ސްކޮޓްލޭންޑުގެ ކޯޗުކަމުގައި އެންމެ ގިނަ ދުވަހު ހުރި ކްރެއިގް ބްރައުން މަރުވެއްޖެ

ސްކޮޓްލޭންޑްގެ ގައުމީ ޓީމަށް އެންމެ ގިނަ ދުވަހު ކޯޗުކަން ކުރި ކްރެއިގް ބްރައުން އުމުރުން 82 އަހަރުގައި މަރުވެއްޖެއެވެ.

ބްރައުން މަރުވިކަން އިއުލާނުކުރީ އެބާޑީންނެވެ. އޭނާއަކީ އެ ކުލަބުގެ ކުރީގެ މެނޭޖަރާއި ޑައިރެކްޓަރެއްގެ އިތުރުން ކްލަބް އެމްބެސެޑަރެއްގެ ގޮތުގައި ހުރި މީހެކެވެ.

ބްރައުންއަކީ 1998 ވަނަ އަހަރު ސްކޮޓްލެންޑް ވޯލްޑް ކަޕަށް ގެންގޮސްދިން ކޯޗެވެ. އޭގެ ފަހުން ސްކޮޓްލޭންޑް ވޯލްޑް ކަޕަށް ކޮލިފައި ވެފައެއް ނުވެއެވެ. އޭނާ ވަނީ 1993ން 2001ށް އެ ޓީމާ ހަވާލުވެފައެވެ. މީގެ އިތުރުން އޭނާ ވަނީ 1996 ވަނަ އަހަރު ސްކޮޓްލެންޑް ޔޫރަޕިއަން ޗެމްޕިއަންޝިޕަށް ގެންގޮސްދީފައެވެ.

ކުލަބު ކެރިއަރަށް ބަލާއިރު އޭނާ ވަނީ ޕްރެސްޓަން، މަދަރވެލް އަދި އެބާޑީން މެނޭޖްކޮށް 2013 ވަނަ އަހަރު ކެރިއަރު ނިންމާލާފައެވެ. އެއަށްފަހު ބޯޑާ ގުޅެން ދައުވަތު ދިނެވެ.

ކުޅުންތެރިއެއްގެ ހައިސިއްޔަތުން ބްރައުން 1962 ވަނަ އަހަރު ޑަންޑީއާއެކު ސްކޮޓިޝް ލީގު ޗެމްޕިއަންކަން ހޯދި ނަމަވެސް އަނިޔާގެ ސަބަބުން އޭނާގެ ކެރިއަރު ވަނީ ކުރުވެފައެވެ.