ވިޔަރެއާލްއަށް ކުޅެމުން އައި ސެނެގާލްގެ ޒުވާން ފޯވާޑެއް ޗެލްސީއަށް

ވިޔަރެއާލް އަށް ކުޅެމުން އައި ސެނެގާލްގެ ޒުވާން ފޯވާޑެއް ދިގު މުއްދަތުގެ އެއްބަސްވުމެއްގެ ދަށުން ޗެލްސީން ސޮއިކުރުވައިފިއެވެ.

ޗެލްސީން ސޮއިކުރީ 22 އަހަރުގެ ނިކޮލަސް ޖެކްސަން އާއެކުއެވެ. 22 އަހަރުގެ ފޯވާޑް ޗެލްސީއަށް ސޮއިކުރީ އަށް އަހަރުގެ އެއްބަސްވުމެއްގައެވެ. އޭނާ އަކީ މިދިޔަ ސީޒަންގައި ލަލީގާގައި ކުޅުނު 38 މެޗުން 13 ގޯލް ޖެހި ފޯވާޑެކެވެ.އޭގެ ތެރެއިން ނުވަ ގޯލް ޖެހީ ލީގުގެ ފަހު އަށް މެޗުގައެވެ. މިއީ އާ ސީޒަނަށް ޗެލްސީން ހޯދި ދެވަނަ ކުޅުންތެރިޔާއެވެ. އެންމެ ފުރަތަމަ ސޮއިކުރުވި ކުޅުންތެރިއަކީ އާރުބީ ލައިޕްޒިގަށް ކުޅެމުން އައި އެންކުންކު އެވެ.

ސެނެގާލް ގައުމީ ޓީމްގައިވެސް މިހާރު ހިމެނޭ ނިކޮލަސް ޖެކްސަންގެ ސޮއި ހޯދުމަށްފަހު ޗެލްސީން ބުނީ އެއީ ވަރަށް ހުނަރުވެރި ޒުވާން ކުޅުންތެރިއެއް ކަމަށެވެ. އަދި ޗެލްސީން ގަބޫލުކުރާގޮތުގައި ޒުވާން ކުޅުންތެރިޔާ ހުރީ ކެރިއަރުގައި ދެން އޮތް ފިޔަވަޅު އަޅަން ތައްޔާރަށް ކަމަށް ބުނެފައިވެއެވެ. އޭނާގެ ޓްރާންސްފާ ފީ ދެކްލަބުންވެސް ހާމައެއް ނުކުރެއެވެ. ނިކޮލަސް ޖެކްސަން ޕްރިމިއަރ ލީގަށް ބަދަލުވިއިރު އެލީގުގައި ކުޅެމުން އައި ސެނެގާލް ގައުމީ ޓީމްގެ ކީޕަރު މެންޑީއާއި, ކުލިބާލީ ވަނީ ސައުދީ އަރަބިޔާގެ ކްލަބަކަށް ބަދަލުވެފައެވެ. އަދި ކާންޓޭ ވެސް ވަނި އެލީގުގެ އަލް އިއްތިހާދަށް ސޮއިކުރަން އެއްބަސްވެފައެވެ.

މިދިޔަ ސީޒަން ލަލީގާ ތާވަލްގެ ފަސްވަނާގައި ވިޔަރެއާލް ނިންމާލާ ޔޫރޮޕާ ލީގުގެ ޖާގައެއް ހޯދުމުގައި ނިކޮލަސް ޖެކްސަން މުހިއްމު ދައުރެއް އަދާކުރިއެވެ. އޭނާ އަކީ މޭމަހު ލަލީގާގެ މޮޅު ކުޅުންތެރިޔާއެވެ.