ޕެލަސް ކައިރިން ސިޓީ ފުއްދާލަން ޖެހުނީ ޕޮއިންޓަކުން

އިނގިރޭސި ޕްރިމިއާ ލީގުގައި ކްރިސްޓަލް ޕެލަސްއާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން މެންޗެސްޓަރ ސިޓީ އެއްވަރުވެއްޖެ އެވެ.

ޕެލަސްގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު ނިމުނީ 2-2 އިން އެއްވަރުވެގެންނެވެ. މިވަގުތު ނަތީޖާ ދަށްވެ ޙާލަތު ގޯސްވެފައިވާ ސިޓީ ކޮޅަށް ދެ ފަހަރެއްގެ މަތިން ޕެލަސް އިން ލަނޑު ޖަހައި ކުރި ވެސް ހޯދި އެވެ. ނަމަވެސް ސިޓީން ވަނީ ނަތީޖާ ހަމަހަމަ ކޮށްފަ އެވެ.

މެޗު ފަށައިގެން ހަތަރު ވަނަ މިނެޓުގައި ޕެލަސް އަށް ލަނޑު ޖަހައި ކުރި ހޯދައިދިނީ ޑެނިއަލް މުނޯޒް އެވެ. ނަމަވެސް ފުރަތަމަ ހާފުގެ 30 ވަނަ މިނެޓުގައި ނޯވޭގެ ފޯވާޑު އާލިން ހާލަންޑު ވަނީ ލަނޑު ޖަހައި ސިޓީ އަށް ނަތީޖާ ހަމަހަމަ ކޮށްދީފަ އެވެ. އެ ލަނޑު އޭނާ ޖެހީ މަތެއުސް ނޫނޭސް ތަނަވަސްކޮށްދިން ފުރުސަތެއްގަ އެވެ.

ދެ ވަނަ ފަހަރަށް މެޗުގައި ޕެލަސް އިން ލީޑު ނެގީ ދެ ވަނަ ހާފު ފަށައިގެން އެގާރާ ވަނަ މިނެޓުގަ އެވެ. އެ ލަނޑު ޕެލަސް އަށް ޖަހައިދިނީ މެކްސެންސް ލަކްރޯޝް އެވެ. އޭގެ ފަހުން މެޗުގެ 68 ވަނަ މިނެޓުގައި ރީކޯ ލެވިސް ވަނީ ލަނޑު ޖަހައި ދެ ވަނަ ފަހަރަށް ސިޓީ އަށް ނަތީޖާ ހަމަހަމަ ކޮށްދީފަ އެވެ. އެ ލަނޑުގެ ފަހުން 84 ވަނަ މިނެޓުގައި ލެވިސް އަށް ވަނީ ދެ ވަނަ ރީނދޫ ކާޑާ އެކު ރަތް ކާޑު ދައްކައިފަ އެވެ.

ނަތީޖާ އާއެކު ލީގު ތާވަލްގެ ހަތަރު ވަނައިގައި ސިޓީ އޮތީ މިހާތަނަށް އެ ޓީމު ކުޅެފައިވާ 15 މެޗުން 27 ޕޮއިންޓު ހޯދައިގެންނެވެ. ސިޓީ އަތުން ހޯދި ޕޮއިންޓާ އެކު ޕެލަސް 16 ވަނައިގައި އޮތީ 13 ޕޮއިންޓާއެކު އެވެ. މިފަހުން އައިސް ސިޓީގެ ނަތީޖާތައް އިންތިހާ އަށް ދަށްވެފައިވާއިރު، ހަތް މެޗު އެ ޓީމުން ނިންމާލީ މޮޅެއް ނުހޯދި އެވެ. ހަތް މެޗަށްފަހު ސިޓީ އަށް މޮޅެއް ހޯދުނީ ލީގުގައި ނޮޓިންހަމް ފޮރެސްޓާ ދެކޮޅަށް ކުޅުނު މެޗުގަ އެވެ.