ޝަޚްތަރު ޑޮނެސްކްގެ މަނޯ ސޮލޮމަން ޓޮޓެންހަމްއަށް

ޝަޚްތަރު ޑޮނެސްކްގެ މަނޯ ސޮލޮމަން ގެނައުމަށް ޓޮޓެންހަމުން އެއްބަސްވުމަކަށް އާދެވިއްޖެއެވެ.

ސްޕާސްއާއެކު ހަދާފައިވާ އެއްބަސްވުމުގައި ސޮއިކުރުމުގެ ކުރިން އުމުރުން 23 އަހަރުގެ ކުޅުންތެރިޔާ މި ހަފުތާގައި މެޑިކަލް ހަދަން ވަނީ ނިންމާފައެވެ.

މިދިޔަ ސީޒަނުގައި ފުލަމްގައި ހުރިއިރު، އޭނާ ވަނީ 24 މެޗުގައި ފަސް ލަނޑު ޖަހާފައެވެ. އޭނާގެ ކުޅުމާމެދު ހިތްހަމަޖެހި، ފުލަމްގެ ކޯޗު މާކޯ ސިލްވާ ވަނީ އޭނާ ހިފަހައްޓަން ވަރަށް ބޮޑަށް ޝައުގުވެރިވެފައެވެ. އޭނާ ފުލަމްއާ ގުޅުނީ ޔޫކްރެއިންގައި ދިރިއުޅޭ އެހެން ގައުމުތަކުގެ ކުޅުންތެރިންގެ ކޮންޓްރެކްޓް ސަސްޕެންޑް ކުރެވޭ ގޮތަށް ފީފާއިން ހެދި އުސޫލެއްގެ ދަށުން، ޝަޚްތަރު ޑޮނެސްކުން ލޯނު އެއްބަސްވުމެއްގެ ދަށުންނެވެ. މި އުސޫލަކީ ރަޝިއާ ހަނގުރާމައާ ގުޅިގެން ފީފާއިން ތައާރަފްކުރި އުސޫލެކެވެ.

ފުލަމްގައި ލޯނު މުއްދަތު ހަމަކުރުމަށްފަހު ސޮލޮމަން އެނބުރި އޭނާގެ ބެލެނިވެރި ކުލަބު ޝަޚްތަރަށް ދިޔަނަމަވެސް ސްޕާސްއާ ގުޅެނީ ދާއިމީ އެއްބަސްވުމެއްގެ ދަށުންނެވެ. އޭނާގެ ޝަޚްތަރު ކޮންޓްރެކްޓް ޑިސެމްބަރު މަހުގެ 31 ވަނަ ދުވަހު ހަމަވާއިރު، ސްޕާސްއަށް ކުޑަ ފީއެއްގައި އޭނާ ސޮއިކުރާނެއެވެ.

2022 ވަނަ އަހަރުގެ ފެބުރުއަރީ މަހު ރަޝިއާއިން ހަމަލާ ދިންއިރު ސޮލޮމަން ހުރީ ކިއޭވްގައެވެ.

ޑެޖާން ކުލުސެވްސްކީއާއި ގޯލްކީޕަރު ވިކަރިއޯ، އަދި މިޑްފީލްޑަރު ޖޭމްސް މެޑިސަންއަށްފަހު، އިޒްރޭލުގެ މި ކުޅުންތެރިޔާ ވެގެންދާނީ ޓޮޓެންހަމްއިން ހޫނު މޫސުމުގައި ސޮއިކުރި ހަތަރުވަނަ ކުޅުންތެރިޔާއަށެވެ.

މިދިޔަ ސީޒަނުގެ ޕްރިމިއަރ ލީގުގައި އަށްވަނަ ލިބުނުއިރު، 2023-24ގެ ކެމްޕެއިނަށް ޔޫރަޕްގެ ފުޓުބޯޅައަށް ފުރުސަތު ނުލިބުމުން އައު ކޯޗު ޕޯސްޓެކޮގްލޫ އަންނަނީ ޓީމު ވަރުގަދަ ކުރަން މަސައްކަތް ކުރަމުންނެވެ.