ލޫކާ މޮޑްރިޗް ރެއާލް މެޑްރިޑާއެކު އެއް އަހަރު ދުވަހުގެ އެއްބަސްވުމެއްގައި ސޮއިކޮށްފިއެވެ.
ކްރޮއޭޝިއާގެ މިޑްފީލްޑަރުގެ ކޮންޓްރެކްޓް ހަމަވާން ކައިރިވެފައިވާ އިރު، ސައުދީ ޕްރޯ ލީގުގެ ބައެއް ޓީމުތަކުން ވަނީ އޭނާ ހޯދުމަށް މަސައްކަތް ކޮށްފައެވެ. އަދި އޭނާ ސައުދީ ލީގަށް ބަދަލުވާނެ ކަމަށްވެސް ބޭރުގެ ގިނަ މީޑިއާތަކަކުން ވަނީ ރިޕޯޓުކޮށްފައެވެ.
އުމުރުން 37 އަހަރުގެ މޮޑްރިޗް ވަނީ 2012 ވަނަ އަހަރު ޓޮޓެންހަމުން އައި ފަހުން ރެއާލް އަށް 488 މެޗު ކުޅެދީ، ސްޕެނިޝް ލީގު ތިން ފަހަރު އަދި ޗެމްޕިއަންސް ލީގު ފަސް ފަހަރު ކާމިޔާބުކޮށްފަ އެވެ. މީގެއިތުރުން އޭނާ ވަނީ 2018 ވަނަ އަހަރު ކްރޮއޭޝިއާ ވޯލްޑް ކަޕް ފައިނަލަށް ދަތުރުކުރި އިރު ބެލޮން ޑިއޯ ވެސް ކާމިޔާބުކޮށްފަ އެވެ.
މި އަހަރުގެ ހޫނު މޫސުމުގައި ޓޮނީ ކްރޫސް، ޑެނީ ސެބާޔޯސް އަދި ނަޗޯ ފެނާންޑޭޒް ވަނީ އެ ކުލަބާއެކު ހަދާފައިވާ އެއްބަސްވުމުގެ މުއްދަތު އިތުރުކޮށްފައެވެ. މޮޑްރިޗަކީ އަދިވެސް 14 ފަހަރު ޔޫރަޕްގެ ޗެމްޕިއަންކަން ހޯދާފައިވާ ރެއާކް މެޑްރިޑްގެ މުހިއްމު ކުޅުންތެރިއެކެވެ.
ރެއާލް އިން ވަނީ މި އަހަރުގެ ހޫނު މޫސުމުގައި ބޮރޫޝިއާ ޑޯޓްމަންޑުން އިންގްލެންޑްގެ ޖޫޑް ބެލިންހަމް ގެނައުމުގެ މަސައްކަތް ނިންމާލައި، އެ ޓީމުގެ މިޑްފީލްޑްގެ ޖާގަތަކަށް އިތުރު ވާދަވެރިކަމެއް އިތުރުކޮށްފައެވެ.
