ރަޝިޔާގެ އެތެރޭގައި ހަމަޖެހުން އޮތްކަމުގެ ޔަގީންކަން ޕުޓިން ދެއްވައިފި
6 ޖުލައި 2023 | ބުރާސްފަތި 02:13ރަޝިޔާގެ ރައްޔިތުން މިއިން ދުވަހަކު އެއްބައިނުވާ މިންވަރަށް އެއްބައިވެފައިވާކަމަށް ވިދާޅުވި
ރަޝިޔާގެ ރައީސް ވްލަޑްމިއަރ ޕުޓިން އެސްސީއޯ ބައްދަލުވުމުގައި ބައިވެރިވެވަޑައިގެންނަވަނީ
ރަޝިޔާގެ ކުލީ ސިފައިންގެ ގްރޫޕްކަމަށްވާ ވެގްނަރ ގްރޫޕުން ހިންގި އަސްކަރީ ނާކާމިޔާބު ހަރަކާތާއެކުވެސް ރަޝިޔާގެ އެތެރޭގައި ހަމަޖެހުން އޮތްކަމުގެ ޔަގީންކަން އެގައުމުގެ ރައީސް ވްލަޑްމިއަރ ޕުޓިން ދެއްވައިފިއެވެ.
ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ)ގެ ބައްދަލުވުމުގައި ވަރޗުއަލްކޮށް ބައިވެރިވެވަޑައިގެން ވާހަކަފުޅު ދައްކަވަމުން ޕުޓިން ވަނީ އޭޝިޔާގެ ގައުމުތަކުގެ ވެރިންނަށް ރަޝިޔާގެ އެތެރޭގައި ހަމަޖެހުން އޮތްކަަމަށާއި ރަޝިޔާގެ ރައްޔިތުން މިއިން ދުވަހަކު އެއްބައިނުވާ މިންވަރަށް އެއްބައިވެފައިކަމަށް ވިދާޅުވެފައެވެ.
ޔޫރޭސިއަންގެ ގައުމުތަކުގެ ތެރޭގައި ޗައިނާ އާއި އިންޑިޔާ ހިމެނޭއިރު މި ގްރޫޕުން އެންމެ ބޮޑަށް އިސްކަންދޭ ކަންތައްތަކުގެ ތެރޭގައި ބައިނަލްއަގްވާމީ ސަލާމަތާއި، ދިފާއީ ކަންކަމާއި އިގްތިޞާދީ އަދި ސިޔާސީ ކަންކަން ހިމެނެއެވެ.
ޕުޓިން ވިދާޅުވީ އަސްކަރިއްޔާ އާ ދެކޮޅަށް ބަޔަކު ހަތިޔާރާއެކު ތެދުވުމުން ރަޝިޔާގެ ސިޔާސީ ފަރާތްތަކާއި ރައްޔިތުން ވަނީ އެކުވެރިކަމާއި އެއްބައިވަންތަކަން ކުރިއަށްނެރިފައި ކަމަށެވެ. ޕުޓިން ވަނީ ރަޝިޔާގެ ގާނޫނީ ވެރިކަން ދަމަހައްޓާ ރައްޔިތުންގެ ސަލާމަތާއި ރައްކާތެރިކަމަށް ޕުޓިން ކުރެއްވި މަސައްކަތްޕުޅަށް އެސްސީއޯގެ މެންބަރު ގައުމުތަކުން ތާއީދުކުރިކަމަށްޓަކައި އެގައުމުތަކަށް ޝުކުރު އަދާކުރައްވާފައެވެ.
ޕުޓިން އިތުރަށް ވިދާޅުވީ ހުޅަނގުގެ ޕްރެޝަރާއި ދަތިކުރުމުގެ ފިޔަވަޅުތަކާއި ދެކޮޅަށް ރަޝިޔާ ތެދުވާނެކަމަށެވެ. އަދި އެސްސީއޯގެ މެންބަރު ގައުމުތަކާއެކު އިގްތިޞާދީ ގުޅުން އިތުރަށް ވަރުގަދަ ކުރެއްވުމަށް އެދިވަޑައިގެންނެވިއެވެ.
