ފަޅުރަށެއް ކައިރިއަށް ހުއްޓުނު ޑިންގީއެއްގައި ތިބި ބަޔަކު ސަލާމަތްކޮށްފި
ޑިންގީގައި ތިބީ 2 މީހުން
ފަޅުރަށެއް ކައިރިއަށް ހުއްޓުނު ޑިންގީ
ގދ. ގައްދޫ ކައިރީ އޮންނަ ފަޅު ރަށެއް ކަމަށްވާ ރަޅެއޮޑިގައްލާ ކައިރިއަށް ޑިންގީއެއް ހުއްޓި އެ ޑިންގީގައި ތިބި މީހުން އެމްއެންޑީއެފުން ސަލާމަތްކޮށްފިއެވެ.
އެމްއެންޑީއެފުން ބުނީ މި ހާދިސާގެ ރިޕޯޓް އެމްއެންޑީއެފް ކޯސްޓްގާޑަށް ލިބުނީ އާދިއްތަ ދުވަހުގެ ރޭ 21:44 ހާއިރު ކަމަށެވެ.
ހާދިސާގެ ރިޕޯޓު ލިބުމާއެކު އެ ޑިންގީއަށް އެހީތެރިކަން ފޯރުކޮށްދިނުމަށް ޓަކައި އެމްއެންޑީއެފް ސަދަން އޭރިއާ ކޯސްޓްގާޑް ފޯތު ސްކޮޑްރަންގެ ސީ އެމްބިއުލާންސް އެ ސަރަހައްދަށް ދިޔަކަމަށް އެމްއެންޑީއެފުން ބުނެއެވެ.
މި ޑިންގީގައި ތިބީ ދެމީހުން ކަމަށާއި އެ ޑިންގީ ރަޅުއޮޑެގައްލާގެ ފަޅުތެރެއަށް ވެއްދުމަށްފަހު އެ ޑިންގީން ދަތުރުކުރި މީހުން ވަނީ ގދ. ފަރެސްމާތޮޑާއަށް ރޭ 23:50 ހާއިރު ގެންގޮސްފައިވާކަމަށް އެމްއެންޑީއެފުން ބުނެފައިވެއެވެ.
ޑިންގީން ދަތުރުކުރި އެ ދެ މީހުންގެ ހާލު ވެސް ރަނގަޅުކަމަށް އެމްއެންޑީއެފުން ބުނެއެވެ.
