ދިވެހި ދެ ޙައްޖާޖީން އައިސީޔޫގައި

މިއަހަރުގެ ޙައްޖުގެ އަޅުކަން އަދާކުރުމަށް ދިޔަ ދިވެހި ޙައްޖާޖީންގެ ތެރެއިން ދެ ޙައްޖާޖީއެއްގެ ހާލު ސީރިއަސްވެގެން އައިސީޔޫގައި ފަރުވާމެދުން އަންނަ ކަމަށް އިސްލާމިކް މިނިސްޓްރީގެ ސްޓޭޓް މިނިސްޓަރު މުޙައްމަދު އަނިލް ވިދާޅުވެއްޖެއެވެ.

ސައުދީއަރައްބިޔާގައި ހުންނަވައިގެން ރާއްޖޭގެ މީޑިއާއަކަށް މައުލޫމާތު ދެއްވަމުން އަނިލް ވިދާޅުވީ އައިސީޔޫގައި ތިބި ނަމަވެސް އެ ދެ މީހުން އަރަފާތު ބިމަށް ގެންދިއުމަށް މަސައްކަތް ކުރަމުން އަންނަ ކަމަށެވެ. އެގޮތުން، އޮކްސިޖަން ގުޅައިގެން ވެސް ސައުދީ ސަރުކާރުން ޙައްޖުވެރިން އަރަފާތު ބިމަށް ގެންގޮސްދދޭ ކަމަށާއި އެގޮތަށް ގެންދަން ޖެހުނު ނަމަވެސް އެކަން ކުރުމަށް މަސައްކަތް ކުރަމުން އަންނަކަން އޭނާ ފާހަގަކުރެއްވިއެވެ.

އަނިލް ވިދާޅުވިގޮތުގައި ހާލު ދެރަވެގެން އައިސީޔޫގައި ފަރުވާ ދެމުންދަނީ އުމުރުން ދުވަސްވީ ދެ މީހަކަށެވެ.

ޙައްޖަށް ދިޔަ ދިވެހިންގެ ހާލު އާއްމުކޮށް ރަނގަޅު ކަން ފާހަގަކުރައްވައި އަނިލް ވަނީ އައިސީޔޫގައި ތިބި ދެ ޙައްޖުވެރިންގެ އިތުރުން ބާކީތިބި ހުރިހާ ޙައްޖުވެރިންނަށް ވެސް އަރަފާތު ބިމަށް ދެވުނު ކަމަށެވެ. އަދި އަރަފާތު ބިމުގައި ހޫނު ގަދަކަމުން ހުރިހާ ޙައްޖުވެރިންވެސް ކުޑަ އަަޅައިގެން އުޅުމަށާއި ގިނަގިނައިން ދިޔާތަކެތި ބޭނުން ކުރުމަށް ސައުދީ ސަރުކާރުން އިލްތިމާސްކުރާކަން ވެސް އޭނާ ފާހަގަކުރެއްވިއެވެ.

މިއަހަރުގެ ޙައްޖުގެ އަޅުކަން އަދާ ކުރުމަށް ސައުދީން ރާއްޖެއަށް 1000 ކޯޓާދިނެވެ. އޭގެތެރެއިން ޙައްޖު ކޯޕަރޭޝަނާއި އަދި އަމިއްލަ ތިން ކުންފުންޏެއްގެ ބެލުމުގެ ދަށުން ދިވެހި ޙައްޖުވެރިން ވަނީ ސައުދީއަށް ގޮސްފައެވެ. ޙައްޖާޖީންގެ ފުރަތަމަ ފްލައިޓު ރާއްޖެއިން ފުރީ މި މަހުގެ 12ވީ ބުދަ ދުވަހުއެވެ. އޭގެ ފަހުން މިމަހުގެ 13، 15، 16 އަދި 19 ވަނަދުވަހުގެ ފްލައިޓްތަކުންވެސް ޙައްޖުވެރިންވަނީ ފުރާފައެވެ.

މިއަހަރު އަމީރުލް ޙައްޖުގެ ގޮތުގައި ރައީސުލްޖުމްހޫރިއްޔާ ކަނޑައަޅުއްވާފައިވަނީ، ރައީސުލްޖުމްހޫރިއްޔާގެ ނާއިބު ފައިޞަލް ނަސީމެވެ.