ފަހު ވަގުތު ޕެލަސް އަތުން ލިވަޕޫލް ބަލިވެއްޖެ

އިނގިރޭސި ޕްރިމިއާ ލީގުގައި ކްރިސްޓަލް ޕެލަސްއާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން ލިވަޕޫލް ބަލިވެއްޖެ އެވެ.

ޕެލަސްގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗުގައި އެ ޓީމުން ވަނީ 2-1 އިން ލިވަޕޫލްގެ މައްޗަށް ކުރި ހޯދައިފަ އެވެ. މެޗުގައި ޕެލަސް އިން ލަނޑު ޖަހައި ކުރި ހޯދާފައި ވަނިކޮށް، ލިވަޕޫލް އިން ނަތީޖާ ހަމަހަމަ ވެސް ކުރި އެވެ. ނަމަވެސް، މެޗުގެ ފަހު ވަގުތުގައި ލަނޑު ޖަހައިގެން ޕެލަސް ވަނީ މޮޅުވެފަ އެވެ.

މެޗު ފަށައިގެން ނުވަަ ވަނަ މިނެޓުގައި ޕެލަސް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އިސްމާއީލާ ސާރް އެވެ. އޭގެ ފަހުން މެޗުގައި ލަނޑު ޖަހައި ނަތީޖާ ހަމަހަމަ ކުރުމަށް ލިވަޕޫލް އިން ވަނީ ވަރަށް ބޮޑަށް މަސައްކަތް ކޮށްފަ އެވެ.

މެޗުގެ ނަތީޖާ ހަމަހަމަ ކުރުމަށް ލިވަޕޫލް އިން ކުރި މަސައްކަތް އެ ޓީމަށް ކާމިޔާބު ކުރެވުނީ މެޗުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށެވެ. އެ ލަނޑު ޖަހައި ލިވަޕޫލް އަށް ނަތީޖާ ހަމަހަމަ ކޮށްދިނީ ފެޑެރިކޯ ޗިއެސާ އެވެ.

ނަމަވެސް، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލަނޑު ޖަހައިގެން ޕެލަސް ވަނީ ލިވަޕޫލްގެ މައްޗަށް ކުރި ހޯދައިފަ އެވެ. މާކް ގުއެހީ ތަނަވަސްކޮށްދިން ފުރުސަތެއްގައި ޕެލަސް އަށް އެ ލަނޑު ޖަހައިދިނީ އެޑީ އެންކެޓިއާ އެވެ.

މިއީ މި ސީޒަންގެ ޕްރިމިއާ ލީގުގައި ޗެމްޕިއަން ލިވަޕޫލް ބަލިވި ފުރަތަމަ މެޗެވެ. މިހާތަނަށް ލީގުގައި ކުޅެފައިވާ ހަ މެޗުގެ ތެރެއިން ފަސް މެޗުން ލިވަޕޫލް މޮޅުވެފައިވެ އެވެ. ހަ މެޗުން 15 ޕޮއިންޓާ އެކު ލިވަޕޫލް އޮތީ ވެސް އެއް ވަނައިގަ އެވެ.