ޕާކިސްތާނުގައި ހިންގި ހަމަނުޖެހުންތަކާ ގުޅިގެން އަސްކަރިއްޔާގެ ޖެނެރަލަކު މަގާމުން ވަކިކޮށްފި

ޕާކިސްތާނުގެ ކުރީގެ ބޮޑުވަޒީރު އިމްރާން ޚާނަށް ތާއީދުކުރާ ފަރާތްތަކުން, އަސްކަރީ އުޅަނދުތަކަށް އަމާޒުކޮށް ހިންގި ހަމަނުޖެހުން ދިފާއުނުކުރެވުމުގެ ސަބަބުން (ލެފްޓިނެންޓް ޖެނެރަލެއް ހިމެނޭގޮތުން) ޕާކިސްތާނުގެ އަސްކަރީ އޮފިސަރުންތަކެއް މަގާމުން ވަކިކޮށްފިއެވެ.

ޕާކިސްތާނުގެ އަސްކަރިއްޔާގެ އެތެރޭގައި ހިންގި އިންކުއަރީއަކުން ނިންމި ނިންމުން މިގޮތަށް އާންމުކުރުމަކީ ވަރަށް މަދުން ނޫނީ ނުކުރާކަމެކެވެ.

މިދިޔަ މަހު ހިންގި ހަމަނުޖެހުމާ ގުޅޭގޮތުން ނޫސްވެރިންނާ ވާހަކަފުޅުދައްކަވަމުން، މޭޖަރ ޖެނެރަލް އަހުމަދު ޝާރިފް ޗައުދަރީ ވިދާޅުވީ މަދުވެގެން 102 މީހުންގެ މައްޗަށް އަސްކަރީ ކޯޓުތަކުގައި ދައުވާތައް ކުރިޔަށްދާކަމަށެވެ. މި މީހުންގެ ތެރޭގައި ހިމެނެނީ އާންމުންގެ ކިތައް މީހުން ކަމެއް، އަދި އަސްކަރީ ކިތައް މީހުންނެއްކަމެއް ޗައުދަރީ ހާމައެއްނުކުރައްވައެވެ. އަދި މަގާމުން ވަކިކުރި އޮފިސަރުންގެ ނަންތައް ހާމަކުރެއްވުމަށް ޗައުދަރީ ދެކޮޅު ހެއްދެވިއެވެ.

އިންސާނީ ހައްގުތަކަށް މަސައްކަތްކުރާ ގްރޫޕްތަކުން ވަނީ، ޕާކިސްތާނުގެ އާންމު ރައްޔިތުންގެ މައްޗަށް އަސްކަރީ ކޯޓުތަކުގައި ދައުވާތައް ކުރިޔަށްދާތީ އެކަމުގެ ކަންބޮޑުވުން ފާޅުކޮށްފައެވެ. އެމީހުންނަށް ދިފާއުވުމުގެ ފުރުސަތު ނުލިބޭނެކަމަށް ބުނެ މިގްރޫޕްތަކުން ކަންބޮޑުވުން ފާޅުކުރަމުންދާއިރު، މިއަޑުއެހުންތަކާ ގުޅިގެން ސްޕްރީމް ކޯޓަށް ވަނީ ތިން ޕެޓިޝަނެއް ހުށަހަޅާފައެވެ. އޭގެތެރެއިން އެއް ޕެޓިޝަން ހުށަހެޅީ އިމްރާން ޚާން ނިސްބަތްވެވަޑައިގަންނަވާ ޕާޓީންނެވެ.

މެއި މަހު އިމްރާން ޚާންގެ ސަޕޯޓަރުން ވަނީ އަސްކަރީ ތަކެއްޗަށް ގެއްލުންދީފައެވެ. އޭތެރޭގައި އެއަރ ބޭހަކާއި ޖެނެރަލަކު އުޅުއްވާ ގެކޮޅާއި އާރމީގެ ހެޑްކުއަރޓަރތައް ވެސް ހިމެނެެއެވެ. މިހަމަނުޖެހުންތަކުގައި 5000ށްވުރެ ގިނަ މީހުން ހައްޔަރުކުރިއެވެ. ނަމަވެސް ފަހުން ވަރަށް ގިނަ މީހުން ދޫކޮށްލިއެވެ.

ނޫސްވެރިންނާ ވާހަކަފުޅުދައްކަވަމުން ޗައުދަރީ ވިދާޅުވީ، ސެކިޔުރިޓީ ބްރީޗްވި ގޮތް ހޯދުމަކީ އަމާޒެއްކަމަށާއި ގޯސްކޮށް ދިޔައީ ކޮންކަމެއްކަން އެނގެންޖެހޭކަމަށެވެ.

ޗައުދަރީ އިތުރަށް ވިދާޅުވީ މޭޖަރ ޖެނެރަލުންގެ ބެއްލެވުމުގެ ދަށުން ދެ ޑިޕާޓްމަންޓެއްގައި އިންކުއަރީ ކުރިޔަށްގެންގޮސްފައި ވާކަމަށެވެ. އަދި އަދަބުވެސް ކަނޑައަޅާފައިވަނީ އިންކުއަރީގެ ރެކޮމެންޑޭޝަނަށް ބެލުމަށްފަހު ކަމަށް ޗައުދަރީ ވިދާޅުވިއެވެ.

މީގެއިތުރުން ޑިޕާޓްމަންޓް ލެވެލްގައި 15 އާރމީ އޮފިސަރަކަށް ހަރުކަށި ފިޔަވަޅު އަޅާފައިވާކަމަށާއި އޭގެތެރޭގައި މޭޖަރ ތިން ޖެނެރަލުންނާއި ހަތް ބްރިގޭޑިއަރ ޖެނެރަލުން ހިމެނޭކަމަށް ޗައުދަރީ ވިދާޅުވިއެވެ. މިއީ އަސްކަރިއްޔާ ޖަވާބުދާރީ ކުރުވުމަށް ކުރިޔަށް ގެންގޮސްފައިވާ ކަންތައްތަކެއް ކަމަށް ވިދާޅުވިއެވެ.

މީގެއިތުރުން ސީނިއަރ އޮފިސަރުންގެ ގާތްތިމާގެ މީހުން (އޭގެތެރޭގައި އަންހެނުންވެސް ހިމެނޭގޮތުން) ދައުވާތަކާ ކުރިމަތިލާން ޖެހިފައިވާކަމަށް ޗައުދަރީ ވިދާޅުވިއެވެ. އެމީހުންގެ މައްޗަށް ދައުވާކުރަނީ ހަމަނުޖެހުމަށް މަގުފަހިކޮށްދިނުމުގެ ކުށުގައެވެ.

އަސްކަރިއްޔާއިން ތުހުމަތުކުރާ ގޮތުގައި މިމަހަނުޖެހުމަކީ އިމްރާން ޚާންގެ ޕާޓީން ދުރާލައި ރާވައިގެން ހިންގާފައިވާ ހަމަނުޖެހުމެކެވެ.