އައްޑޫ އިންޓަރނޭޝަނަލް އެއަރޕޯޓުގެ ޑިރެކްޓަރުންގެ ބޯޑަށް މެމްބަރަކު އައްޔަންކުރައްވައިފި

އައްޑޫ އިންޓަރނޭޝަނަލް އެއަރޕޯޓު ޕްރައިވެޓް ލިމިޓެޑުގެ ޑިރެކްޓަރުންގެ ބޯޑުގެ މެމްބަރުކަމުގެ މަގާމަށް ސ. ފޭދޫ/ ނޫކޮކާގެ ޝާތިފް އަލީ އައްޔަންކުރައްވައިފިއެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން ބުނީ މި މަގާމަށް ޝާތިފް އަލީ އައްޔަން ކުރައްވާފައިވަނީ ދައުލަތުގެ ވިޔަފާރި ތަންތަން ޕްރައިވެޓައިޒްކުރުމާއި ކޯޕަރަޓައިޒްކުރުމާއި އަދި މޮނިޓަރކޮށް އިވެލުއޭޓްކުރުމުގެ ގާނޫނުގެ 12 ވަނަ މާއްދާގެ (ޒ)ގެ 2 ގެ ދަށުން ކަމަށެވެ.

ޝާތިފް އަލީ އެ މަގާމަށް އައްޔަންކުރިކަމުގެ ލިޔުން ހަވާލުކުރެއްވީ ޕީސީބީގެ ރައީސް އާސިމް މުހައްމަދެވެ.

މިކަމަށް ބޭއްވި ރަސްމިއްޔާތުގައި ޕީސީބީން ވަނީ ޕީސީބީގެ ގާނޫނާއި ކޯޕަރޭޓް ގަވަރނަންސް ކޯޑާ ގުޅޭ މައުލޫމާތު ހިއްސާކޮށް، އެ އިދާރާއިން ކުރިއަށްގެންދިޔަ އައްޑޫ އިންޓަރނޭޝަނަލް އެއަރޕޯޓުގެ ފައިނޭންޝަލް އަދި ގަވަރނަންސް ރިވިއުތަކުން ފާހަގަވެފައިވާ ކަންކަން އިސްލާހުކުރުމަށް އެދިފައެވެ. އަދި ކުންފުނި ހިންގުމަށް ދިމާވެފައިވާ ގޮންޖެހުންތަކާ ގުޅޭގޮތުން މަޝްވަރާކޮށްފައިވެއެވެ.

ޝާތިފް އަލީ ވަނީ އޮސްޓްރޭލިއަން ނެޝަނަލް ޔުނިވަރސިޓީން މާސްޓަރ އޮފް މެނޭޖްމެންޓް ހާސިލްކުރައްވާފައެވެ. ޝާތިފް މީގެ ކުރިން ވަނީ އެމްއެންޔޫގެ ފެކަލްޓީ އޮފް މެނޭޖްމެންޓް އެންޑް ކޮމްނޕިއުޓިންގެ ޑީންގެ މަގާމާއި، ވެމްކޯގެ ބިޒްނަސް ޑިވެލޮޕްމެންޓް އެންޑް މާކެޓިން ޑިޕާޓްމެންޓުގެ ޖެނެރަލް މެނޭޖަރުގެ މަގާމު އަދާކުރައްވާފައެވެ.