އެމްބީބީއޭގެ އަހަރީ އާންމު ޖަލްސާ ބާއްވައި، ބަޖެޓު ފާސްކޮށްފި
މިއަހަރަށް އެމްބީބީއޭ އިން ފާސްކޮށްފައި ވަނީ 6.5 މިލިއަން ރުފިޔާގެ ބަޖެޓެކެވެ. މިއީ މިދިޔަ އަހަރުގެ ބަޖެޓާ އަޅާ ބަލާއިރު، ބޮޑު އަދަދެއްގެ ދަށްވުމެކެވެ.
އެމްބީބީއޭގެ އަހަރީ އާންމު ޖަލްސާގެ ތެރެއިން
މޯލްޑިވްސް ބޮޑީ ބޯޑިން އެސޯސިއޭޝަން (އެމްބީބީއޭ) އިން، އެ އެސޯސިއޭޝަންގެ އަހަރީ އާންމު ޖަލްސާ ބާއްވައި، މިއަހަރުގެ ބަޖެޓު ފާސްކޮށްފި އެވެ.
ހެންވޭރު ބޯޅަ ގޭގައި އޮތް އެ އެސޯސިއޭޝަންގެ އަހަރީ އާންމު ޖަލްސާގައި ވަނީ މިއަހަރަށް ލަފާ ކުރާ ބަޖެޓު ފާސްކޮށްފަ އެވެ. އޭގެ އިތުރުން، 2024 ވަނަ އަހަރުގެ އަހަރީ ރިޕޯޓު ފާސް ކުރުމުގެ އިތުރުން، އެސޯސިއޭޝަންގެ އަަސާސީ ޤަވާއިދަށް ގެންނަން ބޭނުންވި ބަދަލުތައް ވެސް ފާސްކޮށްފައިވެ އެވެ.
މިއަހަރަށް އެމްބީބީއޭ އިން ފާސްކޮށްފައި ވަނީ 6.5 މިލިއަން ރުފިޔާގެ ބަޖެޓެކެވެ. މިއީ މިދިޔަ އަހަރުގެ ބަޖެޓާ އަޅާ ބަލާއިރު، ބޮޑު އަދަދެއްގެ ދަށްވުމެކެވެ.
އެމްބީބީއޭ އިން ބުނެފައިވާ ގޮތުގައި މިދިޔަ ތިން އަހަރު ވެސް ބޭއްވި ބައިނަލްއަޤުވާމީ މުބާރާތް ކަމަށްވާ، ވިޒިޓް މޯލްޑިވްސް ޕްރޯ މިއަހަރު ބޭއްވޭނެ ކަމުގެ ޔަގީންކަން ނެތް ކަމަށެވެ. އެއީ އެ މުބާރާތް ކުރިއަށް ގެންދިޔުމަށް ސަރުކާރުގެ ފަރާތުން ލިބެން ޖެހޭ ޔަގީންކަން ނުލިބޭތީ ކަމަށް ވެސް އެ އެސޯސިއޭޝަނުން ބުނެފައިވެ އެވެ.
މިދިޔަ ތިން އަހަރު ވެސް ވިޒިޓް މޯލްޑިވްސް ޕްރޯ ބާއްވާފައި ވަނީ ސަރުކާރުގެ ވަރަށް ބޮޑު އެހީތެރިކަމާ އެކު އެވެ. އެހެން ނަމަވެސް، މިއަހަރު އެ މުބާރާތް ބޭއްވޭނެ ކަމުގެ ޔަގީންކަން ނެތުމުން، މިއަހަރުގެ ބަޖެޓުގައި އެ މުބާރާތަށް ޚަރަދުވާނެ ކަމަށް ލަފާ ކުރެވޭ ފައިސާ ނުހިމަނަން އެމްބީބީއޭ އިން ނިންމީ އެވެ.
އަހަރީ އާންމު ޖަލްސާގައި އެމްބީބީއޭގެ އަސާސީ ޤަވާއިދަށް ގެނެވުނު ބަދަލުތަކުގެ ދަށުން ވަނީ، ބައެއް ކޮމެޓީތައް ވެސް އުފައްދައިފަ އެވެ. މީގެ އިތުރުން ޖޫނިއާ ކެޓަގަރީ ގައި ހިމެނޭ އެތުލީޓުންނަށް، ސީނިއާ ޤައުމީ ޓީމަށް އެރުމުގެ ފުރުސަތު ފަހި ވާނެ ގޮތަށް ވެސް ބަދަލު ގެނެސްފައިވެ އެވެ.
