ހުޅުމާލެ ފޭސް 2ގައި ސިފައިންނަށް ހާއްސަ ފްލެޓް އިމާރާތެއް އެޅުމާއެކު، ކޭކޭގެ ޖާގަ ވެސް އިތުރުކުރަނީ
ސިފައިންގެ މުސާރައަށް ހެޔޮ ބަދަލުތަކެއް ގެނައުމުގެ މަސައްކަތް ދަނީ ކުރަމުން
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު
ދިވެހި ސިފައިންނަށް ހާއްސަކޮށްގެން ހުޅުމާލޭ ދެވަނަ ފިޔަވަހީގައި އިތުރު ފްލެޓް އިމާރާތެއް އެޅުމަށް ނިންމާފައިވާ ކަމަށާއި އެ ފްލެޓުތަކުގެ މަސައްކަތް މިއަހަރު ފެށޭނެ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެއެވެ.
ސިފައިންގެ އަހަރީ ދުވަހާ ގުޅިގެން އަންގާރަ ދުވަހު ބޭއްވި ރަސްމީ ހަފްލާ ޝަރަފުވެރިކޮށްދެއްވައި ރައީސް ވިދާޅުވީ މި ސަރުކާރުން ސިފައިންގެ ވެލްފެއާ ކަންކަން ހަރުދަނާ ކުރުމަށް ގިނަ މަސައްކަތްތަކެއް ކުރަމުން އަންނަ ކަމަށެވެ. އެގޮތުން، މި ވަގުތުވެސް އެންމެ ބޮޑު އިސްކަމެއް ދެއްވަނީ އެ ފަރާތްތަކުގެ ބޯހިޔާވަހިކަމަށް ކަމަށާއި ސިފްކޯއިން ހަދަމުން އަންނަ ފްލެޓުތަކުގެ މަސައްކަތްތައް ހުއްޓިފައި ހުންނަތާ ގިނަ ދުވަސްތަކަށްފަހު އިމާރާތް ނިންމުމުގެ މަސައްކަތް މިހާރު ކުރިއަށްދާކަން އެމަނިކުފާނު ފާހަގަކުރެއްވިއެވެ.
ރައީސް ވިދާޅުވީ ޚިދުމަތުގައި ތިބި ސިފައިންގެ ބޯހިޔާވަހިކަމަށް ހާއްސަކޮށްގެން ހުޅުމާލެ ދެވަނަ ފިޔަވަހީގައި ފްލެޓް އިމާރާތެއް ހަދާނެ ކަމަށެވެ. އެގޮތުން، 138 ޔުނިޓުގެ މި އިމާރާތުގެ މަސައްކަތް މިއަހަރުގެ ތެރޭގައި ފެށޭނެ ކަމަށް އެމަނިކުފާނު ވިދާޅުވިއެވެ.
ދެވަނަ ފިޔަވަހީގައި ހަދާ އިމާރާތުގެ އިތުރުން ކަޅުތުއްކަލާ ކޮށީގެ އެކޮމޮޑޭޝަން ޖާގަ އިތުރު ކުރުމަށް ނިންމާފައިވާކަން ވެސް ރައީސް ފާހަގަކުރެއްވިއެވެ. މިގޮތުން ކަޅުތުއްކަލާ ކޮށީގައި 480 މީހުންގެ ޖާގައިގެ އިމާރާތަކާއި 100 މީހުންގެ ޖާގައިގެ އިމާރާތެއް އެޅުމަށް ނިންމާފައިވާއިރު އެ މަސައްކަތް ވެސް މިއަހަރު ބިޑު ކުރެވޭނެ ކަމަށް ރައީސް ވިދާޅުވިއެވެ.
ރައީސް ވަނީ ސަރުކާރުގެ ޕޭ ހާމަނައިޒޭޝަން މަސައްކަތުގެ ދަށުން ފުލުހުންނާއި ސިފައިންގެ މުސާރައަށް ހެޔޮ ބަދަލުތަކެއް ގެނައުމަށް މަސައްކަތް ކުރައްވަމުން ގެންދަވާ ކަމަށް ވެސް ވިދާޅުވެފައެވެ. އަދި އެކަމުގެ ދިރާސާތައް މިހާރު ޕޭ ކޮމިޝަނުން ކުރަމުން އަންނަކަން އެމަނިކުފާނު ފާހަގަކުރެއްވިއެވެ.
މި ހުރިހާ ކަމަކީ ވެސް ސިފައިންގެ އޮޕަރޭޝަނަލް ގާބިލުކަމާ ގުޅިފައިވާކަންތައްތައް ކަން ފާހަގަކުރައްވައި ރައީސް ވިދާޅުވީ އެފަދަ އެތައް ކަމެއް މިހާރުވެސް ރާއްޖޭގެ އެކި ކަންކޮޅުތަކުގައި ކުރިއަށްދާ ކަމަށެވެ. އެގޮތުން ސިފަވަރުގައި ހަދާ އެކަތަ ބަނދަރު ހެދުމަށް ބޭނުންވާ ބިން ހިއްކުމުގެ މަސައްކަތް މިހާރު ކުރިއަށްދާ ކަމަށާއި ހަނިމާދޫ އިންޓަރނޭޝަނަލް އެއަރޕޯޓާއެކު މާފިލާފުށީގައި ހިންގާ އެމްއެންޑީއެފް ނޮަދަން އޭރިއާ ހެޑްކުއާޓަރ ހަނިމާދުއަށް ބަދަލު ކުރުމަށް ނިންމަވާފައިވާކަން ވެސް އެމަނިކުފާނު ފާހަގަކުރެއްވިއެވެ.
