އިންޓަރ ސްކޫލް ޓީޓީ މުބާރާތުން، ހުނަރުވެރި ގިނަ ކުޅުންތެރިންތަކެއް ފެނުނު - ޝިއުރީ

މެދުކެނޑުމަކަށްފަހު ބޭއްވި އިންޓަރ ސްކޫލް ޓޭބަލް ޓެނިސް މުބާރާތުން, ހުނަރުވެރި ވަރަށް ގިނަ ކުޅުންތެރިން ފާހަގަކުރެވުނުކަމަށް، އެސޯސިއޭޝަންގެ ނައިބުރައީސް ޝިއުރީ އިބްރާހީމް ވިދާޅުވެއްޖެއެވެ.

މުބާރާތް ނިމުމުން ރާއްޖެ ޓީވީއާ ވާހަކަދައްކަމުން ޝިއުރީ ވިދާޅުވީ މެދުކެނޑުމަކަށްފަހު ބޭއްވުނީ ވަރަށް ސަޕޯރޓް ބޮޑު ކާމިޔާބު މުބާރާތެއްކަމަށެވެ. މުބާރާތުން ފާހަގަވީ ހުނަރުވެރި ކުޅުންތެރިންތަކެއް ކަމަށާއި, ޓީޓީއަކީ އެންމެން ގުޅިގެން މަސައްކަތްކުރުމުން ނަތީޖާ ނެރެވޭނެ ކުޅިވަރެއްކަން ސާބިތުވި ކަމަށެވެ.

މީގެކުރިން މަދުން ކުދިން ބައިވެރިވާ އުމުރުފުރާތަކުންވެސް މިފަހަރު ގިނަ ކުދިން ވާދަކޮށް, ހުނަރުވެރި އުއްމީދީ ކުޅުމެއް ދެއްކިކަން ޝިއުރީ ފާހަގަކުރިއެވެ.

ޝިއުރީ ވިދާޅުވީ މިފަހަރުގެ އިންޓަރ ސްކޫލް މުބާރާތަކީ ޖުމްލަގޮތެއްގައި ޔޫތު ޑިވެލޮޕްމަންޓަށް ލިބުނު ވަރަށް ބޮޑު ކާމިޔާބީއެއް ކަމަށެވެ. މިއީ ގްރާސްރޫޓް ކުޅުންތެރިންތަކެއް ޓޭބަލް ޓެނިހަށް ތައާރަފްވެގެން، ސްކޫލްތަކުގެ ސަޕޯޓާއެކު ނިމިގެން ދިޔަ ކާމިޔާބު މުބާރާތެއްކަން ޝިއުރީ ފާހަގަކުރެއްވިއެވެ.

ޝިއުރީ ވިދާޅުވީ، އުއްމީދަކީ މި ކުޅުންތެރިން ޓީޓީ ކުޅުމުގައި ދެމިތިބުން ކަމަށެވެ. އަދި ކުރިއަށް އޮތް ތަނުގައި މި ކުޅުންތެރިންނަށް އިތުރު ކާމިޔާބީތައް ލިބުމަށް އުއްމީދުކުރައްވާ ކަމަށް ވިދާޅުވިއެވެ.

ފުވައްމުލަކުގައި ފެށި ޑިވެލޮޕްމަންޓް ޕްރޮގްރާމްގެ ނަތީޖާ ފާހަގަކުރައްވައި ޝިއުރީ ވިދާޅުވީ، ފުވައްމުލަކުގެ ސްކޫލްތަކުން ހޯދީ ފަޚުރުވެރި ކާމިޔާބީތަކެއް ކަމަށެވެ.

މާލެ ސިޓީން އެކަނިވެސް މުބާރާތުގައި 11 ސްކޫލަކުން ވާދަކުރިއެވެ. މީގެއިތުރުން ފުވައްމުލަކުގެ 3 ސްކޫލަކުން ވާދަކުރިއެވެ. މުބާރާތުގައި 164 ކުޅުންތެރިން ވާދަކުރިއެވެ.