މިހާރު ރާއްޖޭގެ އެސްއޯއީގެ ނެޓް ވޯރތު 178 ބިލިއަން ރުފިޔާއަށް އަރާ - ޕީސީބީ
6 ޖުލައި 2023 | ބުރާސްފަތި 17:58ކުންފުނިތައް ހިންގުން ހަރުދަނާކުރުމަށް އަބަދުވެސް ޕީސީބީން ބާރުއަޅާކަމަށް އޭނާ ވަނީ ވިދާޅުވެފައި
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގެ ނައިބު ރައީސް މުހައްމަދު ފިރާޒް
މިހާރު ރާއްޖޭގެ ސްޓޭޓް އޯންޑް އެންޓަރޕްރައިޒަސް (އެސްސޯއީ) ސެކްޓަރގެ އެސެޓް ވެލޫ ނުވަތަ ނެޓްވޯރތު، 178 ބިލިއަން ރުފިޔާއަށް އަރާކަމަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގެ ނައިބު ރައީސް، މުހައްމަދު ފިރާޒް ވިދާޅުވެއްޖެއެވެ.
އޭނާ އެފަަދައިން ވިދާޅުވީ ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުންނެވެ. އޭނާ ވިދާޅުވީ އެސްއޯއީގެ އެސެޓް ވެލޫގެ ޖުމްލަ އަދަދަކީ ރާއްޖޭގެ ބަޖެޓަށްވުރެ 4-5 ގުނަ އިތުރު އަދަދެއް ކަމަށެވެ. ކުރިއާ އަޅައިބަލާއިރު ކުންފުނިތަކުގެ ހިންގުން ރަނގަޅުކަމަށާއި، އެ ދާއިރާއިން ދަނީ ދުވަހަކަށްވުރެ ދުވަހެއް ބޮޑެތި ކުރިއެރުންތައް ލިބެމުން ކަމަށް އޭނާ ވިދާޅުވިއެވެ. ކުންފުނިތަކުގެ އާމްދަނީއާއި ކުންފުނިތަކުގެ އަހަރީ ރިޕޯޓްތަކަށް ބަލާލުމުން ކުންފުނިތަކަށް ކުރިއެރުން ލިބޭކަން އެނގިގެންދާކަމަށް އޭނާ ވިދާޅުވިއެވެ. އެސެޓް ވެލޫ ނުވަތަ އެސެޓްގެ އަގު ދުވަހަކަށްވުރެ ދުވަހެއް އިތުރުވަމުންދާ ކަމަށް ފިރާޒް ވިދާޅުވިއެވެ. ކުންފުނިތައް ހިންގުން ހަރުދަނާކުރުމަށް އަބަދުވެސް ޕީސީބީން ބާރުއަޅާކަމަށް އޭނާ ވަނީ ވިދާޅުވެފައެވެ.
ޕީސީބީން މަސައްކަތް ކުރަނީ މިނިވަން ކަމާއެކު ކަމަށާ އެއްވެސް ވެރިއެއްގެ އެއްވެސް ވަރެއްގެ ނުފޫޒެއް ނެތްކަމަށް އޭނާ ވަނީ ވިދާޅުވެފައެވެ. ޕީސީބީގެ ބޯޑާއި އެހެން މެމްބަރުންވެސް މަސައްކަތް ކުރަމުންދަނީ ގާނޫނާއި ގަވާއިދާ އެއްގޮތަށް ކަމަށާއި، އެންމެންވެސް މަސައްކަތްކުރަނީ އެއް އަމާޒަކަށް ކަމަށް ފިރާޒް ވިދާޅުވިއެވެ. އޭނާ ވިދާޅުވީ އެ ބޯޑުގެ ކޮންމެ ބޭފުޅަކީވެސް އެ ބޭފުޅެއްގެ ދާއިރާގައި ފުންނާބު އުސް ގާބިލް ބޭފުޅުން ކަމަށެވެ. އެންމެން އެކުގައި މަަސައްކަތްކުރަނީ ކުޅަދާނަ ޓީމަކާއެކު ޕްރޮފެޝަނަލް ހަމަަތަކުގެ މަތިން ކަމަށް އޭނާ ވިދާޅުވިއެވެ. އެގޮތުން ކުންފުނިތަކުގެ ހިންގުން ރަނގަޅުކޮށް ހަރުދަނާކުރުމަކީ އެންމެންގެ އަމާޒުކަމަށް އޭނާ ވިދާޅުވިއެވެ.
ކުންފުނިތަކުގެ ކަންކަން ހިންގުން މޮނިޓަރކުރުމުގެ މާނައަކީ ނުވަތަ ބޭނުމަކީ އަދަބު ދިނުން ނޫންކަމަށާއި އެކަމުގެ މަގުސަދަކަށް ވެގެންދާން ވާނީ ކުންފުނިތައް ހަރުދަނާކަމާއެކު ހިންގުން ކަމަށް އޭނާ ވަނީ ވިދާޅުވެފައެވެ. ކުންފުނިތަކާއެކު ޕީސީބީން މަސައްކަތްކުރަނީ ގާތުން މަސައްކަތްކޮށް، އެ ކުންފުނިތަކުގެ ހިންގުން ހަރުދަނާ ނިޒާމެއްގެ ތެރެއިން ގާއިމްކުރާކަން ޔަގީންކުރުމަށް ކަމަށް ފިރާޒް ވިދާޅުވިއެވެ. ފިރާޒް ވިދާޅުވީ ކުންފުނިތަކަށް މިއަދަށްވުރެ ރަނގަޅު ގޮތެއް ހޯދައިދިނުމަށް ޕީސީބީން އަބަދުވެސް މަސައްކަތްކުރާކަމަށެވެ.
