ރެއާލް މެޑްރިޑްގެ ކެޕްޓަން ނަޗޯ ފެނާންޑޭޒް އެއްބަސްވުން އައުކޮށްފި

ރެއާލް މެޑްރިޑްގެ ކެޕްޓަން ނަޗޯ ފެނާންޑޭޒް އެ ކުލަބާއެކު އަހަރު ދުވަހުގެ އެއްބަސްވުމެއްގައި ސޮއިކޮށްފައިވާ ކަން އެ ކުލަބުން ކަށަވަރުކޮށްދީފި އެވެ.

އުމުރުން 33 އަހަރުގެ ޑިފެންޑަރު މި މަހުގެ ކުރީކޮޅު ވަނީ މެޑްރިޑުން އައު އެއްބަސްވުމެއްގެ ހުށަހެޅުން ގަބޫލުކުރަން ނިންމިކަން އިއުލާންކޮށްފަ އެވެ. 2024 ވަނަ އަހަރުގެ ޖޫން މަހުގެ ނިޔަލަށް އެއްބަސްވުން އިތުރުކުރިކަން ރެއާލް މެޑްރިޑުން ރަސްމީކޮށް އާންމުކުރީ ބުރާސްފަތި ދުވަހުއެވެ.

2001 ވަނަ އަހަރު ރެއާލް މެޑްރިޑްގެ 11 އަހަރުން ދަށުގެ އެކަޑަމީ ޓީމާ ގުޅުނު ފަހުން ނަޗޯ ވަނީ 22 އަހަރު ރެއާލް މެޑްރިޑް ތަމްސީލުކޮށްފަ އެވެ. އޭނާ ވަނީ ރެއާލް މެޑްރިޑްގެ ފުރަތަމަ ޓީމަށް 319 މެޗު ކުޅެދީ 23 ތަށި ކާމިޔާބުކޮށްފައެވެ. އޭގެތެރޭގައި ތިން ޗެމްޕިއަންސް ލީގު، ފަސް ކްލަބް ވޯލްޑް ކަޕް، ހަތަރު ޔޫރަޕިއަން ސުޕަ ކަޕް، ތިން ސެޕެނިޝް ލީގު ތަށި، ދެ ކޮޕާ ޑެލްރޭ އަދި ހަތަރު ސްޕެނިޝް ސުޕަ ކަޕް ހިމެނެއެވެ.

މި މަހުގެ ކުރީކޮޅު ކަރިމް ބެންޒެމާ ވަކިވި ފަހުން ސްޕެއިންގެ ކުޅުންތެރިޔާ ނަޗޯ ވަނީ ކުލަބު ކެޕްޓަންގެ މަގާމު އަދާކޮށްފަ އެވެ.

މިދިޔަ ސީޒަނުގައި ސްޕެނިޝް ލީގުގެ 27 މެޗު ކުޅެ، 18 މެޗު ފެށި ނަމަވެސް، ސީޒަނުގެ ތެރޭގައި ނަޗޯ ވަނީ ވަރަށް ބޮޑަށް މުހިންމުވެ، ބާނަބެއުގައި ކުރިއަށް ދިއުމަށް ހިތްވަރު ދީފަ އެވެ.