ލިވަޕޫލުން ޖަރުމަނު ލީގުގެ އާރްބީ ލައިޕްޒިގްގެ މިޑްފީލްޑަރު، ޑޮމިނިކް ސޮބޮސްލާއި ފަސް އަހަރުގެ އެއްބަސްވުމެއްގެ ދަށުން 70 މިލިއަން ޔޫރޯ އަށް ސޮއިކޮށްފިއެވެ.

ލިވަޕޫލުން ވަނީ ހަންގޭރީގެ ކުޅުންތެރިޔާގެ ރިލީޒް ކްލޯޒް ޓްރިގަރކޮށް، ހޫނު މޫސުމުގައި ގެނައި ދެވަނަ ކުޅުންތެރިޔާއަށް އޭނާ ހަދާފައެވެ. މީގެ ކުރިން އެ ޓީމުން ވަނީ އާޖެންޓީނާގެ އިންޓަނޭޝަނަލް މިޑްފީލްޑަރު އެލެކްސިސް މެކް އެލިސްޓާ ބްރައިޓަން އިން 35 މިލިއަން ޕައުންޑަށް ސޮއިކޮށްފައެވެ.

އޭނާ ބުނީ ލިވަޕޫލް އަކީ މޮޅު ކުޅުންތެރިންނާ މޮޅު ކޯޗެއް ހުރި ތާރީހީ ޓީމެއް ކަމަށެވެ. އަދި ލިވަޕޫލް ފަދަ ކުލަބަކަށް ބަދަލުވުމަކީ އެޅުނު ރަނގަޅު ފިޔަވަޅެއް ކަމަށާއި، ސަޕޯޓަރުންނާއި ސްޓޭޑިއަމްވެސް ވަރަށް ރަނގަޅު ކަމަށެވެ.

މިދިޔަ ސީޒަނުގައި ޖަރުމަނު ލީގުގައި 31 މެޗު ކުޅެފައިވާ ސޮބޮސްލާއި ވަނީ ހަ ލަނޑު ޖަހައި އަށް އެސިސްޓުކޮށްފައެވެ. 22 ވަނަ އަހަރުގެ މި ކުޅުންތެރިޔާ ވަނީ ވޭތުވެ ދިޔަ ދެ ސީޒަނުގައިވެސް ލައިޕްޒިގާއެކު ޖަރުމަނު ކަޕް ކާމިޔާބުކޮށްފައެވެ.

2021 ވަނަ އަހަރުގެ ޖެނުއަރީ މަހު އޮސްޓްރިއާގެ ރެޑްބުލް ސަލްޒްބާގުން ބަދަލުވި ފަހުން އޭނާ ވަނީ 20 ލަނޑު ކާމިޔާބުކޮށް، 91 މެޗުގައި 21 އެސިސްޓުކޮށްފައެވެ.