ފްރެންޗް ލީގުގެ ކުލަބު، އާރްސީ ސްޓްރަސްބާގްގެ އައު ކޯޗަކަށް ޕެޓްރިކް ވިއޭރާ ހަމަޖައްސައިފިއެވެ.

އުމުރުން 47 އަހަރުގެ ވިއޭރާ ސޮއިކުރަން ހަމަޖެހިފައިވަނީ ތިން އަހަރުގެ އެއްބަސްވުމެއްގައެވެ. އާސެނަލްގެ ކުރީގެ މިޑްފީލްޑަރު، މިދިޔަ މާޗް މަހު ޕްރިމިއާ ލީގުގެ ކްރިސްޓަލް ޕެލަސް އިން ވަކިކުރި ފަހުން އޭނާ ހުރީ ޓީމަކާ ހަވާލުނުވެއެވެ.

މިދިޔަ ސީޒަނުގައި ފްރާންސް ލީގުގެ 15 ވަނައިގައި އޮތް ސްޓްރަސްބާގްގެ މެޖޯރިޓީ ހިއްސާ ގަންނަން ޗެލްސީގެ އޯނަރުން ދާދި ފަހުން ވަނީ ނިންމާފައެވެ. މިއީ މަލްޓި ކުލަބު ގްރޫޕެއްގައި ވިއޭރާ މަސައްކަތްކުރި ފުރަތަމަ ފަހަރެއް ނޫނެވެ. ސިޓީ ފުޓްބޯލް ގުރޫޕުގައި ވެސް ހިމެނޭ ނިއުޔޯކް ސިޓީއާ ހަވާލުވުމުގެ ކުރިން އޭނާ ވަނީ މެންޗެސްޓާ ސިޓީގެ 23 އަހަރުން ދަށުގެ ޓީމަށް ކޯޗުކޮށްދީފައެވެ.

މިދިޔަ ސީޒަނުގައި ސްޓްރަސްބާގް ރެލިގޭޝަނުން ސަލާމަތްކޮށްދިން ފްރެޑެރިކް އެންޓޮނެޓީގެ ބަދަލުގައި ވިއޭރާ ހަމަޖެއްސީ ދާދި ފަހުން ކުރި އިންވެސްޓްމަންޓާއެކުއެވެ.

ވިއޭރާ ކޯޗިން ކެރިއަރު ފެށީ 2011 ވަނަ އަހަރު މެންޗެސްޓާ ސިޓީއަށް ކުޅުން ހުއްޓާލުމަށްފަހު 2013 ވަނަ އަހަރު އެ ކުލަބުގެ އެލީޓް ޑިވެލޮޕްމަންޓް ސްކޮޑާއެކުއެވެ. އޭގެފަހުން އެމްއެލްއެސް ކުލަބު ނިއުޔޯކް ސިޓީ އެފްސީގެ މެނޭޖަރަކަށް 2015 ވަނަ އަހަރު ހަމަޖެއްސިއިރު، އޭގެ ތިން އަހަރު ފަހުން އެނބުރި ޔޫރަޕަށް ދިޔައީ ފްރާންސް ލީގުގެ ނީސްއާ އެކުއެވެ. ވިއޭރާގެ އިރުޝާދުގެ ދަށުން ފުރަތަމަ ސީޒަނުގައި އެ ޓީމު ހަތް ވަނަ އަށް ދިޔަ ނަމަވެސް މިދިޔަ އަހަރުގެ ޑިސެމްބަރު މަހު އޭނާ މަގާމުން ވަކިކުރީ ދަށް ފޯމެއްގައި ހުރުމުންނެވެ.

އިނގިރޭސި ޕްރިމިއަރ ލީގަށް ކުޅުން ހުއްޓާލިތާ ދިހަ އަހަރު ފަހުން 2021 ވަނަ އަހަރުގެ ޖުލައި މަހު ވިއޭރާ އެނބުރި ޕްރިމިއާ ލީގަށް އައީ ރޯއީ ހޮޖްސަންގެ ބަދަލުގައި ޕެލެސްގެ ކޯޗުގެ ގޮތުގައެވެ. އޭނާގެ ފުރަތަމަ ސީޒަނުގައި 12 ވަނަ ހޯދައިދިންއިރު އެ ޓީމު ވަނީ އެފްއޭ ކަޕުގެ ސެމީ ފައިނަލަށް ދަތުރުކޮށްފައެވެ.

2023 ވަނަ އަހަރު ޕެލެސް މޮޅުނުވެ ޕްރިމިއާ ލީގުގެ ރެލިގޭޝަން ޒޯނަށް ވުރެ ތިން ޕޮއިންޓް ކުރީގައި އޮތުމުން އޭނާ ވަނީ މާޗް މަހު މަގާމުން ވަކިކޮށްފައެވެ.