އެޑުއާޑް މެންޑީ، ޗެލްސީ ދޫކޮށް ސައޫދީ ޕްރޯ ލީގުގެ އަލް އަހްލީއަށް ބަދަލުވެއްޖެ

ޗެލްސީގެ ގޯލްކީޕަރު އެޑުއާޑް މެންޑީ، ސައޫދީ ޕްރޯ ލީގުގެ ޓީމެއް ކަމަށްވާ އަލް އަހްލީއަށް ބަދަލުވެއްޖެއެވެ.

އުމުރުން 31 އަހަރުގެ މެންޑީއަކީ ޕްރިމިއާ ލީގުން ސައޫދީ އަރަބިއްޔާއަށް އެންމެ ފަހުން ބަދަލުވި ކުޅުންތެރިޔާއެވެ. 2020 ވަނަ އަހަރު ސްޓޭޑް ރެނައިސްއިން ޗެލްސީއާ ގުޅުމަށްފަހު ސެނެގާލްގެ ގޯލްކީޕަރު ޗެލްސީ ކެރިއަރުގެ ފެށުން ރަނގަޅުކުރިއިރު، އޭނާ ވަނީ 2021 ވަނަ އަހަރު ޗެމްޕިއަންސް ލީގާއި ޔުއެފާ މެންސް ބެސްޓް ގޯލްކީޕަރުގެ އެވޯޑްވެސް ހޯދާފައެވެ. ނަމަވެސް މިދިޔަ ސީޒަނުގައި މެންޑީގެ ފޯމަށް އުނދަގޫތަކެއް ކުރިމަތިވިއިރު، މިދިޔަ ޖެނުއަރީ މަހު އޭނާއަށް އަނިޔާވުމާ ގުޅިގެން ސާޖަރީއެއް ހަދައި، އެންމެ ފަހުން އެ ކުލަބުގެ އެއްވަނަ ގޯލްކީޕަރުގެ މަގާމު ލިބުނީ ޓީމުގެ ކެޕާ އަރިޒަބަލަންގާ އަށެވެ.

އަލް އަހްލީ ވަނީ މިދިޔަ ސީޒަނުގައި ސައޫދީ ފުރަތަމަ ޑިވިޝަނުގެ ޗެމްޕިއަންކަން ހޯދައި، 2023-24 ވަނަ އަހަރުގެ ސީޒަނަށް އަލުން ސައުދީ ޕްރޯ ލީގަށް ޕްރޮމޯޝަން ހޯދައިފައެވެ.

އަލް އަހްލީއަކީ ނިއުކާސަލް ޔުނައިޓެޑްގެ އޯނަރުން ކަމަށްވާ ސައޫދީ އަރަބިއްޔާ ޕަބްލިކް އިންވެސްޓްމަންޓް ފަންޑް (ޕީއައިއެފް)ގެ ދަށުން މި މަހުގެ ކުރީކޮޅު އެ ގައުމުގެ އެސްއޯ "ސްޕޯޓްސް ކްލަބްސް އިންވެސްޓްމަންޓް އެންޑް ޕްރައިވަޓައިޒޭޝަން ޕްރޮޖެކްޓް" ގެ ދަށުން ނެގި އަލް ހިލާލް، އަލް އިއްތިހާދު ،އަދި އައްނަސްރުގެ އިތުރުން ހަތަރު ކުލަބުގެ ތެރޭގައި ހިމެނޭ ކުލަބެކެވެ.

ސައޫދީ ކުލަބުތަކުން މި އަހަރުގެ ހޫނު މޫސުމުގައި ފުޓުބޯޅައިގެ ބޮޑެތި ބައެއް ނަންތަކަށް ފައިދާހުރި ކޮންޓްރެކްޓްތަކެއް ވަނީ ހުށަހަޅާފައެވެ. ކަރީމް ބެންޒެމާ އަލް އިއްތިހާދާ ގުޅިފައިވާއިރު އެންގޯލޯ ކާންޓޭއާއި ކަލިޑޫ ކައުބާލީވެސް ވަނީ ސައޫދީ ޕްރޯ ލީގަށް ބަދަލުވެފައެވެ.