ހައްޖުވެރިންގެ އެންމެ ފަހު ގްރޫޕު ރާއްޖެ އަތުވެއްޖެ
290 ހައްޖުވެރިން ފަހު ގްރޫޕުން އައިސްފައިވޭ
އެންމެ ފަހު ގްރޫޕުގައި ހިމެނޭ ހައްޖުވެރިންނަށް ނާއިބުރައީސް މަރުހަބާ ދެންނެވުން
މިއަހަރު ރާއްޖެއިން ހައްޖަށްދިޔަ ހައްޖުވެރިންގެ އެންމެ ފަހު ގްރޫޕު ރާއްޖެ އަތުވެއްޖެއެވެ.
އެންމެ ފަހު ގްރޫޕުގައި ހިމެނެނީ މޯލްޑިވްސް ހައްޖު ކޯޕަރޭޝަންގެ ހަވާލުގައި ހައްޖަށް ދިޔަ ހައްޖުވެރިންނެވެ. އެންމެ ފަހު ގްރޫޕުގައި 290 ހައްޖުވެރިން ހިމެނެއެވެ.
ރައީސުލްޖުމްހޫރިއްޔާގެ ނައިބު އަދި މިއަހަރުގެ އަމީރުލް ހައްޖު، ފައިސަލް ނަސީމް ވަނީ ހައްޖުވެރިންގެ އެންމެ ފަހު ގްރޫޕަށް ވެލާނާ އިންޓަރނޜޭޝަނަލް އެއަރޕޯޓުން މަރުހަބާ ވިދާޅުވެފައެވެ. އަދި ހައްޖުވެރިންގެ ކަންކަން އެމަނިކުފާނު ވަނީ ބައްލަވާފައެވެ.
މިއަހަރު ރާއްޖެއިން 1،000 މީހުންނަށް ހައްޖުގެ މަތިވެރި އަޅުކަން އަދާކުރުމުގެ ފުރުސަތު ލިބިފައިވެއެވެ. ކުރިއަށް އޮތް ތަނުގައި އިތުރު މީހުންނަށް ހައްޖުގެ އަޅުކަން އަދާކުރުމުގެ ފުރުސަތު ފަހިކޮށްދިނުމަށް ކޯޓާ އިތުރުކުރުމަށް މަސައްކަތްކުރަމުންދާކަމަށް ސަރުކާރުން މީގެ ކުރިން ވަނީ ބުނެފައެވެ.
