ގުޅީފަޅު ބިން ހިއްކުމުގެ މަސައްކަތް ރަސްމީކޮށް ފަށައިފި
2 ޖުލައި 2023 | އާދީއްތަ 13:11ގުޅީފަޅުން އިތުރު 150 ހެކްޓަރުގެ ބިން ހިއްކާނެ
ގުޅީފަޅު ބިން ހިއްކުން އިފްތިތާހުކޮށްދެއްވުން
މާލޭ ސަރަހައްދުގެ ރައްޔިތުންނަށް ގޯތި ދޫކުރުމަށް ހިންގާ "ބިންވެރިޔާ ސްކީމް"ގެ ދަށުން ގުޅީފަޅުން ބިން ދޫކުރުމަށް ގުޅީފަޅު ހިއްކުމުގެ މަސައްކަތް ރަސްމީކޮށް ފަށައިފިއެވެ.
އާދިއްތަ ދުވަހު ގުޅީފަޅުގައި ބޭއްވި ރަސްމިއްޔާތެއްގައި މި މަޝްރޫއު ރަސްމީކޮށް އިފްތިތާހުކޮށްދެއްވީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހެވެ.
މި މަސައްކަތް ފައްޓަވައިދެއްވައި ވާހަކަފުޅުދައްކަވަމުން ރައީސް ވިދާޅުވީ، ގުޅީފަޅުން މިހާރުވެސް 68 ހެކްޓަރުގެ ބިން ހިއްކައި ނިމިފައިވާކަމަށެވެ. އަދި މިއަދު ފެށިގެންދަނީ ގުޅީފަޅުގެ ދެވަނަ ފިޔަވަހީގެ މަސައްކަތް ކަމަށާއި، މި ފިޔަވަހީގައި އިތުރު 150 ހެކްޓަރުގެ ބިން ހިއްކާނެ ކަމަށް ރައީސް ވިދާޅުވިއެވެ. މުޅި ޖުމްލަ 218 ހެކްޓަރުގެ ބިން އިތުރުކުރެވިގެން ދާނެކަން ރައީސް ފާހަގަކުރެއްވިއެވެ.
ބިންވެރިޔާ ސްކީމުގެ ދަށުން އެންމެ ފުރަތަމަ މާލޭ ސަރަހައްދުން ދޫކުރުމަށް ނިންމީ 5،000 ގޯއްޗެވެ. އެހެންނަމަވެސް އާދިއްތަ ދުވަހު ރައީސް ވަނީ މާލެ ސަރަހައްދުން 6،200 ގޯތި ދޫކުރައްވާނެކަން އިއުލާނުކުރައްވާފައެވެ.
މިގޮތުން ގުޅީފަޅު ހިއްކައި އެ ބިމުން 2،000 ގޯތި، އަދި ގިރާވަރުފަޅު ހިއްކައި އެ ބިމުން 2،000 ގޯތި ދޫކުރާނެއެވެ. އަދި ހުޅުމާލެއިން މީގެ ކުރިން ދޫކުރަން ނިންމި 1،000 ގޯތީގެ ބަދަލުގައި މިހާރު ވަނީ 2،200 ގޯތި ދޫކުރުމަށް ނިންމަވާފައެވެ. އަދި ގުޅީފަޅާއި، ގިރާވަރު ފަޅުން އިތުރު ބިން ދޫކުރެވޭނެ ގޮތްތައް ބައްލަވާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ، މިއީ މާލޭ ސަރަހައްދުގެ ތަރައްގީއަށް ބޮޑެތި ބަދަލުތަކެއް ގެނުވާނެ މަޝްރޫއެއް ކަމަށެވެ. މި މަޝްރޫއާ ގުޅިފައިވާ އެންމެ ބޮޑު މަސައްކަތަކީ ބޯހިޔާވަހިކަމުގެ މައްސަލައަށް ހައްލެއް ގެނައުން ކަމަށާއި، މާލޭ ރައްޔިތުންނަށް ދިމާވެފައިވާ ދަތިތަކަށް ހައްލު ލިބޭނެ މަޝްރޫއަކަށް މި މަޝްރޫއު ވާނެކަމުގެ ޔަގީންކަން ރައީސް ވަނީ ދެއްވާފައެވެ. އަދި މިއީ މުޅި ރާއްޖޭގައިވެސް ހިންގޭ މިފަދަ އެންމެ ބޮޑު މަޝްރޫއުކަންވެސް ރައީސް ފާހަގަކުރެއްވިއެވެ.
