ހއ. ހޯރަފުށީގައި މިއަދުވެސް ވަރަށް ފޯރިގަދަކޮށް ޢީދުގެ ހަރަކާތްތައް އެބަ ކުރިއަށް ގެންދެއެވެ.

ޢީދުގެ ހަރަކާތްތައް ކުލަ ގަދަކޮށް އެ ރަށުގައި ކުރިއަށް ގެންދާއިރު، އަންގާރަ ދުވަހުގެ ރޭ 08:50 ގައި ޢީދު ހަރަކާތްތައް ފަށާފައި ވަނީ ޢީދު ވެދުމާއި ދިއުމުގެ ހަރަކާތަކާއި އެކުގައެވެ.

އެ ހަރަކާތުގައި ރަށުގެ ކުދިބޮޑު ގިނަ އަދަދެއްގެ މީހުން ބައިވެރިވެފައިވެއެވެ. އެ ހަރަކާތް ކުރިއަށް ދިޔައީ ވަރަށް މަޖާ، އެންމެންނަށް ވެސް ގަޔާވާނެ ފަދަ ސަގާފީ ގޮތަކަށެވެ. ޢީދު ކުޅިވަރުތައް ފެށުމަށް ރަށުގެ އިސް ފަރާތުގެ ހުއްދަ ހޯދުމަށް ދިއުމަކީ ސަގާފީ ގޮތުން އިހު ޒަމާނުއްސުރެ ދިވެހިން ކޮށްއުޅޭ ކަމެކެވެ. އީދު ވެދުމާއި ދިއުމަކީ އެއީއެވެ.

އޭގެ ފަހުން، ޢީދު މަޅި ރޯކުރުން ނުވަތަ އީދު ހުޅު ރޯކުރުން ވަނީ ބާއްވާފައެވެ.

ބުދަ ދުވަހުގެ ހަރާކަތްތައް ފަށާފައި ވަނީ ބޮޑު ޖަމާއަތުގައި ކުރިއަށް ދިޔަ ޢީދު ނަމާދާއި އެކުގައެވެ.

އެއަށް ފަހު އޮތީ ވަރަށް ތަފާތު ސަގާފީ ކޭމެކެވެ. ޖުމުލަ 20 ކޭން ހިމެނޭގޮތަށް ކުރިއަށް ގެންދިޔަ މި ހަރަކާތުގައި ކޭމުގެ ގޮތުގައި ތައްޔާރު ކުރީ އަވެލިއެވެ. އެ ކޭން ތައްޔާރުކުރުމުގެ ކުރިން ކެމަށް ބޭނުންވާ ތަކެތި ހުރީ މަލާފަތަށް އަޅާ، ހުދު ފޮތިން ބަނދެފައެވެ.

ކޭން ތައްޔާރުކުރުން ފަށާފައި ވަނީ މަޝްހޫރު މެޖީޝިއަން ޝަރީފް ކޭން އިފްތިތާހުކުރުމުގެ ގޮތުން ކޭމުގެ ގޮށް މޮހާ، އެ ކޭން އިފްތިތާހުކޮށްދިން ހިސާބުންނެވެ.

އަވެލި އަކީ ދިވެހިން ޢީދު ދުވަހާއި، އެހެން ވެސް ސަގާފީ ގޮތުން ފާހަގަކުރާ ދުވަސްތަކާއި، މާހެފުން ފަދަ މުނާސަބަތުތަކާއި ދިމާކޮށް ކައި އުޅޭ ފޮނި އެއްޗެކެވެ. އާއްމުކޮށް މި ކެއުން ކައި އުޅެނީ ވަޅޯ މަހާއި އެކުގައެވެ.

މި ކޭމުގައި ރަށުގެ ރައްޔިތުންގެ އިތުރުން، ރަށަށް ޒިޔާރަތްކުރި މެހެމާނުން ވެސް ވަނީ ބައިވެރިވެފައެވެ.

އެއަށް ފަހު އުލްޙިޔާ ކަތިލުން އޮތެވެ.

އެ ރަސްމިއްޔާތުގައި އައްޝައިހު އަހުމަދު ވަހީދު ވަނީ އުލްހިޔާ ކަތިލުމުގެ މާތްކަމާއި މެދު މައުލޫމާތު ދެއްވާފައެވެ.

އުލްހިޔާ ކަތިލުމުގެ ހަރަކާތަށް ވިޔަފާރިވެރިންނާއި، އިދާރާތަކާއި، އިދާރާތަކުގެ އިސް ބައެއް ފަރާތްތަކުގެ ދީލަތި އެހީ ވަނީ ލިބިފައެވެ.

އުލްހިޔާ ކަތިލުމުގެ ކަންކަން ކުރިއަށް ދިޔަ އިރު އެ މަންޒަރު ބަލާލުމަށް ގިނަ އަދަދެއްގެ އާއްމުން ވަނީ ޖަމާވެފައެވެ.

ހޯރަފުށީގައި ޢީދާއި ގުޅިގެން މުނިފޫހިފިލުވުމުގެ ގިނަ ހަރަކާތްތަކެއް ކުރިއަށް ގެންދިއުމަށް ވަނީ ހަމަޖެހިފައެވެ. އަދި ހަވާ އެރުވުމަށް ވެސް ވަނީ ހަމަޖެހިފައެވެ. އެ ހަރަކާތް އޮންނާނީ ރަށްވެހި ފަންނުގައި ބުދަ ދުވަހުގެ ރޭ 08:30ގައެވެ.