ކަންސޭލޯ ސިޓީގައި މަޑެއް ނުކުރާނެ

އިނގިރޭސި ޕްރިމިއާ ލީގުގެ ޗެމްޕިއަން މެންޗެސްޓަރ ސިޓީ އަށް ކުޅެމުން އައި ޕޯޗުގަލްގެ ޑިފެންޑަރު ޔާއޯ ކަންސޭލޯ މި ސީޒަނަށް ފަހު އެކުލަބު ދޫކޮށްލަން ނިންމާފައިވާ ކަމަށް މީޑިއާ ރިޕޯޓުތައް ބުނެފި އެވެ.

ސިޓީ އާއެކު ކަންސޭލޯ ހަދާފައިވާ އެއްބަސްވުމުގައި ބާކީ ހަތަރު އަހަރު އެބަ އޮތެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް އޭނާ ބޭނުންވަނީ މިހާރު ކުލަބު ދޫކޮށްލަން ކަމަށާއި، އެކަމަށް ސިޓީން ވެސް ރުހޭ ކަމަށް މީޑިއާ ތަކުގައި ވަނީ ބުނެފަ އެވެ. ކަންސޭލޯ ވަނީ ދާދި ފަހުން ޖަރުމަނުގެ ބަޔާން މިއުނިކަށް ކުޅެފަ އެވެ. އެއީ ލޯނު އެއްބަސްވުމެއްގެ ދަށުންނެވެ. ނަމަވެސް މި ސީޒަނަށް ފަހު ބަޔާނުން ބޭނުންވާނަމަ، ސިޓީން ބޭނުން އަގެއް ދެއްކުމަަށްފަހު ދާއިމީ ގޮތެއްގައި ކަންސޭލޯ އެކުލަބުގައި ބެހެއްޓޭނެ އެވެ. ނަމަވެސް އެކަމަށް ބަޔާނުން ވަކި ގޮތެއް ނިންމައިފައެއް ނުވެ އެވެ.

ކަންސޭލޯ ހޯދުމުގެ މަސައްކަތް ސްޕެއިންގެ ބާސެލޯނާ އިން ކުރަމުން އަންނަ ކަމަށް މީޑިއާ ތަކުން ބުނެ އެވެ. ޚާއްސަކޮށް އަންނަ ސީޒަނަށް އެ ޓީމުގެ ޑިފެންސް ވަރުގަދަ ކުރުމަށް ބާސެލޯނާ އިން ކުރަމުން އަންނަ މަސައްކަތުގައި ކަންސޭލޯ އަކީ ކޯޗު ޒަވީ ހެނާންޑޭޒް ވަރަށް ބޮޑަަށް ބޭނުންވާ ކުޅުންތެރިޔެކެވެ. ނަމަވެސް ބާސެލޯނާ އަށް ކަންސޭލޯ ގެނެވުން ބިނާވެފައި އޮންނާނީ އެކުލަބުގެ މާލީ ހާލަތުގެ މައްޗަށެވެ.

ޔުވެންޓަސް ދޫކޮށް ސިޓީ އަށް ބަދަލުވި ކަންސޭލޯ ވަނީ މިހާތަނަށް އެކުލަބަށް ކުޅެދިން 154 މެޗުގައި ނުވަ ލަނޑު ޖަހައިފަ އެވެ. ސިޓީ އަށް ބަދަލުވި ފަހުން އޭނާ ވަނީ އެކުލަބުގައި މޮޅު ކުޅުމެއް ވެސް ދައްކައިފަ އެވެ. ޚާއްސަކޮށް ކަންސޭލޯ އަކީ އެ ޓީމުގެ ޑިފެންސްގައި އެންމެ މުހިންމު އެއް ކުޅުންތެރިޔާ އެވެ. ސިޓީއާއެކު އޭނާ ވަނީ ފަސް ތައްޓެއް ކާމިޔާބުކޮށްފަ އެވެ.