ޕީސީބީގެ ރައީސްކަމަށް އަނަސް އައްޔަންކުރުމުގެ މައްސަލަ މަޖިލީހުގެ ކޮމިޓީ އަށް ފޮނުވައިފި
ޕީސީބީގެ ރައީސް ކަމަށް އަލަށް އައްޔަންކުރި އަނަސް އަކީ އެމްއެންޔޫ އިން މާސްޓަރ އޮފް ބިޒްނަސް އެޑްމިނިސްޓްރޭޝަން ހާސިލުކުރައްވާފައިވާ ބޭފުޅެއް
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގެ ރައީސްގެ މަގާމަށް އަައްޔަން ކުރި މުހައްމަދު އަނަސް
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ރައީސްގެ މަގާމަށް އައްޔަންކުރައްވާފައިވާ ފިނޭންސްގެ ކުރީގެ ޑެޕިއުޓީ މިނިސްޓަރު މުހައްމަދު އަނަސް އައްޔަންކުރުމުގެ މައްސަލަ މަޖިލީހުގެ ކޮމިޓީ އަށް ފޮނުވައިފި އެވެ.
އޭނާ އެ މަޤާމަށް އައްޔަން ކުުރުމަށް ރުހުން ހޯދުމަށް ރައީސް ފޮނުއްވާފައިވާ ސިޓީ ހޯމަ ދުވަހު މަޖިލީހަށް ވަނީ އިއްވާފައެވެ. އޭނާ އެ މަޤާމަށް އައްޔަންކުރުމުގެ މައްސަލަ ފޮނުވާފައި ވަނީ ސްޓޭޓް އޯންޑް އެންޓަރޕްރައިސިސް (އެސްއޯއީ) ކޮމިޓީއަށެވެ.
ރައީސް ޑރ. މުހައްމަދު މުއިއްޒު، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ރައީސްގެ މަގާމަށް އަނަސް އައްޔަން ކުރެއްވިކަން ރައީސް އޮފީހުން ހާމަކުރީ މާރޗް 13 ވަނަ ދުވަހުއެވެ.
ޕީސީބީގެ އުފައްދާފައި ވަނީ ދައުލަތުގެ ވިޔަފާރި ތަންތަން ޕްރައިވެޓައިޒް ކުރުމާއި ކޯޕަރަޓައިޒް ކުރުމާއި މޮނިޓަކުރުމަށާއި، އިވެލުއޭޓް ކުރުމުގެ ގާނޫނުގެ ދަށުންނެވެ. ޕީސީބީއަށް ރައީސަކަށް އަނަސް އައްޔަންކޮށްފައި މި ވަނީ އެ މަގާމު ހުސްކޮށް އޮންނަތާ މަހެއް ހާ ދުވަސް ފަހުންނެވެ.
އެ މަޤާމް ހުސްވެފައި ވަނީ ފެބްރުއަރީ 13އިގައެވެ. އެ މަގާމު ހުސްވީ ޕީސީބީގެ ރައީސްކަމުގައި ހުންނެވި ހަމްދީ އަގީލް މަގާމުން ވަކިކުރުމާއި ގުޅިގެންނެވެ.
ރައީސް މުއިއްޒު އޭނާ ވަކިކުރެއްވި ކުރެއްވި ސަބަބެއް މިހާތަނަށް ހާމަކޮށްފައެއް ނުވެ އެވެ. ނަމަވެސް ހަމްދީ ވަކިކުރަން ނިންމެވީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އާ ދެމެދު އޮތް ގާތް ގުޅުމުގެ ސަބަބުން ކަމަށް އަޑު ފެތުރުނެވެ.
ރައީސް އާއި އަބްދުއްރަހީމް ގެ ދެމެދުގައި އުފެދުނު ސިޔާސީ ނުތަނަވަސްކަމުގެ ތެރެއިން ސަރުކާރުގެ އެކި މަގާމުތަކާއި ސަރުކާރު ކުންފުނިތަކުގެ އިސް މީހުންގެ ތެރެއިން އަބްދުއްރަހީމް އާ ގުޅުންހުރި ގިނަ ބަޔަކު އޭރު ރައީސް މުއިއްޒު ވަނީ ވަކިކުރައްވާފަ އެވެ.
ޕީސީބީގެ ރައީސް ކަމަށް އަލަށް އައްޔަންކުރި އަނަސް ވަނީ އެމްއެންޔޫ އިން މާސްޓަރ އޮފް ބިޒްނަސް އެޑްމިނިސްޓްރޭޝަން ހާސިލުކުރައްވާފައެވެ. ފިނޭންސްގެ ނައިބުކަމާއި، އެޗްޑީސީގެ މެނޭޖަރުކަމާއި މޯލްޑިވްސް ބިޒްނަސް ސްކޫލުގެ އެސޯސިއޭޓް ޕްރޮފެސާކަން އޭނާ ވަނީ އަދާ ކުރައްވާފައިވެ އެވެ.
