ސްޕެޝަލް އޮލިމްޕިކްސް ވޯރލްޑް ގޭމްސްގައި ޒާނާ ލޯ މެޑަލް ހޯދައިފި

ޖަރުމަނުގެ ބަރލިންގައި ކުރިޔަށްދާ ސްޕެޝަލް އޮލިމްޕިކްސް ވޯރލްޑް ގޭމްސްގައި ރާއްޖޭގެ ޒާނާ އަލީ ޝަރީފް ލޯ މެޑަލް ހޯދައިފިއެވެ.

އަންގާރަ ދުވަހު ޒާނާ ލޯ މެޑަލް ހޯދާފައިވަނީ 200 މީޓަރު ދުވުމުންނެވެ. ފައިނަލުގައި ޒާނާ ވަނީ އެއް މިނެޓު 27.35 ސިކުންތުން ރޭސް ނިިންމާފައެވެ. ޒާނާގެ އިތުރުން އާއިޝަތު ލައިކާ ހުސައިން ވެސްވަނީ ފައިނަލަށް ދަތުރުކޮށްފައެވެ. ލައިކާއަށް ލިބުނީ ފަސްވަނައެވެ.

ސްޓޭންޑިން ލޯންގް ޖަމްޕް އިވެންޓުގެ ފައިނަލުން ރާއްޖޭގެ ހުސައިން ސުޖޫދް ނާޝިދުވެސް ވަނީ ޖާގަހޯދާފައެވެ. މި ތިން ބައިވެރިންގެ އިތުރުން މުބާރާތުގައި ރާއްޖެ ތަމްސީލުކޮށްފައި ވަނީ އިބްރާހީމް ހުމައިދު މުހައްމަދާއި މުހައްމަދު ރާއިފް ޝަރީފް އަދި އާއިޝަތު މާނިޔާ އާދަމްއެވެ. ރާއިފްއާއި މާނިޔާ ހިމެނެނީ ބެޑްމިންޓަން ޓީމުގައެވެ.

މިއީ ރާއްޖެއިން މި މުބާރާތުގައި ބައިވެރިވި ދެވަނަ އަހަރެވެ. މީގެ ކުރިން ރާއްޖެއިން ވާދަކޮށްފައިވަނީ 2019 ވަނަ އަހަރު ޔުނައިޓެޑް އަރަބް އެމިރޭޓްސްގެ އަބޫދާބީގައި ބޭއްވި މުބާރާތުގައެވެ.