ސައުދީގެ އަލް ކަދިސިއްޔާގެ ކޯޗަކަށް ލިވަޕޫލްގެ މަޝްހޫރު ކުޅުންތެރިޔާ ރޮބީ ފައުލާ
1 ޖުލައި 2023 | ހޮނިހިރު 04:08ފައުލާ ހަވާލުވީ ސައުދީގެ ދެ ވަނަ ދަރަޖައިގެ ޓީމަކާ
ރޮބީ ފައުލާ
ސައުދީ އަރަބިއާގެ ޓީމު އަލް ކަދިސިއްޔާގެ ކޯޗަކަށް ލިވަޕޫލްގެ ކުރީގެ ފޯވާޑް ރޮބީ ފައުލާ ހަމަޖައްސައިފިއެވެ.
ޔޫރަޕްގެ މަޝްހޫރު ގިނަ ކުޅުންތެރިންތަކެއް ފައިދާހުރި ސައޫދީ ޕްރޯ ލީގަށް ނުކުންނަ ހޫނު މޫސުމުގައި ފައުލާ ހަވާލުވީ ސައުދީގެ ދެ ވަނަ ދަރަޖައިގެ ޓީމަކާއެވެ. އެ ކުލަބުން ވަނީ އިންގްލެންޑުގެ ކުރީގެ ފޯވާޑް އެ މަގާމަށް ހަމަޖެއްސިކަން އެ ކުލަބުގެ ޓްވިޓާ މެދުވެރިކޮށް ކަށަވަރުކޮށްދީފައެވެ.
އިނގިރޭސި ޕްރިމިއާ ލީގުގެ ކްލަބާއެކު ދެ ސްޕެލްގައި 183 ލަނޑު ކާމިޔާބުކޮށްފައިވާ ފައުލާ އަކީ ލިވަޕޫލްގެ އެންމެ ފާހަގަކޮށްލެވޭ އެއް ކުޅުންތެރިޔާއެވެ. އޭނާ ކުޅުނު އެހެން ޓީމުތަކުގެ ތެރޭގައި ލީޑްސް ޔުނައިޓެޑާއި މެންޗެސްޓާ ސިޓީ ހިމެނެ އެވެ.
އޭނާގެ މެނޭޖްރިއަލް ކެރިއަރުގައި އޭނާ އެހާ އުސްމިންތަކަކަށް ގޮސްފައި ނުވާއިރު، އިންޑިއަން ސުޕަ ލީގުގައި އޭނާ ވަނީ މުއާންތޮންގް ޔުނައިޓެޑާއި އޮސްޓްރޭލިއާގެ ބްރިސްބޭން ރޯރް އަދި އީސްޓް ބެންގާލް އަށް ކޯޗުކޮށްދީފައެވެ.
މިދިޔަ ޑިސެމްބަރު މަހު ކްރިސްޓިއާނޯ ރޮނާލްޑޯ އަލްނަސްރަށް ބަދަލުވުމާ ގުޅިގެން ސައުދީ އަރަބިއްޔާއިން ވަނީ މި އަހަރުގެ ކުރީކޮޅުން ފެށިގެން އުއްމީދީ ރެކްރޫޓްމަންޓް ހަރަކާތެއް ފަށައިފައެވެ. އެގޮތުން ބެންޒެމާ، ކާންޓޭ، ނެވޭސް، ކުލިބާލީ އަދި މެންޑީ ފަދަ ކުޅުންތެރިން ވަނީ ސައުދީގެ ކުލަބުތަކާ ގުޅިފައެވެ.
ފައުލާގެ އެއްބަސްވުމުގެ މުއްދަތެއް ކުލަބުން އާންމުކޮށްފައެއް ނުވެއެވެ.
