ނެދަލެންޑްސް މެރިޓައިމް ޔުނިވަރސިޓީ ކޮލެޖާ ގުޅިގެން އެމްޕީއެލްގެ މުވައްޒަފުން ތަމްރީން ކުރަނީ
5 ޖުލައި 2023 | ބުދަ 10:06އެއްބަސްވުމުގެ ދަށުން މެރިޓައިމް ދާއިރާ ތަރައްގީ ކުރުމަށާއި ރާއްޖޭގެ މެރިޓައިމް ވިޔަފާރި ކުރިއެރުވުމަށް ރިސާޗް ޕްރޮގްރާމްތައް ހިންގާނެ
އެމްޕީއެލް އާއި އެންއެމްޔޫސީ އާ ދެމެދު އެއްބަސްވުމުގައި ސޮއި ކުރުން
މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ މުވައްޒަފުން ތަމްރީން ކުރުމަށް ނެދަލެންޑްސް މެރިޓައިމް ޔުނިވަރސިޓީ ކޮލެޖް (އެންއެމްޔޫސީ) އާއެކު އެމްއޯޔޫއެއްގައި ސޮއި ކޮށްފިއެވެ.
ބުދަ ދުވަހު ބޭއްވި ރަސްމިއްޔާތެއްގައި މި އެއްބަސްވުމުގައި އެމްޕީއެލްގެ ފަރާތުން ސޮއި ކުރެއްވީ އެ ކުންފުނީގެ ސީއީއޯ ޝާހިދު އަލީއެވެ. އަދި އެމްއެންޔޫސީގެ ފަރާތުން ސޮއި ކުރެއްވީ އެ އިންސްޓިޓިއުޓްގެ އެގްޒެކެޓިވް ޗެއަރމަން ދާޓޯ ކެޕްޓަން ރަޒާލީ ޔާކޮބްއެވެ.
އެމްޕީއެލްގެ ސީއީއޯ ޝާހިދު އަލީ ވިދާޅުވި ގޮތުގައި މި އެމްއޯޔޫއަކީ އެމްޕީއެލް އާއި އެންއެމްޔޫސީ ގުޅިގެން މަސައްކަތް ކުރެވެން ހުރި ދާއިރާތައް ބަލައި އެ ދާއިރާތަކުން ގުޅިގެން މަސައްކަތް ކުރުމަށް ވެވުނު އެއްބަސްވުމެއް ކަމަށެވެ. އެގޮތުން، މި އެއްބަސްވުމުގެ ދަށުން އެމްޕީއެލްގެ މުވައްޒަފުން ތަމްރީންކުރުމަށް މަތީ ތައުލީމުގެ ފުރުސަތު ފަހިވެގެންދާނެ ކަމަށް އޭނާ ވިދާޅުވިއެވެ.
ޝާހިދު ވިދާޅުވީ އެންއެމްޔޫސީ އަކީ މެރިޓައިމް ދާއިރާއަށް ހާއްސަ އިންސްޓިޓިއުޓެއް ކަމަށާއި ފައުންޑޭޝަން ޕްރޮގްރާމުތަކުން ފެށިގެން ކޮލެޖް ޑިގްރީ އަދި މާސްޓާސްއަށް ކިޔެވުމުގެ ފުރުސަތު ވެސް އެމްޕީއެލްގެ މުވައްޒަފުންނަށް ފަހިވެގެންދާނެ ކަމަށެވެ. މިއީ މުވައްޒަފުންނަށް ލިބިގެންދާނެ ވަރަށް ބޮޑު ކުރިއެރުމެއް ކަމަށާއި އެމްޕީއެލްއަށް ވެސް މީގެ ސަބަބުން ކުރިއެރުން ލިބިގެންދާނެ ކަމަށެވެ.
މީގެ އިތުރުން އެމްޕީއެލްގެ ޓްރެއިނިން ޕްރޮގްރާމުގައި ޖޫނިއާ ލެވެލްއިން ފެށިގެން މުވައްޒަފުން ތަމްރީން ކުރަމުން އަންނަކަން ފާހަގަކުރައްވައި ޝާހިދު ވިދާޅުވީ ޑިގްރީއަށް ކިޔެވުމަށް ކޮންމެ އަހަރަކު ހަ ކުދިން ފޮނުވާނެ ކަމަށެވެ.
މި އެއްބަސްވުމުގެ ދަށުން މެރިޓައިމް ދާއިރާ ތަރައްގީ ކުރުމަށާއި ރާއްޖޭގެ މެރިޓައިމް ވިޔަފާރި ކުރިއެރުވުމަށް ރިސާޗް ޕްރޮގްރާމްތައް ހިންގުމަށް އެމްޕީއެލް އާއި އެންއެމްޔޫސީ ގުޅިގެން މަސައްކަތް ކުރާނެއެވެ. މި ދިރާސާތަކަށް ޚަރަދު ކުރުމަށް ހަމަޖެހިފައިވަނީ ދެ ފަރާތުން ގުޅިގެން ކަމަށް ޝާހިދު ވިދާޅުވިއެވެ.
އެންއެމްޔޫސީގެ ޗެއަރމަން ދާޓޯ ކެޕްޓަން ރަޒާލީ ވިދާޅުވީ މިއަދަކީ "ބަދަހި ގުޅުމެއްގެ ފެށުން" ކަމަށެވެ. އަދި މެލޭޝިއާގައި ހުރީ ވަރަށް ފެންވަރު ރަނގަޅު ޕޯޓުތައް ކަމަށާއި ޕޯޓްގެ ދާއިރާގައި ލިބިފައިވާ އަމަލީ ތަޖުރިބާގެ އިތުރުން، ޔުނިވަރސިޓީ އިން ތަޢުލީމް ހާސިލްކުރާ ފަރާތްތަކަށް މަސައްކަތުގެ އަމަލީ ތަޖުރިބާތައް ލިބޭނެ ކަމަށެވެ.
ނެދަލޭންޑްސް މެރިޓައިމް ޔުނިވަރސިޓީ ކޮލެޖަކީ މެރިޓައިމްގެ އެކި ދާއިރާތަކުގެ ތަޢުލީމާއި ތަމްރީނު އަދި ކޮންސަލްޓަންސީ ފޯރުކޮށްދޭ މެލޭޝިއާގެ ޔުނިވަރސިޓީއެކެވެ. މި ޔުނިވަރސިޓީގެ މައި ކެމްޕަސް ހުންނަނީ މެލޭޝިއާގެ ޖޮހޯރުގައެވެ.
