ކްރިސްޓަލް ޕެލެސްގެ ކޯޗުގެ މަގާމުގައި އަންނަ ސީޒަނުގައި މަޑުކުރަން ރޯއީ ހޮޖްސަން ނިންމައިފިއެވެ.

އުމުރުން 75 އަހަރުގެ ހޮޖްސަން މިވަގުތު ޗުއްޓީގައި ހުރި ނަމަވެސް އެނބުރި އަންނައިރު ކުރިއަށް އޮތް ސީޒަނަށް ކޮންޓްރެކްޓްގައި ސޮއިކުރާނެ ކަމަށް ބެލެވެއެވެ. ހޮޖްސަން އެނބުރި ޕްލެސް އަށް އައީ މިދިޔަ މާޗް މަހު ޕެޓްރިކް ވިއޭރާގެ ބަދަލުގައި ސީޒަން ނިމެންދެން އެއްބަސްވުމެއްގެ ދަށުންނެވެ.

އޭނާ ވަނީ ޕެލެސް ރެލިގޭޝަން ޒޯނުން ސަލާމަތް ކޮށްދިނުމަށް އެހީތެރިވެދީ، އޭނާ އިރުޝާދުދިން 10 މެޗުން 18 ޕޮއިންޓް ހޯދައި ޕްރިމިއާ ލީގުގެ 11 ވަނަ އަށް ޓީމު ގެންގޮސްދީފައެވެ.

ހޮޖްސަން 2017 ވަނަ އަހަރުން ފެށިގެން ޕެލަސްގައި ހަތަރު އަހަރު ހޭދަކުރި ނަމަވެސް 2021 ވަނަ އަހަރުގެ ހޫނު މޫސުމުގައި އޭނާ ވަނީ ފުޓްބޯޅައާ ދުރަށް ދާން ނިންމައިފައެވެ. އޭގެ ފަހުން 2022 ވަނަ އަހަރުގެ ޖެނުއަރީ މަހު ވަޓްފޯޑްގެ ކޯޗުގެ މަގާމަށް އޭނާ ހަމަޖެއްސި ނަމަވެސް އޭގެ ފަސް މަސް ފަހުން އެ ޓީމު ރެލިގޭޓްވުމުން އޭނާ ވަނީ އެ ޓީމު ދޫކޮށްލައިފައެވެ.

ހޮޖްސަން އެނބުރި އޭނާގެ ކުރީގެ ކުލަބަށް އައުމުގެ ކުރިން ވިއޭރާގެ އިރުޝާދުގެ ދަށުން ކުޅުނު ހުރިހާ މުބާރާތެއްގައި ވެސް ޕެލަސް އަށް 12 މެޗުން މޮޅެއް ލިބިފައެއް ނުވެއެވެ.

އޭނާގެ މެނޭޖްރިއަލް ކެރިއަރުގައި 45 އަހަރަށް ވުރެ ދިގު މުއްދަތެއް ހޭދަކޮށްފައިވާއިރު، އޭގެ ތެރޭގައި އިންޓަ މިލާން، ބްލެކްބާން، ފުލަމް، ލިވަޕޫލް، ވެސްޓް ބްރޮމް އަދި ޕެލެސްގައި މަސައްކަތްކޮށްފައިވާއިރު، ސްވިޒަލޭންޑް، ޔުނައިޓެޑް އަރަބް އެމިރޭޓްސް އަދި ފިންލޭންޑްގެ ގައުމީ ޓީމުތަކުގައި ވެސް އޭނާ ވަނީ ކޯޗުކަން ކޮށްފައެވެ.