ރެލިގޭޓްވެފައިވާ ލެސްޓާ ސިޓީގެ މިޑްފީލްޑަރު ޖޭމްސް މެޑިސަން ގަތުމާ ވަރަށް ގާތަށް ޓޮޓެންހަމުން ޖެހިލައިފިއެވެ.

އެ ކުލަބުން އޭނާ ގަތުމަށް ހުށަހަޅަނީ 40 މިލިއަން ޕައުންޑެވެ. ލެސްޓާއިން ކިޔަނީ މިއަގު 60 މިލިއަން ޕައުންޑަށް އިތުރުކޮށްދިނުމަށެވެ. މެޑިސަން ގަތުމަށް ޓޮޓެންހަމުގެ ވާދަވެރިއަކަށް އޮތީ ނިއުކާސަލް ޔުނައިޓެޑެވެ.

ޓޮޓެންހަމުގެ އައު ކޯޗު އެންޖް ޕޮސްޓެކޮގްލޫ ޓީމާ ހަވާލުވުމަށްފަހު ގެންނަން އެންމެ ބޮޑަށް ބާރު އަޅަމުންދާ ކުޅުންތެރިއަކީ ވެސް މެޑިސަންއެވެ.

އިނގިރޭސި ބައެއް މީޑިޔާތަކުން ބުނަނީ ކުޅުންތެރިޔާ ޓޮޓެންހަމަށް ދާން ބޭނުންވާތީ ދެ ކުލަބުން މިހާރު އަގަކާމެދު އެއްބަސްވެފައި ވާކަމަށެވެ. އެއީ 50 މިލިއަން ޕައުންޑް ކަމަށާއި މިހާރު ކުރިއަށްދަނީ އެގްރީމަންޓް ނިންމުމުގެ މަރުހަލާ ކަމަށެވެ.

2015 ވަނަ އަހަރުގެ ޕްރެމިއާ ލީގުގެ ޗެމްޕިއަން ލެސްޓާ ރެލިގޭޓްވުމާއެކު ޓީމުގެ މުހިންމު ގިނަ ކުޅުންތެރިން ވިއްކާލަން ވަނީ މަޖުބޫރުވެފައެވެ.