ހައުސިންގ މަޝްރޫއުތައް ކުރިއަށްގެންދަނީ ހުރިހާ ރައްޔިތުންނަށް ބޯހިޔާވަހިކަން ލިބޭ ގޮތަށް: މިނިސްޓަރު އަސްލަމް
6 ޖުލައި 2023 | ބުރާސްފަތި 14:16ހައުސިންގ މަޝްރޫއުތަކަށް ޑިމާންޑް އެބައޮތް
މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް
މި ސަރުކާރުން ހައުސިން މަޝްރޫއުތައް ކުރިއަށް ގެންދަނީ ހުރިހާ ރައްޔިތުންނަށް ބޯހިޔާވަހިކަން ލިބޭ ގޮތަށް ކަމަށް, މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
''ވަން ސެންޓްރަލް ޕާކް ރެޒިޑެންޝަލް ބިލްޑިންގ'' މަޝްރޫއު ނިންމައި، އެޕާޓްމެންޓްތައް ގަތް މީހުންނާ ތަޅުދަނޑި ހަވާލުކުރުމަށް ބުރާސްފަތި ދުވަހު ހަވީރު ބޭއްވި ޚާއްސަ ރަސްމިއްޔާތުގައި ވާހަކަފުޅުދައްކަވަމުން މިނިސްޓަރު ވިދާޅުވީ، މި މަޝްރޫއަކީ 2010 ވަނަ އަހަރުގެ ތެރޭގައި ސޮއިކުރެވުނު މަޝްރޫއެއް ކަމަށާއި، މިމަޝްރޫއުގެ މަސައްކަތް ފެށުނީ މިސަރުކާރުގައި ކަމަށެވެ. އަދި މީގެ ދެއަހަރުގެ ކުރިން މި މަޝްރޫއުގެ ބިންގާއެޅި، އަމަލީ މަސައްކަތްތައް ބާރު ސްޕީޑްގައި ކުރިއަށްދިޔަކަން މިނިސްޓަރު ފާހަގަކުރެއްވިއެވެ.
މިނިސްޓަރު ވިދާޅުވީ، ސަރުކާރުން ދެކޭ ގޮތުގައި މުޖުތަމައުއެއް ބިނާ ވެފައި އޮންނަނީ އެއްގިންތިއަކަށް އެއްވަރަކަށް އާމްދަނީ ލިބޭ ރައްޔިތުންގެ މައްޗަކަށް ނޫން ކަމަށެވެ. އަދި ރާއްޖެއަކީ މެދުފަންތީގެ އާމްދަނީ ލިބޭ ގައުމެއް ކަމަށް މިނިސްޓަރު އަސްލަމް ވިދާޅުވިއެވެ. މިއީ އެކި ގިންތިތަކަށް ބެހިފައިވާ އާއްމު ރައްޔިތުން ދިރިއުޅޭ ގައުމަކަށްވާއިރު، ހުރިހާ ރައްޔިތުންނަށް ބޯހިޔާވަހިކަން ލިބޭ ގޮތަށް މަޝްރޫއުތައް ކުރިއަށް ގެންދަންޖެހޭ ކަމަށް މިނިސްޓަރު އަސްލަމް ވިދާޅުވިއެވެ.
ހައުސިން މަޝްރޫއުތަކަށް ޑިމާންޑް އޮތްކަން ފާހަގަކުރައްވައި މިނިސްޓަރު އަސްލަމް ވިދާޅުވީ ސަރުކާރުގެ ހައުސިންގ މަޝްރޫއުތައް ކުރިއަށް ގެންދާއިރު ހުރިހާ ފަންތިތަކަށް ޚާއްސަކުރާ ކަމަށެވެ. އެގޮތުން ސޯޝަލް ހައުސިންގއިން ފެށިގެން އެންމެ މަތީ ފެންވަރަށް ހައުސިންގ މަޝްރޫއުތައް ކުރިއަށް ގެންދާނެކަމަށް މިނިސްޓަރު އަސްލަމް ވިދާޅުވިއެވެ.
މިނިސްޓަރު އަސްލަމް ވިދާޅުވީ މަސައްކަތް ކުރަމުންދަނީ ވަކި ޕްލޭނެއްގެ ދަށުން ކަމަށާއި، މިސަރުކާރުގެ ޚާއްސަ ތަސައްވުރެއް އެބައޮތް ކަމަށެވެ. ބޯހިޔާވަހިކަމަށް ދިމާވެފައިވާ މައްސަލަ ހައްލުކުރުމަށް ބިމުގެ އިތުރުން ފްލެޓް ދޭނެކަމަށާއި، މާލޭގައި ދިރިއުޅޭ ރައްޔިތުންގެ ތަކުލީފުތަކަށް ލުއިތައް ގެނެސްދޭނެ ކަމަށް މިނިސްޓަރު އަސްލަމް ވިދާޅުވިއެވެ.
