމެނެއެވެ. އޭނާ އެތުލެޓިކޯއަށް ސޮއިކުރިއިރު، ޗެލްސީއާއެކު ހަދާފައިވާ އެއްބަސްވުމުގައި ބާކީ އެއް އަހަރު އޮތެވެ.

ކުޑައިރުގެ ކުލަބު އޮސަސޫނާ އިން ކެރިއަރު ފެށި އަޒްޕިލިކުއޭޓާ ވަނީ 2012 ވަނަ އަހަރުގެ އޮގަސްޓް މަހު ޗެލްސީއަށް 6.5 މިލިއަން ޕައުންޑުގެ ބަދަލެއް ފުރިހަމަ ކުރުމުގެ ކުރިން މާސޭގައި ދެ އަހަރު ހޭދަކޮށްފައެވެ.

އޭނާ ވަނީ ޗެލްސީއަށް 508 މެޗު ކުޅެދީ، 17 ލަނޑު ޖަހައިދީފައެވެ. އަދި 2019 ވަނަ އަހަރު ގެރީ ކޭހިލް ވަކިވުމާއެކު ޓީމުގެ ކެޕްޓަންކަން ލިބުނީ އަޒްޕިލިކުއެޓާއަށެވެ. އޭނާ އަކީ ޕްރިމިއާ ލީގާއި އެފްއޭ ކަޕާއި ލީގު ކަޕާއި ޗެމްޕިއަންސް ލީގާއި ޔުއެފާ ސުޕަ ކަޕް އަދި ފީފާ ކްލަބް ވޯލްޑް ކަޕް ކާމިޔާބުކުރި އެންމެ ހަ ކުޅުންތެރިންގެ ތެރޭގައި ހިމެނިފައެވެ. އަދި އޭނާ ކަޕް ފައިނަލުގައި ކުޅުނު 13 މެޗަކީ ކްލަބް ރެކޯޑެކެވެ.

2022 ވަނަ އަހަރުގެ އޮގަސްޓް މަހު ޗެލްސީއާއެކު އައު ދެ އަހަރު ދުވަހުގެ އެއްބަސްވުމެއްގައި ސޮއިކުރުމުގެ ކުރިން ބާސެލޯނާއިންވެސް ވަނީ އޭނާ ހޯދުމަށް މަސައްކަތްކޮށްފައެވެ. އޭނާ ވެފައިވަނީ އާ ކޯޗު މައުރީސިއޯ ޕޮޗެޓީނޯގެ އިރުޝާދުގެ ދަށުން މި ހޫނު މޫސުމުގެ ތެރޭގައި ބާސެލޯނާ ދޫކޮށްލި އެންމެ ފަހުގެ ސީނިއާ ކުޅުންތެރިޔާއަށެވެ.

އައު ސީޒަނާ ދިމާކޮށް ޗެލްސީއިން ގިނަ ކުޅުންތެރިންތަކެއް ވަނީ ދޫކޮށްލާފައެވެ. އޭގެތެރޭގައި މޭސަން މައުންޓް، ކައި ހަވާޓްޒް، އެންގޯލޯ ކާންޓޭ، ކަލިދޫ ކުލިބާލީ، އެޑުއާޑް މެންޑީ އަދި މަޓެއޯ ކޮވަސިޗް ހިމެނެއެވެ.