21 އަހަރުން ދަށުގެ ޔޫރޯ: އިންގްލެންޑާއި ޔޫކްރެއިން ސެމީ އަށް
3 ޖުލައި 2023 | ހޯމަ 08:03ސެމީގެ މެޗުތައް ކުޅުމަށް ހަމަޖެހިފައިވަނީ ބުދަ ދުވަހު
އިނގްލެންޑާއި ޕޯޗުގަލް ބައްދަލުކުރި މެޗުގެ ތެރެއިން
21 އަހަރުން ދަށުގެ ޔޫރަޕިއަން ޗެމްޕިއަންޝިޕް (ޔޫރޯ)ގެ ސެމީގެ ފަހު ދެ ޖާގަ އިންގްލެންޑާއި ޔޫކްރެއިނުން ހޯދައިފިއެވެ.
ސެމީގެ ޖާގަ އިނގްލެންޑުން ހޯދީ ކުއާޓަރގައި ޕޯޗުގަލްގެ މައްޗަށް 1-0 ގެ ނަތީޖާއަކުން ކުރިހޯދައިގެނެވެ. ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެން ދިޔަ މި މެޗުގެ ހަމަ އެކަނި ލަނޑު 34 ވަނަ މިނެޓުގައި ކާމިޔާބުކޮށްދިނީ އެންތޮނީ ގޯޑަންއެވެ. ގޯޑަން އަކީ ނިއުކާސަލް ޔުނައިޓެޑަށް ކުޅެމުން އަންނަ ޒުވާން ކުޅުންތެރިއެކެވެ.
ޔޫކްރެއިން ސެމީ އިން ޖާގަ ހޯދީ ފަހަތުން އަރައި 3-1 ގެ ނަތީޖާއަކުން ފްރާންސް ބަލިކުރުމަށްފަހުއެވެ. މެޗުގެ 19 ވަނަ މިނެޓުގައި ފްރާންސްގެ ރަޔާން ޗާކީ ވަނީ ލަނޑެއް ޖަހައި، އެ ޓީމަށް ކުރިހޯދަދީފައެވެ. އޭގެ ފަހުން މެޗުގެ 32 ވަނަ މިނެޓުގައި ލިބުނު ޕެނަލްޓީއެއް ކާމިޔާބުކޮށް ޔޫކްރެއިން އަށް ނަތީޖާ ހަމަހަމަކޮށްދިނީ ސުޑަކޯވް އެވެ. އޭނާ ވަނީ ފުރަތަމަ ހާފު ނިމެން މިނެޓަކަށް ވެފައިވަނިކޮށް އިތުރު ލަނޑެއް ޖަހާ، ޓީމަށް ކުރިހޯދަދީފައެވެ. ޔޫކްރެއިންގެ ތިންވަނަ ލަނޑު، މެޗުގެ 86 ވަނަ މިނެޓުގައި ކާމިޔާބުކޮށްދިނީ ބޮންޑަރެންކޯއެވެ.
ސެމީ ފައިނަލްގައި އިނގްލެންޑު ކުޅެން ޖެހޭނީ އިސްރާއީލާއެވެ. ޔޫކްރެއިން ނިކުންނާނީ ސްޕެއިން އާ ދެކޮޅަށެވެ. ސެމީގެ މެޗުތައް ކުޅުމަށް ހަމަޖެހިފައިވަނީ ބުދަ ދުވަހުއެވެ.
