21 އަހަރުން ދަށުގެ ޔޫރޯ: ފައިނަލުގައި އިންގްލެންޑާއި ސްޕެއިންގެ ކުރިމަތިލުމެއް
6 ޖުލައި 2023 | ބުރާސްފަތި 13:17ފައިނަލް މެޗު ކުޅުމަށް ހަމަޖެހިފައިވަނީ ހޮނިހިރު ދުވަހު
އިންގްލެންޑާއި އިސްރާއީލް ބައްދަލުކުރި މެޗުގެ ތެރެއިން
21 އަހަރުން ދަށުގެ ޔޫރޯގެ ފައިނަލަށް އިންގްލެންޑާއި ސްޕެއިން ދަތުރުކޮށްފިއެވެ.
ފައިނަލުގެ ޖާގަ އިންގްލެންޑުން ކަށަވަރުކުރީ ސެމީ ފައިނަލުގައި 3-0ން އިސްރާއީލް ބަލިކުރުމަށްފަހުއެވެ. މެޗުގެ ފުރަަތަމަ ހާފު ނިމެން ތިން މިނެޓަށް ވެފައި ވަނިކޮށް ކޯލް ޕާމަރ ނަގައިދިން ހުރަހަކުން, ނޮޓިންހަމް ފޮރެސްޓްގެ މިޑްފީލްޑަރު މޯގަން ގިބްސް-ވައިޓް ވަނީ އިންގްލެންޑަށް ލީޑު ނަގައިދީފައެވެ.
މެޗުގެ 63 ވަނަ މިނެޓުގައި މެންޗެސްޓަރ ސިޓީގެ ޕާމަރ ވަނީ އިތުރު ލަނޑެއް ޖަހައި، އިންގްލެންޑަށް ލީޑު ފުޅާކޮށްދީފައެވެ. އޭގެފަހުން ބަދަލު ކުޅުންތެރިއެއްގެ ގޮތުގައި ކުޅެން ނުކުތް ކެމަރަން އާޗާ ވަނީ މެޗުގެ 90 ވަނަ މިނެޓުގައި ޕެނަލްޓީ ބޮކްސްގެ މެދުތެރެއިން ފޮނުވާލި ބާރު ހަމަލާއަކާއެކު އިންގްލެންޑުގެ ތިންވަނަ ލަނޑު ކާމިޔާބު ކޮށްދީފައެވެ.
ކުއާޓަރ ފައިނަލުގައި ޕެނަލްޓީ ޖަހައިގެން މުބާރާތުގެ ކޯ ހޯސްޓް ޖޯޖިއާ ބަލިކުރި އިޒްރޭލަށް، މީގެ ކުރިން 21 އަހަރުން ދަށުގެ ޝަރަފުވެރި މުބާރާތުގެ ގްރޫޕް ސްޓޭޖަށްވުރެ ކުރިޔަށް ދެވިފައެއް ނުވެއެވެ.
ދެވަނަ ސެމީގައި ސްޕެއިން ވަނީ 5-1ން ޔޫކްރެއިން ބަލިކޮށްފައެވެ. 13 ވަނަ މިނެޓުގައި ފުރަތަމަ ލީޑު ނެގީ ޔުކްރެއިން އިންނެވެ. ޗެލްސީގެ މުޑްރިކް ތަނަވަސްކޮށްދިން ފުރުސަތަކުން އެ ލަނޑު ކާމިޔާބުކޮށްދިނީ ބޮންޑަރެންކޯއެވެ. ނަމަވެސް އޭގެ ހަތަރު މިނެޓު ފަހުން އެބެލް ރުއިޒް ވަނީ ސްޕެއިންއަށް ނަތީޖާ ހަމަހަމަ ކޮށްދީފައެވެ. އަދި މެޗުގެ 24 ވަނަ މިނެޓުގައި ސަންކެޓް ވަނީ ލަނޑެއް ޖަހައި، ސްޕެއިންއަށް ފުރަތަމަ ފަހަރަށް ކުރިހޯދަދީފައެވެ.
ދެވަނަ ހާފު ފެށިގެން ނުވަ މިނެޓު ތެރޭގައި ސްޕެއިންގެ ތިންވަނަ ލަނޑު ޖަހައިދިނީ ބްލެންކޯއެވެ. އޭގެފަހުން، އެ ޓީމުގެ ހަތަރުވަނަ ލަނޑާއި ފަސްވަނަ ލަނޑު ޖަހައިދިނީ އޮރާޒްއާއި ސާޖިއޯ ގޮމޭޒްއެވެ.
1982 އާއި 1984ގެ މުބާރާތް ކާމިޔާބުކޮށްފައިވަނީ އިންގްލެންޑެވެ. އޭގެ ފަހުން އެ ޓީމަށް މުބާރާތް ކާމިޔާބުކުރެވިފައެއް ނުވެއެވެ. ސްޕެއިން ވަނީ އެންމެ ފަހުން ބޭއްވި ހަ މުބާރާތުގަ ތެރެއިން ތިން މުބާރާތް ކާމިޔާބުކޮށްފައެވެ. އެ ޓީމުން ވަނީ މިއަހަރުގެ މުބާރާތުގައި ކުޅުނު ފަސް މެޗުގައި 13 ލަނޑު ޖަހާފައެވެ.
21 އަހަރުން ދަށުގެ ޔޫރޯގެ ފައިނަލް މެޗު ކުޅުމަށް ހަމަޖެހިފައިވަނީ ހޮނިހިރު ދުވަހު، ޖޯޖިއާގެ ބަޓުމީގައެވެ.
