ސާފް ޗެމްޕިއަންޝިޕްގައި ވަރުގަދަ ގައުމުތައް ބައިވެރިކުރަންޖެހޭ: ޗެތްރީ

ސާފް ޗެމްޕިއަންޝިޕް ފުޓްބޯޅަ މުބާރާތުގައި ވަރުގަދަ ގައުމުތައް ބައިވެރިކުރަންޖެހޭ ކަމަށް އިންޑިޔާގެ ކެޕްޓަން ސުނިލް ޗެތްރީ ބުނެފި އެވެ.

ތިން ފަހަރު މުބާރާތް ކާމިޔާބުކޮށްފައިވާ އެންމެ ކާމިޔާބު ކެޕްޓަން މިހެން ބުނީ ސަރަހައްދީ އެންމެ ބޮޑު ފުޓްބޯޅަ މުބާރާތުގައި ފުރަތަމަ ފަހަރަށް އެހެން ހިސާބުތަކުގެ ގައުމުތައް ބައިވެރިކުރުމުންނެވެ. މި ގޮތުން ސާކް ސަރަހައްދުން ބޭރުން މި ފަހަރުގެ މުބާރާތުގައި ވާދަކުރަނީ ކުވޭތާއި ލެބަނަން އެވެ.

ތިން ފަހަރު މުބާރާތުގެ މޮޅު ކުޅުންތެރިޔާގެ މަގާމު ވެސް ހޯދާފައިވާ ފޯވަޑް ބުނީ ސާފް ޗެމްޕިއަންޝިޕް ކާމިޔާބު ކުރަން ކޮންމެ ގައުމަކުން ވެސް ވިސްނަނީ ވަރުގަދަ މެޗުތަކެއް ކުޅެގެން ކަމަށެވެ. އޭނާގެ މިޚިޔާލަކީ ސަރަހައްދީ ބައެއް ގައުމުތަކުން ގަބޫލުނުކޮށްފާނެ ޚިޔާލެއް ކަމަށް ވެސް ޗެތްރީ ބުންޏެވެ.

ސާފް ޗެމްޕިއަންޝިޕަށް ދައުވަތު ދީގެން މިފަހަރުގެ މުބާރާތުގައި ބައިވެރިކުރަނީ ލެބަނަން އާއި ކުވޭތެވެ. ޗެތްރީ ބުނީ މި ދެ ގައުމަކީ ސީރިއާ ފަދަ ގައުމުތަކާ އެއްފެންވަރެއްގެ ދެ ގައުމު ކަމަށާއި މިއަށްވުރެ ވެސް ވަރުގަދަ ޓީމުތަކެއް މުބާރާރުގައި ބައިވެރިކުރަން އިތުރަށް ބާރުއަޅަންޖެހޭ ކަމަށެވެ.

ޗެތްރީ މިގޮތަށް ވާހަކަ ދެއްކިއިރު އިންޑިޔާގެ ކުރީގެ ކެޕްޓަން ބައިޗުން ބުޓިޔާ ވެސް ވަނީ މިކަމަށް ތާއީދުކޮށްފަ އެވެ.