އެމްޕޮލީގެ ކީޕަރު ވިކާރިއޯ ޓޮޓެންހަމްއަށް

ޓޮޓެންހަމް ހޮޓްސްޕާސް އިން އެމްޕޮލީގެ ކީޕަރު، ވިކާރިއޯ އާއެކު އެއްބަސްވުމުގައި ސޮއިކޮށްފިއެވެ.

އުމުރުން 26 އަހަރުގެ ކީޕަރު ޓޮޓެންހަމާ އެކު ފަސް އަހަރުގެ ކޮންޓްރެކްޓަކަށް އެއްބަސްވެފައިވާއިރު، މިއީ މި މަހުގެ ކުރީކޮޅު ޑެޖާން ކުލުސެވްސްކީ ދާއިމީ އެއްބަސްވުމެއްގެ ދަށުން ޓޮޓެންހަމާ ގުޅުނު ފަހުން ހޫނު މޫސުމުގެ ޓްރާންސްފާ ވިންޑޯގައި އެ ކްލަބުން ސޮއިކުރި ދެވަނަ ކުޅުންތެރިޔާއެވެ.

މިދިޔަ ސީޒަނުގައި އިޓާލިއަން ލީގުގެ އެމްޕޮލީ އަށް 31 މެޗު ކުޅެދިން ވިކަރިއޯ އަކީ އިޓަލީގެ ސްކޮޑުގައި ފުރަތަމަ ޗޮއިސް ގޯލްކީޕަރު ޖިއަންލުއިޖީ ޑޮނަރުއްމާގެ ފަހަތުން ދެވަނަ ޗޮއިސް ކީޕަރެވެ.

މި ޓްރާންސްފާ ވިންޑޯގައި ޓޮޓެންހަމުން އާ ގޯލްކީޕަރެއް ސޮއިކުރުމަކީ އިސްކަމެއް ދީގެން ކުރި ކަމެކެވެ. އެއީ އެ ޓީމުގެ ކެޕްޓަން ހޫގޯ ލޮރިސް 2012 ވަނަ އަހަރު ލިޔޯން އިން ގުޅުނުތާ 11 އަހަރު ފަހުން އެ ކުލަބު ދޫކޮށްލަން ގަސްދުކުރާ ކަމަށް ބުނުމުންނެވެ.

ސައުދީ ކުލަބުތަކުން ޓޮޓެންހަމްގެ ސޮން ހޯދަން މަސައްކަތް ކުރިނަމަވެސް ރިޕޯޓުތަކުން ދައްކާގޮތުން އޭނާ ޓީމުގައި މަޑުކުރާނެއެވެ.

އަންނަ ޖުލައި މަހުގެ އެއްވަނަ ދުވަހު ރަސްމީކޮށް މަސައްކަތް ފަށާ އައު ކޯޗު ޕޯސްޓެކޮގްލޫ އައުމުގެ ކުރިން ސްޕާސް އިން އަންނަނީ ސްކޮޑު އަލުން ބައްޓަން ކުރަން މަސައްކަތް ކުރަމުންނެވެ.