އަސެންސިއޯ އަދި މިލާން ސްކްރިނިއާ ޕީއެސްޖީއަށް ސޮއިކޮށްފި

ޕެރިސް ސެއިންޓް ޖާމަން (ޕީއެސްޖީ)ން ރެއާލް މެޑްރިޑްގެ ތަރި މާކޯ އަސެންސިއޯ އަދި އިންޓަ މިލާންގެ ޑިފެންޑަރު މިލާން ސްކްރިނިއާ އާއެކު އެއްބަސްވުމުގައި ސޮއިކޮށްފިއެވެ.

ސްޕެއިންގެ އަސެންސިއޯއާއެކު ޕީއެސްޖީން ސޮއިކޮށްފައިވަނީ ތިން އަހަރު ދުވަހުގެ އެއްބަސްވުމެއްގައެވެ. އާރުސީޑީ މަޔޯކާގެ ޒުވާން ޓީމުން ކެރިއަރު ފެށި އަސެންސިއޯ ރެއާލް މެޑްރިޑަށް ބަދަލުވީ 2015 ވަނަ އަހަރުއެވެ. ރެއާލް މެޑްރިޑާ ގުޅުމަށްފަހު އޭނާ ފުރަތަމަ ލޯނު އުސޫލުން ބަދަލުވީ އެސްޕެންޔޯލަށެވެ. ކެޓަލޯނިއާގެ ކުލަބަށް ކުޅުނު 37 މެޗުން އޭނާ ވަނީ ހަތަރު ލަނޑު ޖަހާފައެވެ.

ރެއާލް މެޑްރިޑަށް ކުޅުނު ހަތް ސީޒަނުގައި އޭނާ ވަނީ ތިން ޗެމްޕިއަންސް ލީގު ހިމެނޭހެން ޖުމްލަ 16 ތަށި ކާމިޔާބުކޮށްފައެވެ. މީގެއިތުރުން 2016 ވަނަ އަހަރު އަސެންސިއޯ އަށް ވަނީ ސްޕެއިންގެ ގައުމީ ޓީމުންވެސް ޖާގަ ލިބިފައެވެ. އޭނާ ވަނީ ސްޕެއިން އާއެކު 2018 އަދި 2022 ވަނަ އަހަރުގެ ވޯލްޑް ކަޕް ކުޅެފައެވެ.

މީގެއިތުރުން ޕީއެސްޖީން ސްކްރިނިއާ ގެންދިޔައީ ހިލޭ ޓްރާންސްފަރ އެއްގައި ފަސް އަހަރުގެ އެއްބަސްވުމެއްގެ ދަށުންނެވެ.

ސްލޮވޭކިއާގެ އިންޓަނޭޝަނަލް ކުޅުންތެރިޔާ އިންޓަ އަށް ފަސް އަހަރު ކުޅެފައިވާއިރު، އޭނާ ވަނީ އިންޓަ އާއެކު 2020-21 ވަނަ އަހަރުގެ ސީޒަންގައި އިޓާލިއަން ލީގުގެ ޗެމްޕިއަންކަން ހޯދާފައެވެ.

ޕީއެސްޖީން ސްކްރިނިއާގެ ސޮއި ހޯދީ އިނގިރޭސި ޕްރިމިއާ ލީގުގެ ޓޮޓެންހަމް ހޮޓްސްޕާސް އާއި ލިވަޕޫލުން ވެސް އެ ކުޅުންތެރިޔާއަށް ޝައުގުވެރިވާ ކަމަށް ރިޕޯޓްތައް ބުނަމުން ދިޔަ ދަނޑިވަޅެއްގައެވެ.

ޕީއެސްޖީން މި ދެ ކުޅުންތެރިންގެ ސޮއި ހޯދީ، އައު ކޯޗު ލުއިސް އެންރީކޭ އާއެކު ސޮއިކުރިތާ އެއް ދުވަސް ފަހުންނެވެ.