މާލެއިން ތިލަފުއްޓަށް އަޅާ ބްރިޖުގެ މަސައްކަތް މި އަންނަ އަހަރުގެ ތެރޭގައި ނިމި ބޭނުންކުރަން ފެށޭނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

އާދިއްތަ ދުވަހުގެ ހަވީރު ގުޅިފަޅު ބިންހިއްކުމުގެ މަޝްރޫއު ފެށުމަށް ބޭއްވެވި ޚާއްސަ ރަސްމިއްޔާތުގައި ވާހަކަފުޅު ދައްކަވަމުން ރައީސް ސާލިހު ވިދާޅުވީ ސާޅީހަކަށް އަހަރު ފަހުން، މާލޭ ރައްޔިތުންނަށް ގޯތި ދިނުމަށް ބިންވެރިޔާ ސްކީމް ހުޅުވައިލެއްވީ، މާލޭ ރައްޔިތުންނަށް ހަމަނޭވާލެވޭނެ ގޮތެއް ހޯދައިދިނުމަށް ކަމަށެވެ. އެ މަޝްރޫއު މުޅިން ފުރިހަމަވާނީ، މާލެއިން ތިލަފުއްޓަށް އަޅާ ބްރިޖުން އެ ސަރަހައްދާއި މާލެއާ ގުޅައިލުމުން ކަމަށް އެމަނިކުފާނު ވިދާޅުވިއެވެ. އަދި ވިދާޅުވީ މި އަންނަ އަހަރުގެ ތެރޭގައި އެ ބްރިޖުގެ މަސައްކަތް ނިމި ބޭނުންކުރަން ފެށޭނެ ކަމަށާއި، އެއަށްފަހު އެ ބްރިޖް ގިރާވަރާ ހަމައަށް ގުޅާލާނެ ކަމަށެވެ.

މީގެ އިތުރުން ރައީސް ސާލިހު ވަނީ ގުޅިފަޅާއި ގިރާވަރުން އިތުރަށް ގޯތި ދެވޭނެ ގޮތްތަކާއި ޕްލޭންތައް ހަދަމުންދާކަމަށް ވިދާޅުވިފައެވެ. އަދި މި ފަޅު ހިއްކައިގެން ތަރައްގީކުރާ ބިމުން ބަންޑާރަ ގޯތި ދޫކުރުމުގެ އިތުރުން، ރާއްޖޭގެ އިގްތިސާދީ ތަރައްގީއާ ގުޅިފައިވާ މުހިންމު ދެ ކަމެއް އެ ބިމުގައި ހިނގާނެ ކަމަށް އެމަނިކުފާނު ވިދާޅުވިއެވެ.

ތިލަމާލެ ބްރިޖުގެ މަސައްކަތް ނިންމަން ދީފައިވާ ޓައިމްލައިނާ އެއްގޮތަށް ބްރިޖުގެ މަސައްކަތް ނިމޭނެ ކަމަށް ސަރުކާރުން ބުނެއެވެ. އެގޮތުން ބްރިޖުގެ ފުރަތަމަ ފޭސްގައި ހިމެނެނީ މާލެއިން ފެށިގެން ގުޅިފަޅާ ހިސާބަށް މަަސައްކަތް ނިންމުން ކަމަށާއި އެ މަސައްކަތް ނިންމަން ތާވަލްކޮށްފައި ވަނީ މިއަހަރުގެ ޑިސެމްބަރު މަހުގެ ނިޔަލަށް ކަމަށް ސަރުކާރުން ބުނެއެވެ. އޭގެ ފަހުން މެއި 2024ށް ބްރިޖް ތިލަފުއްޓާ ގުޅާލާގޮތަށް ވަނީ ހަމަޖެހިފައެވެ.

ތިލަމާލެ ބްރިޖްގެ މަޝްރޫއަކީ ރާއްޖޭގައި ހިންގާ އުމްރާނީ އެންމެ ބޮޑު އެއް މަޝްރޫއު ކަމަށް ވާއިރު، އެ މަސައްކަތް ސަރުކާރުން ހަވާލުކޮށްފައި ވަނީ އިންޑިއާގެ އެފްކޮންސް އިންފްރާސްޓްރަކްޗަރާއެވެ. މިއީ އިންޑިއާގެ އެގްޒިމް ބޭންކުން 400 މިލިއަން ޑޮލަރުގެ ލޯނަކާއި، 100 މިލިއަން ޑޮލަރުގެ ހިލޭ އެހީގައި ކުރިއަށްގެންދާ މަޝްރޫއެކެވެ.

ތިލަމާލެ ބްރިޖުގެ މަސައްކަތް ރަސްމީކޮށް ފަށާފައިވަނީ 02 އޮގަސްޓް 2022 ގައެވެ.