ސަރުކާރުން މަޖިލީސް ނުހުއްޓުވާ، ޖަލްސާތައް ކުރިއަށް ނުދަނީ އެންމެ އައިޓަމެއް އެޖެންޑާ ކުރުމުން: މެންބަރު ޒިޔާދު

ސަރުކާރުން ރައްޔިތުންގެ މަޖިލިސް ނުހުއްޓުވާ ކަމަށާއި، މަޖިލީހުގެ ޖަލްސާތައް ކުރިއަށް ނުދަނީ އެންމެ އައިޓަމެއް އެޖެންޑާ ކުރުމުން ކަމަށް ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެއެވެ.

ރާއްޖެޓީވީގެ ސިޔާސީ ވެށި ޕްރޮގްރާމްގައި ވާހަކަފުޅު ދައްކަވަމުން މެންބަރު ޒިޔާދު ވިދާޅުވީ ރައްޔިތުން މަޖިލީހުގެ ޖަލްސާތަކަށް ސަރުކާރުން ހުރަސް ނާޅާ ކަމަށާއި، ޖަލްސާތައް ކުރިއަށްދާ ކަމަށެވެ. އެގޮތުން ބުރާސްފަތި ދުވަހު ވެސް ޖަލްސާ ކުރިއަށްގެންދިޔަ ކަމަށާއި، ނިމިގެން މިދިޔަ ހަފްތާތެރޭގައި ވެސް ބައެއް ބޭފުޅުން ބޭނުންވާ ކަންކަން ހާސިލުކުރުމަށް ޖަލްސާތައް ކުރިއަށް ގެންގޮސްފައިވާ ކަމަށް މެންބަރު ޒިޔާދު ވިދާޅުވިއެވެ.

މެންބަރު ޒިޔާދު ވިދާޅުވީ އެޖެންޑާގެ ތަރުތީބުން މަސައްކަތްތައް ކުރިއަށް ގެންދިއުމަށް އެދުނު ކަމަށާއި، މަޖިލީހުގެ ނައިބު ރައީސްގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށް މަސައްކަތް ކުރި ކަމަށެވެ. ނަމަވެސް އެދުވަހު މަޖިލިސްގެ ޖަލްސާ ކުރިއަށް ނުގެންގޮސް ހުއްޓާލީ ކަމަށް މެންބަރު ޒިޔާދު ވިދާޅުވިއެވެ.

މެންބަރު ޒިޔާދު ވިދާޅުވީ މަޖިލީހުގެ ރައީސްއަށް ޖަލްސާގެ ރިޔާސަތުގައި އިންނަވަން އުޒުރުވެރިވެ ވަޑައިގަންނަވާ ހާލަތުގައި ރައީސް އައްޔަން ކުރައްވާ ފަސް ބޭފުޅުންގެ ތެރެއިން އެއް ބޭފުޅަކަށް ރިޔާސަތުގައި އިންނެވޭނެ ކަމަށެވެ. އެހެންކަމުން ވިލިފުށީ ދާއިރާގެ މެމްބަރު ހަސަން އަފީފު ރިޔާސަތު ތިން ދުވަހު ވިދިވިދިގެން ރިޔާސަތު ބެލެހެއްޓެވި ކަމަށެވެ. އެތިން ދުވަސް ހަމަވުމުން ރިޔާސަތުގައި އިންނެވުމަށް ގަވާއިދުން ތަންނުދޭތީ ޖަލްސާ ކުރިއަށް ނުގެންދެވީ ކަމަށް މެންބަރު ޒިޔާދު ވިދާޅުވިއެވެ.

މީގެ އިތުރުން މެންބަރު ޒިޔާދު ވިދާޅުވީ މަޖިލީހުގައި ސަރުކާރުން ބޮޑު ތަޅު އަޅުވާފައިވާކަމަށް ވިދާޅުވި ނަމަވެސް އެކަން މިއަދު ރައްޔިތުން ބަލައި ނުގަންނާނެ ކަމަށެވެ.

މެންބަރު ޒިޔާދު ވިދާޅުވީ ކޮމެޓީތައް އެކުލަވާލުމަށް ވެސް ގިނަ ބައްދަލުވުންތައް ބާއްވާފައިވާ ކަމަށެވެ. ނަމަވެސް ފެނިގެންދަނީ އެމަސައްކަތް ކުރިއަށް ގެންދިއުމަށް ފަހަތަށް ޖެހިވަޑައިގަންނަވާ މަންޒަރު ކަމަށް މެންބަރު ޒިޔާދު ވިދާޅުވިއެވެ. އަދި ވިދާޅުވީ ބަޔަކު ބޭނުންވާ ގޮތަކަށް ކޮމެޓީތައް އެކުލަވާލުމުން ސަރުކާރުން ބޭނުންވާ ގޮތަށް މަޖިލީހުގެ މަސައްކަތްތައް ކުރިއަށް ނުގެންދެވޭނެ ކަމަށެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަދި ނައިބު ރައީސް އީވާ އަބްދުﷲގެ އިތުބާރުނެތް ކަމުގެ މައްސަލަ ރައްޔިތުންގެ މަޖިލީހަށް ވަނީ ވައްދާފައެވެ. ނަމަވެސް އެމަސައްކަތް ކުރިއަށް ގެންދެވޭ ގޮތެއް ނުވިއެވެ. އަދި މިމަހުގެ 22 ވީ ބުރާސްފަތި ދުވަހު ރައްޔިތުންގެ މަޖިލީހުގެ 2023 ވަނަ އަހަރުގެ ދެވަނަ ދައުރުގެ ޖަލްސާތައް ނިންމާލައި، މަޖިލީސް ވަނީ ޗުއްޓީއަށް ގޮސްފައެވެ. ޗުއްޓީއަށްފަހު މަޖިލީހުގެ މިއަހަރުގެ ތިންވަނަ ދައުރުގެ ޖަލްސާތައް ފަށާނީ އޮގަސްޓް މަހުއެވެ.