"ވިސިޓް މޯލްޑިވްސް ޕްރޯ" ގެ ދެވަނަ އެޑިޝަން ލޯންޗުކޮށްފި

އިންޓަނޭޝަނަލް ބޮޑީ ބޯޑިން ކޯޕަރޭޝަން (އައިބީސީ)ގެ ބޯޑީ ބޯޑިން ވޯލްޑް ޓުއާގައި ހިމެނޭ "ވިސިޓް މޯލްޑިވްސް ޕްރޯ" ގެ ދެވަނަ އެޑިޝަން ލޯންޗުކޮށްފިއެވެ.

މިއަހަރު ރާއްޖޭގައި ބާއްވާ ހަވަނަ ބައިނަލްއަގުވާމީ މުބާރާތް ލޯންޗު ކޮށްދެއްވީ މިނިސްޓަރ އޮފް ޔޫތު ސްޕޯޓްސް އެންޑް ކޮމިޔުނިޓީ އެމްޕަވަމަންޓް، އަޙުމަދު މަހްލޫފެވެ. މިއަހަރުގެ މުބާރާތް ކުރިޔަށް ގެންދިޔުމަށް ހަމަޖެހިފައިވަނީ އޮގަސްޓު މަހުގެ ތިން ވަނަ ދުވަހުން 12 ވަނަ ދުވަހުގެ ނިޔަލަށް، މާލޭ ވަރުނުލާ ރާޅުގަނޑު ސަރަހައްދުގައެވެ.

މުބާރާތް ލޯންޗުކުރުމަށް ބޭއްވި ނުސްވެރިންގެ ބައްދަލުވުމުގައި ވާހަކަދައްކަވަމުން ޔޫތު މިނިސްޓަރު އަޙުމަދު މަހްލޫފް ވިދާޅުވީ މި މުބާރާތުގެ މަގުސަދަކީ ވޯޓާ ސްޕޯޓްސް މަންޒިލެއްގެ ގޮތުގައި ރާއްޖެ އިޝްތިހާރުކުރުމުގެ އިތުރުން ޤައުމީ އެތުލީޓުންނަށް ފުރުސަތު ފަހިކޮށްދިނުން ކަމަށެވެ. މީގެއިތުރުން މިނިސްޓަރު ވަނީ މިދިޔަ އަހަރުގެ މުބާރާތުން ރާއްޖޭގެ އެތުލީޓުން ހޯދި ކާމިޔާބީތަކާއި ކުރިއެރުން ފާހަގަކުރައްވާފައެވެ.

ރާއްޖޭގައި ފުރަތަމަ ފަހަރަށް މި މުބާރާތް ބާއްވާފައިވަނީ މިދިޔަ އަހަރުއެވެ. އެ މުބާރާތުގައި ޖުމްލަ 15 ޤައުމަކުން 100 އަށްވުރެ ގިނަ އެތުލީޓުން ވާދަކޮށްފައިވެއެވެ. މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން މައުލޫމާތު ދެއްވި ގޮތުގައި، މިއަހަރުގެ މުބާރާތުގައި 20 ޤައުމަކުން އެތުލީޓުން ވާދަކުރާނެއެވެ.

މިއަހަރުގެ މުބާރަތުގައިވެސް ފައިސާގެ އިނާމުގެގޮތުގައި ކަނޑައަޅާފައިވަނީ ޖުމްލަ 70،000 ޑޮލަރެވެ. އެއީ ފިރިހެން ބަޔަށް 30000، އަންހެން ބަޔަށް 20،000 އަދި ޖޫނިއާ އާއި ޑްރޮޕް ނީ ބަޔަށް 10،000 ޑޮލަރެވެ.

ވިސިޓް މޯލްޑިވްސް ޕްރޯ 2023 އަކީ މިއަހަރުގެ ވޯލްޑް ޓުއާގައި ހިމެނޭ ފަސްވަނަ މުބާރާތެވެ. މި ޓުއާގެ ފުރަތަމަ ހަތަރު މުބާރާތް ކުރިޔަށް ގެންގޮސްފައިވަނީ ބްރެޒިލް އާއި ޗިލީގައެވެ. އަދި ރާއްޖޭގެ މުބާރާތް ނިންމުމަށްފަހު ފްރާންސް، ޕޯޗުގަލް، ސައުތު އެފްރިކާ، މޮރޮކޯ އަދި ސްޕެއިންގައި ވޯލްޑް ޓުއާގެ މުބާރާތްތައް ކުރިޔަށްދާނެއެވެ. ދުނިޔޭގެ ޗެމްޕިއަނަކަށް ވުމަށްޓަކައި ރާއްޖޭގެ މުބާރާތުގައި ވާދަކޮށް، ޕޮއިންޓު ހޯދުން މުހިންމު ވާނެއެވެ. އެހެންކަމުން ދުނިޔޭގެ އެންމެ މަތި ފަންތީގެ އެތުލީޓުން މި މުބާރާތުގައި ވާދަކުރާނެކަމަށް ބެލެވެއެވެ.

މިދިޔަ އަހަރުގެ މުބާރާތުގައި ވާދަކޮށް ރާއްޖޭގެ އެތުލީޓުން ވަނީ ރަނގަޅު ކާމިޔާބީތަކެއް ހޯދާފައެވެ. ރާއްޖޭގެ އަލީ ޚުޝްރުވާން އަހުމަދު (ކުޑަ އައްޔަ) ޑްރޮޕް ނީ ބައިގެ ސެމީ ފައިނަލުގައި ވާދަކޮށްފައިވާއިރު ޒުވާން ބޮޑީބޯޑަރު އާމިން އުމަރު މޫސާ ވަނީ ޖޫނިއަރ ބައިގެ ފައިނަލުގައިވެސް ވާދަކޮށްފައެވެ. އައިބީސީން އަހަރު ނިންމާލިއިރު، ކުޑަ އައްޔައާއި އާމިން ވަނީ ދުނިޔޭގެ ރޭންކިންއަށް ވެސް ޖެހިލާފައެވެ.