ކުޑައައްޔަގެ ދަރިވަރެއް، ހޯދީ ބޮޑު ކާމިޔާބެއް! އުންމީދަކީ ކާމިޔާބީ ދެމެހެއްޓުން!

ފުވައްމުލަކަށް ނިސްބަތްވާ އަޝްރަފް ޙަސަން ބޮޑީބޯޑިންގެ ތެރެއަށް ވަނީ ގާތް ރަޙުމަތްތެރިއެއްގެ އެހީތެރިކަމާއެކު އެވެ. އެއީ އަމިއްލަ ރަށުގައި އުޅުމުގެ ތެރޭގައި ރަޙުމަތްތެރިޔާ އަޝްރަފަށް ދިން ޚިޔާލަކީ މޫދަށް ދިޔުމަށެވެ. އެހެން ނަމަވެސް އެންމެ ފުރަތަމަ އަޝްރަފް ވަނީ އެކަމާ ދެކޮޅުހަދައިފަ އެވެ. އޭގެ ފަހުން ވެސް ތަކުރާރުކޮށް ރަޙުމަތްތެރިޔާ މޫދަށް ދާން އެދޭ ވަރުން އަޝްރަފް ދާން ފެށި އެވެ. މޫދަށް އެރުމުގައި އޭރު އަޝްރަފް އެންމެ ފުރަތަމަ ބޭނުންކުރީ ގޭގައިހުރި ފުޅިމަދުގަނޑު ހޯދައިގެންނެވެ. އެކަމުގެ ތެރެއިން ރަށުގައި އުޅުނު ރާޅާއަޅާ މީހުންގެ ފަރާތުން އަޝްރަފް ވެސް މި ކުޅިވަރުގެ ތެރެއަށް ވަނެ އެވެ.

ބޮޑީބޯޑިން ގައި އަޝްރަފްގެ އެންމެ ބޮޑު ކާމިޔާބަކީ ޤައުމީ ބޮޑީބޯޑިން ލީގުގެ އެންމެ ފުރަތަމަ މުބާރާތުގެ ޗެމްޕިއަންކަން ހޯދުމެވެ. އެ ކާމިޔާބާއެކު އަޝްރަފް ވަނީ ބޯޑީބޯޑިންގެ ތާރީޚުން ވަރަށް ފުރިހަމަ ޖާގައެއް ހޯދައިފަ އެވެ. މިއަހަރުގެ ޤައުމީ ލީގުގެ ފުރަތަމަ މުބާރާތް ކަމަށްވާ "ބުރުނު ޝިކާރު" އަޝްރަފް ކާމިޔާބު ކުރީ ރާއްޖޭގެ އެންމެ މޮޅު ބޯޑީބޯޑަރު އަލީ ޚުޝްރުވާން އަޙުމަދު (ކުޑައައްޔަ) އާއި އެހެނިހެން ބޯޑަރުން ފަހަތަށް ޖައްސާލުމަށްފަހު އެވެ. މީގެ އިތުރުން ވެސް އަޝްރަފްގެ މި ކާމިޔާބީ ޚާއްސަވެ އެވެ. މިއަހަރުގެ މުބާރާތަކީ ބުރުނު ޝިކާރުގެ ފަސް ވަނަ އެޑިޝަން އެވެ. މީގެ ކުރިން ހަތަރު ފަހަރު ވެސް މި މުބާރާތް ކާމިޔާބުކޮށްފައި ވަނީ ކުޑަ އައްޔަ އެވެ. އެހެންކަމުން އަޝްރަފް އަކީ ކުޑަ އައްޔަ ފިޔަވައި، މި މުބާރާތް ކާމިޔާބު ކުރި ފުރަތަމަ އެތުލީޓެވެ. އަނެއްކޮޅުން މިއީ ފާއިތުވި ދިހަ އަހަރުގެ ތެރޭގައި ލޯކަލް މުބާރާތެއްގެ ފައިނަލް ހީޓުގައި ކުޑައައްޔަގެ މައްޗަށް އެހެން ބޯޑީބޯޑަރަކު ކުރި ހޯދި ފުރަތަމަ ފަަހަރެވެ. އަޝްރަފް ދެކޭ ގޮތުގައި މިއީ އޭނާ އަށް ލިބުނު ވަރަށް ބޮޑު ކުރިއެރުމެކެވެ. ހަމައެއާއެކު އަހަރުގެ ބާކީ އޮތް މުބާރާތްތަކުގައި ކުރިއަށް ދިޔުމަށް ލިބުނު އިތުރު ހިތްވަރެއް ވެސް މެއެވެ.

އެންމެ ފުރަތަމަ ބޮޑީ ބޯޑިންގެ ތެރެއަށް ނުކުތްއިރު މިވަރުގެ ކާމިޔާބެއް ލިބިދާނެ ކަމަށް އަޝްރަފް އުންމީދެއް ވެސް ނުކުރެ އެވެ. ނަމަވެސް ކުޑައައްޔަ ހިމެނޭހެން އެހެން ބޯޑަރުންނާއެކު އަމިއްލަ ރަށުގައި ކުރިއަށް ދިޔަ މުބާރާތުގައި ވާދަކުރުމަށްފަހު، މިހާ ހިސާބަށް އާދެވޭނެ ކަމުގެ އުންމީދު އަޝްރަފަށް އައުވި އެވެ. އަޝްރަފް ވަނީ މީގެ ކުރިން ވެސް ބުރުނު ޝިކާރު ޗެލެންޖެއްގައި ވާދަކޮށްފަ އެވެ. މީގެ އިތުރުން ޤައުމީ ބަނޑުފިލާ ޗެލެންޖުގައި ވެސް ވަނީ ވާދަކޮށްފަ އެވެ. ޤައުމީ މުބާރާތުން އަޝްރަފް ކެޓީ ސެމީ ފައިނަލުންނެވެ.

މީގެ އިތުރުން އަޝްރަފް ދެކޭ ގޮތުގައި ބުރުނު ޝިކާރު ޗެލެންޖުން އެއް ވަނަ ލިބުމަކީ، ކުރިއަށް ހުރި މުބާރާތްތަކުގައި ވާދަކުރުމަށް ވެސް އޭނާ އަށް ލިބުނު ވަރަށް ބޮޑު ހިތްވަރެކެވެ. ޚާއްސަކޮށް ކުޑައައްޔަ ކަހަލަ އެތުލީޓަކު ފަހަތަށް ޖައްސާލުމަށް ފަހު އެއް ވަނަ ހާސިލުކުރެވުމަކީ އޭނާ އަށް ލިބުނު އިތުރު ހިތްވަރެކެވެ. ކުރީ އަހަރުތަކާ ޚިލާފަށް މިއަހަރުގެ ބޮޑީބޯޑިން ޤައުމީ ލީގު ކުރިއަށް ދަނީ ވާދަވެރި ގޮތަކަށެވެ. ހަތަރު އިވެންޓަކަށް ބަހާލައިގެން މިއަހަރުގެ ޤައުމީ ލީގު ކުރިއަށްގެންދާއިރު، ލީގު ޗެމްޕިއަންކަން ލިބޭނީ ހަތަރު އިވެންޓުން ވެސް އެންމެ މަތިން ސްކޯ ކުރާ އެތުލީޓަކަށެވެ. އެހެންކަމުން އަޝްރަފް ދެކޭ ގޮތުގައި އޭނާ އަށް މިއަހަރުގެ ޤައުމީ ލީގު ކާމިޔާބު ކުރުމަށް ލިބުނީ އިތުރު ފުރުސަތެކެވެ. އެގޮތުގައި ހުރެ އަޝްރަފްގެ އުންމީދަކީ ކުރިއަށް ހުރި މުބާރާތްތަކުގައި މާ ރަނގަޅު ނަތީޖާއެއް ނެރުމެވެ.

މި ޚާއްސަ ކާމިޔާބީގައި އަޝްރަފް ވަނީ ފުވައްމުލަކު ސާފިން އެސޯސިއޭޝަނަށް ޝުކުރު އަދާކޮށްފަ އެވެ. ވަކިން ޚާއްސަކޮށް އަޝްރަފް ވަނީ، ފައިނަލްގައި އޭނާއާ ވާދަކުރި ކުޑައައްޔަ އަށް ޝުކުރު އަދާކޮށްފަ އެވެ. އަޝްރަފް ފާހަގަކުރި ގޮތުގައި އޭނާ އަކީ ކުޑައައްޔަގެ ދަރިވަރެކެވެ. އެހެންކަމުން ކުރިއަށް އޮތް ތަނުގައި ވެސް ހުންނާނީ ކުޑައައްޔަގެ ދަރިވަރެއްގެ ގޮތުގައި ކަމަށް އޭނާ ބުނެއެވެ. ބޯޑީބޯޑިންގެ ތެރެއަށް އަޝްރަފް ވަދެގެން އައި ދުވަހުން ފެށިގެން މިއަދާ ހަމައަށް ގިނަ ކަންކަމުގައި ކުޑައައްޔަ އޭނާ އަށް އެހީތެރިވެދީފައިވާކަން އަޝްރަފް ފާހަގަ ކުރި އެވެ. މީގެ އިތުރުން ވެސް އޭނާ އަށް އެހީތެރިކަން ފޯރުކޮށްދިން އެހެން ފަރާތްތަކަށް ވެސް ޝުކުރު އަދާކުރި އެވެ.